رواية : ملك فقيد الحب لنور زيزو

الفصل (16)

#ملك_فقيد_الحب
                ___ الفصـــل الســـادس عشـــر ( 16 ) ___
                               ••• بعنوان "حالة هدوء" •••

                        ___ بـــــاريــس ___

وصلت السيارة للفندق وترجل "يوسف" أولاً ثم مد يده إليها فوضعت يدها بقبضته وترجلت ثم دلف إلى الداخل وبعد أن أنهى أجراءات دخولهما ، أستدار كى يصعدا فقالت بدلالية وهى تمسك ذراعه بكلتا يديها كطفلة صغيرة :-
- يوسف تعال نخرج نتمشي شوية .. البلد جميل اووى

- مش هترتاحى من السفر شوية
قالها وهو ينظر إلى وجهها الطفولية وبرائتها المُدللة فأجابته ببسمة مُشرقة وتظهر أسنانها :-
- أنا مش تعبانة ، تعال يا يوسف بقى ...

أنهت جملتها وهى تسحبه من ذراعه للخارج ، تأفف بزمجرة من أصرارها وحماسها حين رأت البلد كانت على وشك السقوط نومًا فى الطائرة ، عاد بها إلى السيارة فقالت :-
- هنتمشي شوية بلاش العربية

- متأكدة من القرار دا يا نبض
سألها وهو يبتسم بمكر عليها ، سار بجوارها فى الشوارع وهى تتباطى ذراعيه وفرحتها تظهر بملامحها وهى تنظر لكل شيء بأنبهار وأعجاب طفولى شديد ، ركضت من ذراعه وهى تقف أمام برج أيڤل وتنظر عليه بالأعلى فكاد أن تسقط للخلف ليقف خلفها وهو يحتضن من الخلف ويغلق البلطو الخاص به عليهما معاً فقال :-
- عجبك

- جدًا ... بص حلو أوى أزاى يا يوسف

تبسم عليها وهو يضع رأسه على كتفها وقال :-
- أنا مش عاوز أبص على حاجة غيرك ، خلينى أعترف أنك جميلة يا نبضى من غير عصبية ، جميلة وأنتِ بملامح طفلة وبتتصرفى كأنك طفلة ١٠ سنين

كانت تنظر للبرج وعندما أنهى حديثه أستدارت له وهى بداخل ذراعيه والبلطو كى تنظر له ولمست لحيته بحب وقالت هامسة :-
- بدأت تعترف أنى جميلة ، هل دا يا ترى لأنى جميلة فعلًا ؟ ولا عشان بتحبنى فشايفنى بقلبك

وضع قبلة على أنفها رقيقة وقال بحب :-
- عشان الأتنين ، أقولك سر .. لما شوفتك أول مرة بفستان الفرح كنت واثق أنك مش زى أى واحدة قابلتها وأنك هتشقلبى حياتى ، كنت عارف أنك هتوصلى لمكانة محدش قدر ولا هيقدر يوصلها غيرك ، كانت لأول مرة عينى تشوف واحدة بنت بالجمال اللى شوفتك به وقتها ، كنتِ جميلة لأبعد الحدود وكأنك حورية هبطت على حياتى عشان تكملها ، كنتِ جميلة وقتها ودلوقت أجمل بكتير لدرجة متتوصفش ومش عارف أعبرلك أنا شايفك أزاى غير أنك فى نظرى أجمل من كل الحاجات اللى بتبهرك دلوقت وجمالك غلب جمال كل الطبيعة اللى حواليا وبيخلينى طول ما أنا شايفك بقول سبحانه الخالق على جمالك دا ، بالنسبة ليا الطبيعة اللى بتخطف أى إنسان وتهدأ الروح والعقل موجودة فى عينيكِ الخضراء دى ، أنتِ أجمل من أنك تتوصفى يا نبضة قلبى

دمعت عيناها بسعادة وهى تستمع لحديثه عنه وهو يحاول أن يسرد لها كما هى جميلة بعيناه وأن الجمال كلمة اتسردت وأتوجدت فى اللغة العربية لأجلها هى فقط ، أردفت بحب ونبرة ناعمة :-
- أنا بحمد ربنا أنك كنت نصيبى ومكنش حد تانى ، وبشكر عقلى اللى خلانى اعاند وأصر على حُبك لأن لو مكنتش أصرت على أنك تحبنى كان هيخسر جنتى فى الأرض