قصص عراقية حقيقية بقلم ابو بغداد سائق التكسي

مصيبة

قبل اربع سنين من تاريخ اليوم جنت عازب … عايش أني و والدتي ببيت بمنطقة من مناطق بغداد … عايش بدون علاقات هواي .. علاقاتي تنعد على الاصابع بالناس .. عندي صديقين مقربين مني .. و أقربائي اشوفهم من مناسبة لمناسبة … عندي وظيفة تدخلي راتب زين .. وشريك بمحل ملابس نسائية .. علاقتي وي الجنس الثاني جانت محدودة .. بسبب علاقة دامت اكثر من ٥ سنوات و انتهت بالفشل .. الفشل جان بسبب اهل البنية مو مني و تحديدا (ام البنيه) .. لأن أهل البنية بذاك الوكت جانو يريدون قسمة احسن مني لبنتهم (وهالشي من حقهم) لأن جان وضعي المادي ميئوس منه ..
و البنية تختلف عن الولد بسالفة الزواج .. الولد يتاخر عادي بس البنية اذا شوية تتاخر  وعمرها يكبر وضعها و حظوظها بالزواج تقل .. لذلك أم البنية الي هي تعرف كلشي عن علاقتي بالبنية خربت الاول والتالي و راحت البنية تزوجت واحد من معارف جوارينهم وضعه المادي كلش زين .. عالعموم بالتوفيق و اني بوقتها صح تأذيت لان جنت ببداية عمري و هي أول حب بحياتي بس بداخلي لأن احبها كيفتلها و كلت خلص خلي تعيش مرتاحة .. مشت السنين بيا و عفت سالفة الزواج على صفحى لحد قبل أربع سنوات .. وضعي المادي تعدل و أكدر اتزوج .. بس بيني و بين نفسي كلت هسه مو مال علاقة و حبيات وهالخرط .. خلي اتزوج بسرعة و هاي هي .. اكو بنية موظفة وياي بالدائرة .. بيني و بينها سلام و مرات نسولف سوى بس نسولف روس اقلام .. يعني مواضيعنا كلش قليلة و أغلبها عن وضع سياسي لو اقتصادي لو وضع عام .. البنية شكلها حلو و مرتبة و مبينه بنت اوادم .. طبعا هي ممتزوجة .. أني كلت مدام هاي البنية كبال عيني خلي اجمع معلومات عنها و بلكي تصير من قسمتي .. لان البنية مناقصها شي .. كمت اجمع معلومات بس من جوى لجوى .. و عرفت وين ساكنه عن طريق ابو الخط الي ياخذ الموظفين الي اصلا تجمعني بي علاقة طيبة .. اني اروح بسيارتي الشخصية للدوام يعني ما اروح وي الموظفين .. اني جنت اكدر اسأل الموظفين بس ابو الخط عندي شوية ميانه وياه بسبب شغلات بيني و بينه .. يعني ساعدته بموضوع و صار صديق .. عرفت وين تسكن بالضبط .. حظي جان زين بسالفة منطقتها .. عندي صديق من أيام الكلية بنفس منطقتهم ساكن و قديم كلش بالمنطقة .. و طبعا هو عنده معارف هواي بالمنطقة لأن والده جان دلال و هو هسه صار دلال .. مريتله و هو كيف من شافني و عباله اريد اتحول لمنطقتهم (بحكم شغله يعني) عباله اريد اشتري بيت يمهم .. كلتله خويه الشغلة بعيده كلش .. كالي اامرني .. كلتله اريد اتزوج … هو ضحك كال هسه يله قررت .. كلتله اي … كال وجايني اشوفلك مره ابن الاوادم شنو قابل اني خطابه ..
ضحكنا اني وياه كلتله لا خوية .. بس هي تسكن هنا .. كال من عيوني بس كلي وين كاعدين بالضبط و منو ابوها لو اخوتها واني خادم تدلل .. و انطيني يومين اني اتصل بيك و هسه كوم اني وياك نتعشى عازمك ببيتي .. كتله والله ماكدر خوية و بالكوه تملصت منه و رجعت للبيت .. وراها باربع ايام تقريبا خابرني و كالي البنية اهلها ناس كلش محترمين و ابوها موظف بفلان مكان و امها ربة بيت و عدها اخت وحدة بعد صغيرة بالمتوسطة و الناس ما عليهم شي بالمنطقة .. تشكرت منه و قررت ادزلها موظفة جبيرة بالعمر عدنا و كلش معروفة بالدائرة و الكل بالدوام يحترمها و يقدرها .. رحت لهل الموظفة و حاجيتها و كلتلها انتي بالبداية اخذي رأيها اذا عدها قبول حتى اروح لبيتهم اني وامي .. وراحت الموظفة و رجعتلي خبر انو البنيه ماعدها مانع … .. اخذت امي و مشت الامور عادية جدا .. و حجيت وي البنية بشكل رسمي و شرحتلها وضعي انو اني قبل دخلت بعلاقة وحدة بحياتي و فشلت وهي هم كالت اني بحياتي مصاير عندي اي علاقة  .. و صار قبول من اهل البنية و تزوجتنا قبل اربع سنوات من تاريخ اليوم .. زواجي جان طبيعي جدا و عايشين على حب الله … البنية جدا مطيعة بالبيت و مداريه أمي كلش .. ورى سنه من تاريخ زواجنا الله رزقني ببنيه .. و بعد ما جتني البنيه قررت انو زوجتي تكعد من الدوام وهي اصلا هم رادت هالشي .. و طبعا احنا ممحتاجين شي .. المهم حياتي كلها ماشيه طبيعي كلش .. الى قبل فترة .. اني عندي حساب فيس بوك حالي حال العالم .. و زوجتي هم عدها حساب .. بس احنا مو من النوع الي مدمنين على التصفح .. يعني مرات يومين متتاليه ما افتح غير مرة شغلة نص ساعه .. زوجتي هم مثلي بس هي يعجبها تتابع مسلسلات و افلام ..
المهم .. قبل فترة ضافني اسم مخلي صورة رمزية مال سفينه .. و محجى وياي ولا حرف .. بس دزلي رسائل .. فتحت الرسائل لكيتهم صور زوجتي بس قديمات و ياها ولد بس الولد مغوشين وجهه ببرنامج .. يعني وجه الولد ممبين .. و طبعا زوجتي محجبة من صف ثاني متوسط (حسب قولها)  و الصور وي الولد (المغوش وجه) كلهم بدون حجاب و مبينات الصور مال (حبيب وحبيبته) يعني وحدة من الصور هي مخليه راسها على جتفه .. بس اي خدش للحياء ماكو بالصور .. اني بلحظتها انصدمت وحاولت احجي وي الي دز الصور بس هو من شاف العلامة التطلع اذا واحد شاف الرسالة (صارت اوك يعني اني شفتها) انطاني حظر ..
بعدين دورت من حساب ثاني على الاسم نفسه ملكيته .. انحذف الحساب ..  الصور مو فوتوشوب لان اني عندي خبرة قليلة بهل الموضوع .. الصور اصليات ..
عشت دقايق بذاك اليوم كلش صعبه .. و فكرة توديني و فكرة تجيبني .. ما اعرف شسوي .. كمت افكر ليش كل هالفترة من زواجي لليوم ما دزلي الصور … زين هذا ولد لو بنيه .. زين الوجه ليش مغوش .. زين شكو بعد غير الصور .. زوجتي معقولة جانت تسوي اشياء مو زينه وي هالولد .. و شنو معقولة اكيد مسوية .. فكرة توديني و فكرة تجيبني و كلبي يدك بسرعة و امي فوكاها جبيرة و مريضة .. زين بنتي شلون .. اكوم هسه اكتلها اشبعها كتل .. شسوي يعني اطلكها .. كلت خلي اكوم اواجهها بالصور احسن شي .. صحتها و هي جتني طبيعي .. كلتلها اسألج سوال بس تجاوبيني بصراحة .. كالت شبيك و ضحكت .. كلتلها انتي قبل منتزوج مو كلتي مجان عندج علاقات ابد .. كالت اي  … كلتلها هاج شوفي .. شافت الصور و كعدت رأسا عالكرسي و كمت اني سديت باب الغرفة لان بنتي وامي برى ..
كامت تبجي .. كالت راح احجيلك كلشي .. كلتلها احجي .. كالت ماكو بنية تنسأل بسالفة عندج شي و تكول جان عندي و خصوصا اذا الموضوع يخص ارتباط رسمي .. و هالشي قديم .. و هالشخص مريض نفسيا .. صار بيني و بينه علاقة قبل اكثر من ست سنوات .. بس والله مصار شي من الي براسك .. هو سافر للخارج وراها .. و قبل كم يوم ما عنده شغل وعمل بسبب الوضع هذا مال كورونا و كاعد بالبيت …
كام يدور بالدفاتر العتك و لكى اسمي عالفيس بوك .. كتبلي و عرفته رأسا ..
سويتله حظر … وراها فات من اسم بنية كتبلي على الرسائل الاخرى يعني مضايفني و اني اصلا ما اضيف احد .. فتحت الرسائل لكيته كاتبلي مدام حظرتيني اني اعلمج يا هيج وهيج وهيج انواع الغلط و المسبه …
اني اصلا هالصور عبالي ماسحها لأن منتهيه علاقتي بي صار سنين .. كلتلها زين انتي مو من المتوسطة علساس متحجبة اشو صورج وياه كلها بدون حجاب و بمكان خاص مو عام .. كالت والله هاي الصور ببيت اخته .. اخته زوجها متوفي و جانت مسويه عيدميلاد لأبنها و حلفتني اروح و اصلا هي الي اخذتلنا الصور .. كلتلها بابا جاوبيني عالسوال اني شعليه ببيت اخته ببيت امه (انتي مو محجبة من المتوسطة ليش بالصور نازعه الحجاب) من الاخير كوليلي طبيعة علاقتج جانت ليا درجة واصله وياه .. و صدكي و ثقي بداعة بنتي اذا حجيتي الصدك مراح اسوي شي و ينتهي الموضوع لهنا .. كالت صارت بيناتنا شغلات بس مو الي براسك .. كمت لزمتها من ركبتها والله ردت اخنكها بس بنتي وامي برى .. عفتها و كعدت افكر .. بس امانة الله شوفتني كلشي يعني رسائل الحساب الثاني و الغلط عليها .. شفتها .. و كعدت افكر بيني و بين نفسي .. أني مو ابو مشاكل .. و بحياتي ممتعارك .. زين هسه اذا اروح لأهله للسافل (مكرم القارئ) شنو اكلهم .. اكلهم ابنكم جان مصادق مرتي وعنده صورها .. زين اذا اروح لبيت اهل زوجتي شكلهم .. بنتكم جانت مسويه هيج قبل الزواج و الله ابوها يموت والله العظيم و داعة بنتي ابوها يموت .. لأن الرجال محترم المصيبة اهلها و سمعتهم بالمنطقة كلش زينه .. شسوي ياربي .. من باب كرامتي و الشك الي بداخلي مموتني .. ومن باب هي ام بنتي و امي تحبها و هي تحب امي ومداريتها .. صارلي فترة هسه ما احجي وياها .. و امي حست و كلتلها مشاكل عادية .. وهي تنام هسه بغرفة بنتي و اني انام بغرفتي .. طبعا هي لزمت تلفونها و كسرته وصل وصل .. و متريد بعد لا انترنت ولا تلفون .. و هسه اني عايش بجحيم انوب فوك الظيم هالحظر .. محصور وياها بنفس البيت .. قبل ميصير الحظر جنت اروح للدوام شوية اخلص من التفكير و اخلص من وجودها .. وحاير والله حاير شسوي .. اني هسه احس روحي مختنك ما اعرف شسوي .. هاي قصتي خوية ابو بغداد .. و هذا الي حجيته الك ..
(مصيبه)
انتهى
اخوكم ابو بغداد سايق التكسي
#ابوـبغداد