اسكربت جديد "انا مش وحشه"
_يابنتي وافقي بدل متعنسي جمبي بشكلك ده
_كفايه بقي كفايه انا تعبت من كلامكم ماله شكلي انا اه مش حلوه بس راضيه عن شكلي
_راضيه ولا مش راضيه مش فارقه معايا لكن العرسان اللي بيجو يتقدمولك مش عاجبهم شكلك فوافقي علي ده اهو عارف شكلك وراضي بيه
_لا مش هوافق كفايه بقي سنين بقعد قدام عرسان وانا عارفه اني مش هعجبهم ومع كل عريس قلبي بيتكسر لما بسمعه بيقول اني وحشه
لو انتوا شايفين اني وحشه في حاجه ترجعلكم لكن انا راضيه عن شكلي ومش هقعد مع عرسان تاني ومش هتنازل تاني ومش هسيب اي حد مهما كان مين يعلق علي شكلي حتي ولو كان حضرتك ياماما عن اذنك انا داخله اوضتي
دخلت اوضتي فضلت كتيير عماله اعيط انا فعلا تعبت منهم كلهم تعبت من شكلي اللي جايبلي ديما الكلام بس والله انا راضيه عنه وعارفه ان ربنا مبيخلقش حد وحش بس بجد تعبت من الكلام اللي بسمعه ومن كل واحد فاضي مش لاقي حاجه يعملها يجي يعلق علي شكلي ويديني في نصايح علشان اوقع العريس رغم اني شكلي مش وحش للدرجادي انا بس عاديه او يمكن اقل من العادي بشويه
انا نسيت اعرفكم بنفسي انا ابقي هاديه بس اسمي مش علي مسمي خالص مليش اي علاقه بالهدوء ومبحبوش اصلا بحس بزهق كده لما يبقي الجو هادي عندي 28 سنه وكلوا شايف ان مينفعش افضل من غير جواز وانا في السن ده واني خلاص داخله علي العنوسه والكلام الاهبل اللي كلنا بنسمعه وبيكسرنا وبيكسر قلوبنا رغم ان الحياه مش هتقف علي راجل بالعكس عادي جدا الحياه بتكمل وبتعدي وممكن اعيش سعيده طول لعمري ومن غير جواز بس طبعا مين يفهم الكلام ده
اللي بيخليني ديما افكر في الجواز كلام ماما وبابا اللي ديما بيتكسر بخاطري وبيكسرني اكتر من كلام اي حد بس اخيرا انا هعترض ومش هقبل اني اتجوز غير بواحد عارف قيمتي كويس اوي يراعي ربنا فيا ويشلني من علي الارض شيل اقل من كده لا علشان انا استاهل كده واستاهل اكتر من كده كمان
اتفاجات بدخول صحبتي وبنت عمتي الاوضه دي بقي الوحيده اللي بتخفف عني وبتاع من روحي المعنوية وتقريبا مشكلتها زي برضو بس هي مش في شكلك هي في حجمها لانها مليانه شويه
_انا جيييت
_نورتي البيت ياختي
_ايه ده مالك يابت في ايه انتي كنتي بتعيطي
_كالعاده يعني كلمتين من مرات خالك وعريس مش مناسب ليا خالص وعايزاني اوافق عليه ال ايه علشان ابعد عن لقب عانس
قعدت جنبي علي السرير او بمعني اصح قعدت عليا فقلت وانا مش قادره اخد نفسي:حرام عليكي في بنادمه هاموت دلوقتي لو مقومتيش اااااااه😂
ضحكت جامد اوي وهي بتعدل نفسها علشان تقعد علي السرير وقالتلي باحراج مصطنع_ معلشي يا دودي ده غلط نظري
ضحكت عليها اوي وقولتلها_غلط نظري كان هيموتني
_فدايا
_فداكي ايه ياهبله هي فردة جزمه دي روحي
_مخلاص بقي الله مكنش غلط نظري ده المهم قوليلي ماله العريس الجديد مش مناسب ليه
_يابنتي ده متجوز اتنين وعايزني ابقي التالته وراجل كبير اصلا دول بيهزروا بقي انا ادوم اصوم وافطر علي راجل اد ابويا بقي ده يصح يانااااااااس
_اهدي ياوحش متزعلش نفسك هما غلطانين
_ايوه طبعا غلطانين الله
المهم بقي بما اني مضايقه وكده متيجي ننزل نضرب طبق كشري من محل هدير
_اشطا يلا بينا
_خلاص هقوم البس هدومي
بس استني خمس دقايق العصر يأذن ونصليه وبعدها ننزل
_اشطا بس قومي البسي لحد مين
_ماشي
قومت لبست ولما العصر اذن صليته انا الحمدلله مبسبش فرض وبلبس فساتين ولابس حجاب بس نفسي اوي بجد البس الخمار بس اهلي مش موافقين بيقولولي هيزيدني وحاشه لكن جنان مختمره رغم رفض اهلها في الاول بس هي فضل تزن لحد ما لبسته ورغم كلام الناس اللي فضلوا يقولها مكبرك وبقيتي شبه الدبه في الفساتين بس هي مش بتفكر في كلام حد هي راضيه عن نفسها ويوم مهتفكر تخس هتخسر علشان نفسها مش علشان حد ودي الجمله اللي ديما بتقولهالي وبالنسبه الخمار فحقيقي انا شايفه انه زادها جمال واحتشام وبجد يعني شكلها بقي احلي بيه ولما بقولها كده بتقولي حتي لو شكلي مش احلي كده كده الخمار ربنا فرضه علينا علشان يخبي جمالنا للي يستاهلنا مش اي حد كده يشوف جمالنا علشان كده حتي لو مش مخليني حلوه انا مبسوطه وانا لبساه بجد حاسه براحه جدا
حقيقي كلامها ديما بيشجعني علشان البسه
المهم نزلنا عند كشري هدير وقعدنا من غير منطلب لانهم عارفين طلبنا احنا تقريبا كل يومين هنا فحفظونا وحفظوا طلبنا واحنا قاعدين لقيت بنوته جميله اوي قاعده قدامي علي التربيزه وعماله تبصلي وتضحك وتستخبي تحت التربيزه وتطلع فجاه علشان تخضني فضلت اضحك معاها من بعيد لبعيد وابعتلها بوسه في الهوا ومش هامنني اي حد حواليا انا بعشق الاطفال جدا وبعد شويه مامتها اخدت بالها فبصتلي بابتسامه جميله وهزت راسها كتحيه ليه واتفاجات ببنتها بتقولها حاجه ولقيت علامة الاعتراض باينه علي وشها لكن في الاخر هزت راسها بالموافقة معرفتش اي وفقت علي ايه غير لما لقيت البنوته الصغيره بتجري عليا وبتحضني وبتقولي _مامي وافقت اقعد معاكي سويه
حضنتها وبوستها وقولتلها_ياروحي انتي ايه العسل ده ياناس بسم الله ما شاء الله
فضلت العب معاها شويه وجنان بتتفرج شويه وبتلعب معاها شويه لحد ما اتفاجئنا بيها بتصرخ وبتنزل من علي رجلي وبتجري ناحيه راجلين وبتترمي في حضنهم ففضلوا يشيلوها ويبوسوها من كلامها عرفت ان واحد فيهم باباها والتاني عمها فقولت خلاص بقي اكيد هتقعد معاهم بصيت لجنان وفضلت اتكلم معاها لحد ما اتفاجئت بمامة البنت جايه ناحيتي وبتقولي_معلشي علي الازعاج بس عايزه اسالك سؤال
_اتفضلي
_انتي متجوزه او مخطوبه
_لا ليه
_اصل اخو جوزي اعجب بيكي وعايز يتقدملك
انا ملقتش كلام اقوله يااه بقي فيه راجل اعجب بيا ده ازاي اتصدمت جامد خصوصا انه شكلهحلو ووسيم جدا كمان وطبعا علشان جنان حاسه بيا فردت بالنيابه عني وعطيتها رقم بابا وقبل ماامشي البنوته جريت عليا حضنتني وباستني في خدي وبعدها مشيت وانا عماله افكر اعجب بيا ازاي ده وفضلت في الحيره دي لحد ما جه اليوم اللي اتفق فيه مع بابا علشان يجي يتقدم وجه هو واخوه ومراته وبنتهم الجميله اللي اول مشافتني جريت عليا حضنتني فشيلتها ودخلت قعدت علي الكرسي بعد ما سلمت علي مامتها وعلي الباقي براسي
وبعد شويه سبونا لوحدنا فلقيت نفسي بقوله_هو انت اتقدمتلي ليه
_يعني ايه ليه عادي اعجبت بيكي فتقدمتلك
هزرت راسي من غير متكلم وبعدها هو فضل يكلمني عن نفسه وانا كلمته عن نفسي وبعد ما خلصنا كلام جه نداهم وقعدنا شويه مع بعض وبعدها كلوا روح فدخلت اوضتي وصليت استخاره وحسيت براحه كبيره اوي فوافقت عليه وصمم هو انه الخطوبه تبقي خطوبه وكتب كتاب وبعد تفكير وافقت وفي مره كنا بنتكلم في الفون فقولتله_هو انت ايه اللي شدك ليا
_ملامحك حسيت فيها براءه شديتني اوي
_انت عارف ان ملامحي اللي عجبتك دي كانت بتخلي اي حد يقول عليا وحشه
_ياحبيبتي مفيش حد وحش بس فيه ناس ربنا خلي جمالهم يعجب شخص واحد بس اللي هيكون جوزها يعني شوفتي هما كانوا بيقولو عليكي وحشه انا بقي شايفك قمر ولو شوفت اي بنت مهما كانت جمالها مش هتعجبني علشان انتي جمالك اللي عجبنى فهماني
_مكنتش فاهمه بس دلوقتي بس فهمت معني الكلام ده فهمت ان ربنا يرزقني بيك علشان انت نصي التاني انت نصيبي وقسمتي اللي ربنا كتبهولي علشان انت بس اللي تستاهل جمالي انا بحبك اوي
_وانا بموت فيكي ياقلبي
_عايزه اقولك حاجه
_قولي
_انا عايزه البس الخمار وعايزاك تقرب من ربنا
_تلبسي الخمار اوك مفيش مشكله
اقرب من ربنا بقي فدي اللي بجد نفسي فيها اوي
_خلاص ايدي علي ايدك وتقرب مع بعض
_اتفقنا ياقرة عيني
_اول حاجه عايزه اقولك عليها انك كان لازم تغض بصرك لما تشوفني
_دي عارفها و علفكره انا بحاول اغضب بصري بجد بس اليوم اللي شوفتك فيه شوفتك بالصدفه مكنش قصدي اركز فيكي بس اعجبت بملامحك فبعتلك هدي علشان تقولك
_تمام
_انتي عارفه ان جبر الخواطر ده حاجه مهمه اوي يا دودي
_فعلاا عارفه ده كويس ان ممكن بكلمه تكسر قلب شخص وممكن برضو بكلمه تخليه فرحان طول اليوم وبيدعيلك علشان جبرت بخاطره
_بالظبط كده وده اللي للاسف ناس كتير اوي مش فاهمينه
_فعلا
يلا روح نام بقي علشان شغلك ومتنساش تقرأ اذكار النوم
_ماشي ياقلبي
_تصبح علي خير
_وانتي من اهلي
قفلت معاه وانا فرحانه ان ربنا رزقني بيه هو فضلت شويه عماله افكر في كلامنا وقلب بيدق جامد وبعدها اتصلت بجنان وقعدنا نهزر ونضحك شويه مع بعض وبعدها قفلت وقرأت اذكار النوم ونمت
عدت الايام عادي لحد ما جه يوم فرحي بس قلبي اتكسر فيه بسبب كلمه خالتي قالتها لما جت تباركلي قالتلي
_مش عارفه ياختي هو عاجبه فيكي ايه وانتي اوحش من الوحشين كده ده هي كلها كام يوم وهيبص برا
مستنتش ردي ومشيت مقدرتش اوقف الدموع اللي نزلت من عيني واللي لاحظها جوزها هشام اللي حضنتها فورا وقالها_اهدي علشان محدش ياخد بااله وفهميني قالتلك ايه الست دي
حكتلها اللي قالته واتفاجأت بيه وهو بيمسح دموعها وبيبوس عيونها بود وبعدها مسك ايديها جامد وراح وقف علي الاستدج ومسك الميك وقال بصوت عالي_بحبككككككككككككككككككككك يامراااااااااتي ياحبيبتي انتي بالنسبالي احلي الحلوين انتي جنتي وملجأي وكل حاجه ليا انتي اللي هتكفيني عن العالم كله ❤
ابتسمت هاديه بسعاده واخدت منه الميك وقالت بدموع_عايزه اقول حاجه مهمه ليكم كلكم بلاش تكسروا قلوب حد بلاش تكسروا خاطر حد بلاش تقولوا كلمه توجع حد صدقوني الدنيا مش دايمه بلاش تبقو سبب ان حد يعيط بسببك اجبروا الخواطر حتي لو ناس متعرفوهاش اجبروا خاطرهم
اجبروا خاطر الناس الغلابه اللي بتشقي علشان انتوا تتهنوا اجبروا خاطر كل حزين وكل مكسور اجبروا الخواااطر علشان جبر الخواطر ثوابه كبير اوي عند ربنا
انتوا عارفين ان الإمام أحمد لم ينسي أبا الهيثم فكان يدعو له في كل صلاة : “اللهم اغفر لأبي الهيثم … اللهم ارحم أبا الهيثم … قال ابن الإمام له : من يكون أبو الهيثم حتى تدعو له في كل صلاة ، قال : رجل لما مُدت يدي إلى العقاب وأُخرجت للسياط إذا أنا بإنسان يجذب ثوبي من ورائي ويقول لي : تعرفني ؟ قلـت : لا . قال أنا أبو الهيثم العيار اللص الطرار ، مكتوب في ديوان أمير المؤمنين أني ضُربت ثمانية عشر ألف سوط بالتفاريق وصبرت في ذلك على طاعة الشيطان لأجل الدنيا فاصبر أنت في طاعة الرحمن لأجل الدين” .مناقب الإمام أحمد/ ابن الجوزي
ومن جبر الخواطر أن رسول الله صلي الله عليه وسلم ما رد سائلا قط بل كان يرشد الصحابة للحل ويدلهم على الطريق ويطيب خاطرهم فقد دخل -عليه الصلاة والسلام- ذات يوم المسجد، فإذا هو برجل من الأنصار يقال له أبو أمامة، فقال :”يا أبا أمامة، مالي أراك جالساً في المسجد في غير وقت الصلاة؟ قال: هموم لزمتني، وديون يا رسول الله، قال: أفلا أعلمك كلاماً إذا أنت قلته أذهب الله -عز وجل- همك، وقضى عنك دينك، قلت: بلى يا رسول الله؟ قال:قل إذا أصبحت، وإذا أمسيت: اللهم إني أعوذ بك من الهم، والحزن، وأعوذ بك من العجز، والكسل، وأعوذ بك من الجبن، والبخل، وأعوذ بك من غلبة الدين، وقهر الرجال، قال أبو أمامة: ففعلت ذلك، فأذهب الله -عز وجل- همي وقضى عني ديني”. سنن أبي داود>
اجبروا الخواطر يانااااااااس علشان جبر خواطر هو اللي ديننا امرنا بيه واللي الرسول صلي الله عليه وسلم كان بيعمله خلوا الرسول قدوتكم و اجبروا الخواطر
بصت بعدها لجوزها وقالت بحب وبصوت عالي_بحبككككككككككككككككككككككككككككك ياجوزي ياللي ديما جابر بخاطري
بحبك ياسندي و ضهري وابويا واخويا يااحلي عوض من ربنا ليا ❤
وبعدها بصت لصاحبها وبنت عمتها واختها وقالتلها_بحبكككككككك يااختي وصحبتي وكل حاجه ليا بحبك يالله كنت ملجأي في عز ضعفي وقهرتي
ابتسمت جنان بدموع وجريت حضنتها وفاقو هما الاتنين علي صوت بيقول في ميك تاني_جناااان انا عايز اتجوزك
بصت جنان بصدمه للراجل اللي وافق قدامها وبيعرض عليها الجواز وهي متعرفوش فمعرفتش تقول ايه فكمل هو كلامه_انا صاحب هشام ومعجب بيكي من يوم الخطوبه بس كنت مستني اشتري الشقه ودلوقتي بقولك تتجوزيني
بصت جنان لصاحبتها وجوزها اللي هزوا راسهم بالموافقة فهزت راسها هي كمان واترسمت علي وشها احلي ابتسامه فقالها_نكتب الكتاب دلوقتي وبعدين بقي يبقي الفرح وقبل متتكلمي اهلك موافقين لاني متفق معاهم من يوم خطوبه وكتب كتاب هشام
هزت راسها بالموافقة وجه الماذون وكتب الكتاب
وبعد شويه بصت جنان لهاديه وقالوا هما الاتنين بصوت عالي _انا مش وحشه
فكل واحده رد عليها جوزها بابتسامه وهو بيحضنها_انتي اجمل بنت في نظري
وبكده خلص االاسكربت يارب يكون فادكم وعرفكم اد ايه جبر الخواطر مهم حتي لو بكلمة شكر لعامل بسيط حتي لو بابتسامه لحد متعرفوش ماشي في الشارع حتي لو بكلمه جميله او ابتسامه لطفله صغيره ❤
جبر الخواطر مش لحد معين جبر الخواطر لازم يكون اسلوب حياتك واسلوبك مع كل الناس اللي تعرفه واللي متعرفوش❤اجبر الخاطر علشان ربنا يجبر بخاطرك❤ وحطي في بالك ياجميله انك جميله مهما كان شكلك او حجمك ❤ربنا هيرزقك باللي يحب شكلك ويشوفك نجمه عاليه في السما ❤متتنازليش عن ده علشان انتي تستاهليه ياجميلة الجميلات❤
متنسوش تدعولي وتدعوا لصحبتي مريم عبد العزيز😘
اللي عايز ينورني في جروبي😍اسمه اجمل الروايات المشوقه مع منة محمد ونور ميسره😍وروايتي الجديده نزلت اقروها واتمني تعجبكم هي بتنزل في كل الجروبات هتلاقوها في الالبومات وهتلاقوها في جروبي وهتلاقوها برضو علي الواتباد😍واسمها طريق القلوب😍
بحبكم في الله ❤
بقلمي/منة محمد (منوووووشه) 😍
أنت تقرأ
اسكربات بقلمي/menna Mohamed
Romanceاسكربات رومانسيه وكوميديه ودراميه هتعجبكم جدا ان شاء الله
