#غادرتني_المشاعر
#الحلقه_36
مالك: ان شاء الله مانشوفهش ياربي
ورن جرس صبيت وحسيت بدنيا برمت بس قعدت نمشي وصلت في باب فتحتا
لقيت مالك مصبي ومطبس راسا اول مافتحت الباب رفع راسا وبحت فيا وكان شكلا باين ان تعبان بكل
ونظرة عيونا ليا فيهن حب وكلام وااااجد
انا بحتت فيه وكانت الدنيا تبرم ومعش فطنت لشي الا انا طيحا
مالك: خاف ومسكني من عند خصري وحط يدا تحت راسي نووور نوووور
وقعد يهز فيا
حسام كان يتصل لما شافني طايحا ومالك يحاول يوعيني سكر فونا وجا يجري
حسام: وهو خايف كنها شن درتلها
مالك: مش عارف فتحت الباب وطاحت
حسام: نوووور وقعد يخبط عليا
مالك: انشيلوها مستشفي ورفعني وطلع يجري وحطني في سيارة من لورا
حسام: انسكر حوش ونلحقك
وطلع مالك يجري وحال فريتشات الاربعه
وطلع في جرتا حسام وكان مالك طول طريق يسوق ويلتفت عليا ويعيطلي نوووور نووووور
وصل بيا مالك نزلني وخش بيا يجري وقعد يعيط في ممر مستشفي نبو دكتور وجو وحدين خذوني منا وحطوني ع سرير وخش عليا دكتور وقعد مالك هو وحسام يرجو فيا في ممر وقعدو مشيين جيين
حسام: كانت كويسا كنت نحكي انا وياها وصبيت نكلم وسيبتها كويسا
مالك: حكيتلهش حاجه زعلتها ولا هكي
حسام: لا جونا كان ميه ميه
ملك قعد يمشي في يدا ع شعرا .ياربي طمنا عليها
ويعظ ع صبعا ويضغط ع يدا
حسام: انكلم سيدي
مالك: لالا خلينا نطمنو عليها قبل بعدها كلما
حسام: باهي
مالك: مش اتحس طول دكتور
حسام: لالا تو كيف خش انت غير تهيالك بعدين ان شاء الله حيطلع مافيها شي.
مالك: ان شاء الله
قعدو شويه وطلع دكتور عليهم
مالك: جا للدكتور ها شنو يادكتور
الدكتور: لا الحمد الله تو كويسه وعندها هبوط في ضغط الدم لو كانت طولت اكثر من هكي كان ممكن ماتت لان ضغط دم يقتل كان صحبا مافطنلش
حسام: به شن سببا
الدكتور: سببا قلة وكال وضغوطات نفسيه ممكن اتمر بمشاكل او ماتأكلش كويس وسهر وتعب هذينا كلهن يسببن في هبوط ضغط الدم
مالك: باهي هيا تو كويسه
الدكتور: ضربتلها ابرة بيش نرفع بيها ضغطها وحطيتلها تغذيه لان جسمها نقصاتا املاح وفيتامينات هذينا كلهن وتو سيبتهم يديرولها في تخطيط قلب عشان نطمنو اكثر لان انا سألتها وقالتلي لها يومين اتحس بدوخا ونبضات قلبها متسرعا بس تخفوش هيا توا كويسا
حسام: به اليوم تقعد ولاشنو
الدكتور : لالا حنديرولها صورة تخطيط القلب وبعدها انخلوها ساعه لعند ماظغطها يستقر ويرد طبيعي وتكمل التغذيه وبعدها تقدرو طلعوها
مالك: به انخشو عادي
دكتور : اه اكيد تفضلو
مالك: شكراً يادكتور بارك الله فيك
الدكتور: شكر لله هذا وجبي وحمد الله ع سلامتها
مالك وحسام: الله يسلمك
طبعا انا لما جاني حسام كنت لبسا سروال جينز و تيشرت بيضا عليها طرف بسيط مخطط احمر في الابيض وكنت طالقا شعري ولان مالك تفلوج لمادخت عليه طلع بيا هكي
