رواية : ملك فقيد الحب لنور زيزو

الفصل (18)

#ملك_فقيد_الحب
               ___ الفصــــل الثـــامـن عشـــر ( 17 ) ___
                   ____ بعنـــــوان " صفعـــة " ____

أستيقظت "نبض" مع شروق الشمس وهى تمطى جسدها فى الفراش فلمست يدها وجهه لتنظر وتراه جالسًا بجوارها يتأملها ويسند رأسه على ذراعه فقالت بابتسامة ناعسة :-
- صباح الخير يا روحى

- صباح الحُب والسعادة يا نبضي
قالها وهو يسرق منها قبلة ثم تابع :-
- يلا عشان منتأخرش على الطيارة

- اممم حاضر
قالتها وهى تقف من الفراش ، اخذت حمام دافيء ثم أرتدت بنطلون جينز وتيشرت أبيض فوقه جاكيت جلدى وعلى رأسها طاقية من الصوف وحول عنقها وشاح ثم أرتدت حذاء رياضي مُريح لرحلتها ، خرجت من المصعد بصحبته وذهبا للمطار لتلتقى بوالدها و"صباح" فعانقته بشدة لتقول "صباح" :-
- براحة يا نبض متجريش كدة ، أنتِ حامل

- حاضر
قالتها بأبتسامة ومازالت بأحضان والدها وصعد الجميع للطائرة ...

                   ____________________________

                       _____ شقــــــة شبــــرا _____

فتحت "ميادة" الباب ودلفت للشقة لتسمع صوت أبنتها تتحدث مع أحد ، ولجت للصالون وصدمت حين رأت زوجها يجلس مع "ميرا" لتقول بصدمة :-
- أنت أيه اللى جابك هنا ؟ وخرجت من السجن أمتى ؟

- جاي لمراتى وبنتى ولا عاوزانى أسيبكم كدة
قالها بغرور لتصرخ بانفعال قائلة :-
- مراتك أيه إحنا أطلقنا من عشرة سنين ، وبنتك دى تنساها خالص يا عصام ، أنت أيه مبتزهقش من المشاكل مع اللى حواليك

- اسمعى بس يا ميادة ، أنا معايا فلوس كتير أوى وعندى ڤيلا نعيش فيها سوى بدلا من القرف اللى عايشين فيه دا
قالها بجدية ، تأففت بأختناق وهى تقول :-
- مالكش دعوة إحنا مرتاحين بالقرف دا ، أطلع برا بقى والشقة دى تنساها تماما

وقفت "ميرا" بغضب وقالت :-
- أسفة يا ماما ، أنا هروح مع بابا أنا مقدرش أعيش هنا أكتر من كدة

- هتروحى تعيشي بفلوس حرام يا ميرا
سألتها بصدمة لتُجيبها قائلة :-
- كانت حرام بس دلوقت حلال ، الفلوس دى بابا خدها من يوسف ودخل السجن ويوسف أخد كل أملاكى يبقى دا حقى ورجعلى يا ماما

- أنتِ هتحللى كمان على مزاجك
قالتها "ميادة" بغضب ليقول "عصام" :-
- أسمعى الكلام يا ميادة وتعالى عيشى معانا ، أما يوسف دا فأنا مراقبه من ساعة ما حط رجله فى باريس ونهايته قربت وهدفعه تمن كل حاجة عملها فيا وفيكم وفى بنتى

- لا دا أنت ناوى على موتنا بقى ، أنت أيه يا أخى مبتعرفش تعيش من غير مشاكل وحقد على خلق الله ، مكفكش اللى حصل والسنين اللى ضاعت من عمرك فى السجن ، مبتزهقش
صرخت بوجهه بغضب شديد ثم دلفت إلى غرفتها مُشتاطة غضبًا ، دلفت "ميرا" خلفها لتقنعها بالذهاب مع والدها ....