قصص عراقية حقيقية بقلم ابو بغداد سائق التكسي

كلنا بشر

لكيت هوسة و انصدمت بلي صار … و افترت حياتي كلها ١٨٠ درجة اني صرت ابو البيت بعد وفاة ابوية .. امي و اخوتي بركبتي صارو .. و قررت ابطل نهائيا بس هالرجال ما خلاني .. و هالمرة مو بس هو .. حتى اهل المحلات الداير مداير ابوية حاجوني و كالو ابوك جانت امنيته يشوفك فد شي .. و كامو يساعدوني بكلشي و وصلت بيهم المساعدة انو يدزولي اهل السيارات بحجة همه ميعرفون يصلحون سياراتهم و اني اعرف .. وهالشي جذب لان همه اذكى مني بشغلهم بستين الف مرة .. ما اكول اني ماعرف اصلح بالعكس اني مصلح كهربائي كلش زين .. بس مستحيل همه ميعرفون العطلات الي تجيهم .. و بنفس الوقت الرجال الجبير كام ينطيني مبالغ من فترة لفترة يكلي هاي لوالدتك و من ما اقبل يزعل و يكلي اني عمك و اني اسكت و اخذ الفلوس .. و سنه تجر سنه و تخرجت و صرت مهندس .. الرجال الجبير عرفني على ابو شركة كلش معروفة ببغداد .. طلع صديقه كلش و ابو الشركه شغلني وياه .. و المحل مالتنه خليت بي عامل هو لزمه و كام كل اسبوع يحاسبني و كبل الفلوس من ايده لأيد أمي .. ابو الشركه الي اشتغلت وياه جان شغله كلش زين و عنده ارتباطات حتى بدول خارج العراق .. حبني لان شافني فقير و اني من النوع صوتي ميطلع .. يعني مثل ابوية الله يرحمه و يرحم والديكم .. احب اسوي شغلي وبس ما احب ثرثره و هادئ كلش .. و سبحان الله الفلوس كامت تمشي بيدي و تعدلت حالتنه كلش .. بس بقينا بنفس بيتنا الاول الي هو بمنطقة شعبيه بسيطه كلش .. بس عدلت البيت يعني رتبته .. كبرته .. تقريبا بنيته من اول .. و صار عندي سيارة جوايه .. بس بعدني على حطتي .. بسيط وهالشي لا عيب ولا حرام .. اني ما اعرف اتعالى على غيري و اذا اشوف بنص الشارع سياره عطلانه مال رجال جبير كبل اطبك سيارتي و انزل اساعده حتى لو اعرف راح اشبع دهن و هدومي تتوصخ .. ما استنكف ابد ..

و بليله ويوم ابو الشركة كالي احنا راح يصير عدنا شغل بعمان و قطر .. الك نيه تسافر و هناك تلزملي شغل .. كلتله ما اعرف والله بس خلي اخذ رأي اهلي .. كال براحتك .. هو من الثقه الزايده بيا طلب مني هالشي .. و رجعت للبيت حجيت هالحجي …. اخوتي طبعا كبرو و يكدرون همه يصيرون بمكاني و همه هم طلاب كليات ثنينهم .. يعني ميحتاجون شي واني هم كلت احوللهم و بنفس الوقت فلوس المحل و نعيش .. اخويه بوقتها جان مخلي عينه على محل بمنطقتنه يريد يفتحه حلاقه .. مع العلم هو مو حلاق بس يجيب اصدقاءه ثنين حلاقين يشغلهم .. كلت مدام السالفة بيها سفر خلي اخذله المحل بسرعه و اكمله حتى هم مصدر رزق يفوتلهم كل شي يصير .. و اخذت المحل بسرعه و هو كام يرتبه بس اني اساعده بالفلوس يعني .. و أمنت على اهلي و سافرت .. اول مرة صادفتني عراقيل بالسفر لأن جواز و هالسوالف بس ابو الشركة بأتصالاته حل كل الموضوع .. دخلت لعمان و رحت التحقت بشغلي هناك .. أسست علاقات حلوة و كمت اتشعب بهل العالم الجديد .. و طبعا كل هالحجي واني اتصل بين فترة و فترة بالرجال صديق ابوية الي هو دخلني بهل الشي و خلاني حتى اكمل دراستي و حتى اهل المحلات الداير مداير محل ابوية الله يرحمه اتواصل وياهم و همه هم يتواصلون وياي .. و سنه تجر سنه و اني اروح و ارجع للعراق و بعدين صار عندي شغل حتى بقطر .. و رحت لقطر .. الدنيا ضحكتلي و ضحكت لأهلي …. اخوتي تزوجو و امكانيتهم تحسنت .. بس اني بقيت ممتزوج .. و طبعا الرجال الي ساعدني مع الاسف توفى الف رحمه و نور تنزل على روحه .. الرجال جان ارمني عراقي .. اسمه هوسيب و علمود هالشي جنت ما اعرف اكول اسمه و مينحفظ اسمه .. بس بقت علاقتي بأولاده لهذا اليوم .. الرجال هذا و اهل المحلات عمو علي ابو مازن و عمو ناهض ابو محمد همه سبب كل الي اني صرت بي .. و كفولي بحياتي و من وراهم اني بهل الخير الي هسه بي .. اشكرهم و كلمة شكر مراح توفي وكفتهم وياي و وي اهلي .. و علاقتي لليوم بيهم الحمدلله ..