قصص عراقية حقيقية بقلم ابو بغداد سائق التكسي

كلنا بشر

المهم ..

قبل فترة انعزمت بعرس بدبي ..

عرس ولد اخو مهندس ويانه يشتغل .. بالعرس شفت بنيه حلوة … اني كلت عمري كبر خلي بسرعه اسأل و امشي سالفة زواجي .. و سألت عالبنية كالو لا مخطوبة ولا مرتبطة .. تقدمتلها و اهلها من عرفو اني شنو وضعي بدبي و شنو شغلي قبلو رأسا و هي هم قبلت .. البنية بالبداية جانت حبابه و كمنا نطلع مرات يعني حتى نتعرف اكثر واحد عالثاني و طبعا هالشي ورى مخطبتها رسمي .. و جبت امي من العراق و حتى اخوتي بخطوبتي لأن همه (أهل البنيه) مستقرين بدبي و ميرجعون للعراق .. و صارت القسمة .. البنية طلباتها جانت هواي بس اني ابد مبخلت عليها بشي لان حقها راح تصير زوجتي … بس المصيبة عيوب البشر تظهر بالعشره .. شفت عدهم طبقية مو طبيعية هي و اهلها.. يعني اذا رحنا لمطعم و العامل هندي ماعرف ليش تتغير لهجتها وي العامل .. تباوع عالناس من فوك .. و تتخيل نفسها اميرة و احنا عالبلاط الملكي و الكل جواها خدم .. معجبني هالشي .. و فتحت وياها الموضوع .. كالت انته شبيك شكد معقد همه كلهم خلك عمال شنو انته شسمتني والله نسيت شسمتني هااا انته ناشط مال مهاجرين تكلي .. كلتلها هو اني وانتي مهاجرين هذا مو بلدنه احنا حالنه حال الهندي كلنه جايين نسترزق .. و تعاركت وياي و زعلت و راحت كالت لأمها علمود هندي بجاني .. ليش هو الهندي مو بشر .. طبعا من شفتها تتعامل هيج و تسوي هيج .. صفنت وي نفسي كلت بله اني لو ممكمل دراسة و بعدني بذاك المحل مال كهربائي سيارات ولابس بدلة الشغل و مدهن من ساسي لراسي جان باوعت عليا ؟؟؟؟

مستحيل تباوع على خلقتي .. و كلت حتى ابري ذمتي منها و ما اطلع غلطان خلي اسوي تجربه و اشوف ردة فعلها .. خليت اخوية يصور منطقتنه فديو .. و المحلات و السوق الشعبي .. و رحتلها صالحتها و طلعنه .. كلتلها عندي شغلة مدام راح تصيرين مرتي اريدج وياي بيها .. كالت شنو .. كلتلها اني قررت ورى منتزوج نرجع لبغداد و شوفتها منطقتنه بالفديو و حتى بيتنا .. تكلي انته مخبل اني اروح اكعد هناك .. كلتلها انتي اذا صرتي مرتي وين ما اروح تروحين وياي .. كالت لا حبيبي انته خطبتني هنا و هنا شغلك و اني اهلي ميقبلون اكعد بالعراق .. كلتلها نسيت انتي كنديه .. كالت مو كنديه بس ما ارجع للعراق و اذا تريد انته شوف طريقك واني اشوف طريقي لان انته الظاهر تريدلك خدامة مو زوجة .. كلتلها يعني هاي كلها علمود كلتلج نرجع للعراق نعيش .. ادري شبي العراق متكليلي .. كالت اكلك اني اختنكت من هالموضوع كله و ديني للبيت .. رجعتها للبيت و بنفس اليوم ابوها خابرني كال يابه وليدي السالفة مترهم بعد بيناتكم خلي مثل مدخلنا بوجوه طيبه نطلع بوجوه طيبه .. كلتله صار و فصخت الخطوبة و انتهت علاقتي بيها .. اني بس اريد اعرف .. ليش (بعض الناس) من تصير عدهم فلوس يشوفون الناس كلهم صغار بعينهم .. اني الحمدلله عندي كل شي و وضعي مو زين فوك الزين بعشر مرات .. ما فد يوم جرحت شخص لمجرد هو عامل تنظيف لو عامل بمطعم .. المصيبة هي رايحه حاجية لخوات اصدقائي هنا بدبي تكلهم عافني علمود هندي و حتى الي اعرفهم سألوني .. كلتلهم القصة بما انزلت .. كالو حقك بس اني خايف لا اكون ظلمتها لأن ماريد احد يدعي عليا بداخله .. مثل ما الله وكفلي واهل الخير وكفولي بدعوات أمي .. اريد يبقى هالشي وياي و ما انحسب ظالم .. لان حياتي جانت صعبة و اعرف شنو معنى الظلم .. ابوية انظلم هواي بحياته و الله العظيم مرة ابوية جان يحجي لأمي واني سمعتهم .. يكلها لو مو كوم اللحم الي بركبتي جان ارد الكلمة بمليون كلمة .. كومة ابوية سمع حجي من الي جان يشتغل يمهم و رزايل بس علمودنه جان يسكت .. علمود يعيشنه جان يتحمل ..

الهندي هذا او غيره من الي يشتغلون شغلات بسيطة اشوف بيهم ابوية و اشوف اني نفسي بمكانهم .. الشغل مو عيب .. بس العيب من انته عندك فلوس و تتخيل الناس كلها خدم عندك ..

طبعا ورى هالسالفة اني فترة و رجعت للعراق من صدك .. رجعت و صار عندي شغل ببغداد .. و الحمدلله عايش مرتاح و خطبت بنيه حبابه و هالفترة راح اتزوج .. و اتمنى من الله محد ينظلم لان الظلم صعب .. و اخيرا الهم ارفع غمة هالمرض عن العراق و اهله و عن كل العالم و شافي كل مريض يارب .. و اتمنى الخير للجميع ..

(كلنا بشر)

انتهى

اخوكم ابو بغداد سايق التكسي

#ابوـبغداد