غادرتني المشاعر )
الحلقه 4...
ويفتح الاصانصير ونبحت انا واسيل ويطلع من الاصانصير ولاد عمي خالد زياد
زياد:بنظره فيها تفنيصا كنكن
اسيل: شي نبو نركبو نرقدو
زياد: باهي تو انوصلكن
طبعا زياد هذا شخص مستفز بكل ايام الجامعه يقرأ معنا انا وشهد وموده ويديرلنا في جو امتاع الي يراقب فينا وجو شين بكل بذات عليا انا وشهد بحكم ماعندنش خو وكان ديما يحكي علينا للمالك وطبعا مالك مايصدق فينا وطبعا الانتقاد الاكبار كان ع لبسنا ونحنا بابا طبعا كان فري معنا وسمحلنا بكل شي وهو ديما يضرب في النقص ومعندش ثقه في خواتا المهم من الاخير عندا حاله نفسيه
انا: هذا شن لطروح الي يدير فيهن
اسيل: فكينا منا فوتيه
طبعا وقف الاصانصير ع الدور امتعنا ومشيت انا واسيل للدار وزياد نزل وانا نفتح في باب الدار ونحكي مع اسيل
انا: شن يحساب روحه هذا انا الحركات هذينا مايديرهنش ليا
اسيل: ماتعبريش ياأوني ماشيه ع قصاد عقلا
انا: لالا مش كان معندنش خوت ايديرلي هكي يفطن لخواتا ويشقا بروحه مادخلش بينا انا وشهد
انا اليوم انفوتا بس من بكره ايديرلي الجو هذا مره اخره نبي انبص عليه بابا
اسيل: تي عيال عمي خالد معروفين متخلفين وعندهم عقده نفسيه انتي ماتزعليش روحك حتي نحنا الي عندنا خوت مدخلين فينا
انا: لالا مريض عندا حاله نفسيه ربي يشفيه ان شاء الله.. والحاله علي خواتا يخليها مش علينا ويقعد بعيد عليا
اسيل: خلاص اهدي انتي تو وبكره احكي لحسام يحكيلا
انا: نجك ليا خطرتيها عليا تاريتا سامو جا
اسيل : ابسط ياعم صديقك جاكي
انا: والله بجد فرحت ونقول في حاجه امفرحتني
اسيل: هي صاح انتي اخت حسام في رضاعه بس خاطري نعرف السر الي مخليكم صحبا بطريقه هذي ليش مايعملش فيا انا وموده بالجو هذا
انا: ماهو هذا السر ان انتن خوات بالدم يعني مهما كان ايتحشم يحكيلكن ويزلط منكن
لكن انا الي مخلتني تفرق اني نفهم فيه وجونا فري مع بعضنا يعني كأني مش اختا يقدر يحكيلي ويفضفض بدون مايزلط يعني عادي
اسيل: مافهمتش شي من الفترشه هذي كلها
انا: مش لازم اصلا الكلام هذا اكبر منك ياحبي
اسيل: هههههههه خزيه حيوانه
انا: لان نعرفك
وغيرت انا واسيل وقعدنا نهدرزو في سرايرنا ع الحال والاحوال لعند مانعسنا ورقدنا
اسيل: أوني أوني
انا: نعم
اسيل: هيا نوضي ساعه9 بيش ننزلو نفطرو البوفيه ساعه11 يسكر
انا: هيا اني وعيت
نضت خشيت الحمام توضيت وطلعت صليت الصبح ودرت مكياج خفيف متاع صبح ولبست سروال جينز وسوريه بيضا ع فخذ وايشارب ملون وعليهن شبشب اصبع لونا بودري متاع طلعات ونظارات ونزلت انا واسيل
اسيل: تعال انشوف المرايا هذي تمسحلي في كبدي وقعدنا نتفرجو ع اروحنا وطبعا مايخلش الموضوع من سلفي انا واسيل وقعدنا انصورو لعند ماجانا الاصانصير
نزلنا لوطه للصاله الفطور ولقينا العايلة الكريمه كلها تفطر وشباب مش قاعدين بس ولقيت سامو امسلم عليهم ويهدرز قعمزت جنبا
حسام : شن جو اليوم
انا:ميه ميه
حسام :دووووم ان شاء الله
انا:كنها سمر تبحت هكي
حسام:مش عارف حتي انا حسيت في جو مش تمام
انا: اها مش عارف من دون خواتها لئيمه زي خوتها
حسام:خههههههه بديتي في قرمتك
انا: مانستغنش عليها
حسام: عرفك حتي انا امتعت لوكلوك
انا: باهي ياسامو رايح متغير ومش عجبتك
حسام: معقوله ماتعجبينيش والله لا تهيالك بس
انا: به صدقتك
حسام: قتلك تو نكملو فطورنا وننزلو للحوض سباحه انكسدو فيه ونشوف الجو نهدرزو عندي موضوع نبي نحكيلك فيه
انا: حي معناها صبي توا
حسام :ههههههه لا اهدي بس تو
انا: كنك قاعدات بارد شكلك من كثرة ماعشرت الاجانب قعد عندك برود
حسام: وشن درتي بيها عصبيت الليبين
انا: تغلطش في ليبيا
حسام: يانا عليا ع اساس غلطت في امك
انا: اكيد لان هذا وطني وندافع عليه
حسام: اوكي ياعمر المختار
انا : خهههههه
وقعدنا نهدرزو انا حسام وعمامي والبنات
اسيل: اوني قتلك
انا: نعم
اسيل: ننقنك انعدو بعدين نشرو شفره انا رايفت ع رياض
انا: ع اساس ماتكلميش فيه بالنت
اسيل: ماهو هو النت متاعا رصيده كمل ماكلمتش بكل
انا: وكانا مايعبيهش
اسيل: والله صاح الحمد الله انتي معايا وقلتيها ليا كان ماهذا مش عارف شن حنديرو بدونك
انا: خههههههه مسمطك
اسيل: مانرجوش فيك ياحنه تقوليها لنا يبي يعبيه غير العقد رايح منا وقصتا قصه
انا: باهي خلاص تو نمشو ونشرو غير بلاش جلاطا
حسام: هيا يا بنات ننزلو لوطا
انا واسيل وهبه : هيا
ونزلنا لوطه البنات قعدن يهدرزن مع بعضهن وانا وحسام نحكو مع بعضنا
انا: شنووو ياسامو الموضوع
حسام: انا تعرفت ع بنت ليبيه غادي وحتي هي تقرا
انا: به تمام شن اسمها وكم عمرها نبي تفاصيل
حسام : بشويه شويه نحكيلك كل شي فكيني من استعجالك
انا : امبه خلاص هديت
حسام: ياستي اسمها رغد مواليد94 وجايا هي وهلها لان باتها يحضر في دراسات هو وامها وباتها دكتور وعندها خو واحد بس
ونقولك من الاخير طرف مش عادي ومحترمه وجوها ليبي يعني مش واخذا عادات الاجانب يعني كأنها عيشا في ليبيا
انا: به تمام يعني خلاص ثبتت عليها
حسام: انقولو ان شاء الله بس تو خليني انكمل لقرايا وبعدها نحكي عليها لهلي
انا: نجك ليا كبرت وقعدت تبي تخطب
حسام: اوكي يا عمتي ماشيه حسستيني انك كبيره
انا: هههههههههههه
وهدرزنا هكي شويه وركبنا للفندق واتفقنا نمشو للمول ونشرو شفرات وكانت ساعه 3 الظهر
عدينا المول وشرينا شفرات ونحنا في محل الشفرات طلبو مني الجواز وانا ماكنش امعيا قلت للحسام والبنات يراجني انجيبا وانجي
عديت للفندق انجيب في جواز وانا نبي نركب مع الاصانصير
الشاب : معليش لو سمحتي ممكن
.
.
.
#يتبع
