الحلقه 56-57
غادرتني المشاعر
الحلقه 56
انا: اطلق يدي في حد جاي
مالك: طلق يدي
وانا طلعت نجري وانا ركبا بيش مايشوفنيش حد مع مالك خبطت في سمر
انا: معليش
سمر: بحتت فيا بتكشيخا . قبل طيارتيلي كتفي
انا: به ماقتلك معليش
سمر: كشخت عليا وجت تبي تنزل مالك ركب
مالك: ارتبك . وانا تخزرطت
سمر: امممم هذا عليش تجري
انا: مابيتش انعبرها وركبت وسيبتها هيا ومالك وخشيت جوا للحوش
سمر: كيف حالك يامالك
مالك: تمام تمام وركب وسيبها وخش حتي هو جوا
خشيت وقعمزت جنب اسيل
اسيل: شن تو كويسا
انا: تي مافيا حاجا اتقوليش قاعدا قدامك
اسيل: يانا عليا فجعتيني عليك قلت هذي كنها
انا: الحمد الله اني كويسا وماتنفجعي ع غلاي يا غلاتي
اسيل: ان شاء الله
انا: شن جوك انتي ورياض
اسيل: والله تمام قاعدين مرا مصالحين وجونا سمح ومرا متعاركين
انا: ههههههه مازلتو تعاركو ماهديتوش
اسيل: وشن بيهدينا ياحنا
انا: بالك هالبنت هدتكم نحساب
اسيل: لالا اتجيبي ما اتجيبي كذبا راه لاتعقلي لاشي خلك من كلام الزايد
انا: ههههههه
طبعا كملنها اتهدريز وبعدها جو بابا وعمي صلاح
ولانهم كبار العيله قررو قرار وكان سبب القرار هذا هو انا بيش يغيرولي جوي ولان بابا شافني مرضت وخاف عليا رفض الراجل وحب يغيرلي جوي
عمي صلاح: ياجماعة الخير
اتفقت انا وتوفيق ان شباب يلمو بعضهم ويمشو لتركيا اسبوع يغيرو فيه جوهم
نحنا كلنا: عيطنا وقعدنا نصفقو وحسام ومالك يصفرو قعدو وزياد يكبر
زياد: الله اكبر ربي يخليك لنا ياقائد هههههه
ونحنا نضحكو ع اهبالهم
عمي صلاح: هههههههه به يا هبل قتلكم
لان نحنا نقدروش نمشو كلنا ونسيبو رزقنا سايب فاحتمشو انتم حسام وزياد ومالك ومعكم حاتم اتفقنا امعاه لاكن محمد يقدرش لان مراتا حامل وممنوعا عليها طيارا
وطبعا حتأخذو معاكن بنات نور وموده وهبه وفاطمه وسمر واسيل حكينا برا مع رياض ومعتز وقالو نمشو
يعني حتكون ماشيا شبابيا للتركيا
ها شن رايكم
نحنا: وهذا طلب يرتفض
مالك: باهي ع حساب من مشيين ههههه
حسام: صاح من عزمنا
زياد: كلا انا مفلس
عمي صلاح : كلا انتم ياثلاثي المرح الي تحتكم ماتحت حد
شباب: ههههههههه
عمي صلاح: بالنسبه للفندق ع حسابي انا وعمكم توفيق
كلا باقي الحاجات تو نعطوكم مصروفكم وراه اسبوع بس بيش اتغيرو فيه جوكم
مالك: باهي انتم كيف يصير فيكم
عمي صلاح: نحنا نرجوكم اتجو ونلمو اروحنا ونعدو للعمره
حسام: أوووفا يا حويج خيانه هذي
عمي صلاح: هذا هو وبعدها نشقو بيك وبفرحك يا سيد حسام ونفتكو من هرجتك
حسام: لا كان هكي ميه ميه معناها اتفقنا
نحنا: ههههههه
