رواية : ملك فقيد الحب لنور زيزو

الفصل (21)

#ملك_فقيد_الحب
              ____ الفصل الواحد والعشرون ( 21 ) ____
                      ___ بعنــــوان " تغييـــــر " ___

دلفت "نبض" إلى غرفة "صباح" وهى تحمل صنية طعام وتقول :-
- طنط أنا جهزتلك .....

لم تكمل حديثها حين رأت "صباح" على الأرض فاقدة للوعى ، وضعت الصنية على الطاولة وأسرعت لها وهى تنادى على "يوسف" بهلع .. دلف للغرفة فرأها تجلس على الأرض تحاول أفاقة والدته ، نقلها للفراش وهو ينظر لملامحها الحزينة ووجهها الشاحب بينما "نبض" تفحصها فسألها :-
- مالها يا نبض !!

- صدمة عصبية .. مستحملتش الفراق .. عمومًا أنا اديتها حقنة والصبح هتكون كويسة
قالتها وهى تقف ، سألتها "سارة" بهدوء وهى على وشك البكاء :-
- ماما هتكون كويسة صح ...

- اه متقلقيش يا سارة هى محتاجة ترتاح
قالتها "نبض" بهدوء ، جلست "سارة" بجوار والدتها وقالت :-
- أنا هنام جنبها مش هسيبها

أومأت لها بنعم ثم أخذت زوجها وخرجت من الغرفة ، سألها بجدية وهو يسير معها فى الرواق :-
- نبض !! هى كويسة ؟؟

- كويسة والله يا حبيبى ، الصدمة بس كانت شديدة عليها

دلفا إلى غرفتهما وهو يقول ببرود :-
- أمى ، مدام صباح رئيس مجلس إدارة الشركة أقوى من كدة ، مش لحظة فراق توقعها كدة

جلست بجواره على الفراش وقالت :-
- فراق الحبيب يا يوسف بيكسر ومش أى حد يتحمله ، لو أنا جرالى حاجة هتقدر تتقبل كدة ؟؟

وضع سبابته على شفتيها بخوف وقال :-
- الله يكرمك يا نبض بلاش كلام فى الموت ، ولأنك عارفة أنه بيكسر ليه مُصرة على اللى فى دماغك

- عشان عندى أمل فى ربنا أنه ينجي أنا وهو ، أنا مش مصرة علي الولادة عشان أموت أنا نفسي أعيش معاك العمر كله ، لكن جوايا إحساس أن ربنا هيقف معايا ويكمل فرحتى ولأنه قريب مُجيب بدعيه وبترجاه يكمل فرحتنا بخير ، الجندى اللى بيحرب بيدخل الحرب وهو عارف أن ممكن يموت لكنه بيدخلها وعنده أمل أن ربنا ينصره ويرجعه بخير ، أنا كمان عندى الأمل دا ،، عندى أمل أنى أديك أغلى حاجة فى الحياة ممكن تزرع جوا قلبك الحب والحنية

- برضو بتعاندى !!

تبسمت وهى تمسح على رأسه بحنان وقالت :-
- مسموش عناد أسمه معافرة ، بعافر عشانك وعشانك وعشانك وعشانى فى الأخر ، ربك قال أسعى يا عبد وأنا أسعى معاك .. ادعيلنا بس يا يوسف زى ما أنا بدعيلك تحب

- أحب !!
قالها بتعجب لتقول بجدية :-
‐ يوسف أنت محتاج تحب

نظر لها بتعجب ثم وضع قبلة فى قلب كفها وقال بلطف :‐
‐ ما أنا بحبك يا نبضى

- مش بس أنا اللى محتاج تحبها ،أنت محتاج تدخل الحب قلبك ، محتاج تحب أهلك وتديهم الحب ، محتاج تعرف تحب أصحابك وتقرب منهم .. معتقدش من يوم ما أتجوزتك لاقيتك مرة خارج مع صحابك أو حد بيجيلك ، أنت أقلمت حياتك كلها على الشغل صحابك بقوا المؤظفين عندك ورجال الأعمال اللى بيشاركوا أو بينافسوك ، محتاج تبص للدنيا والحياة من منظور تانى غير الشغل