اسكربات بقلمي/menna Mohamed

اسكربت

_لا انا اللي هربيه وهاخد بالي منه
_يابنتي منفعش الراجل احق بيه مننا انتي بتقولي ايه بس
_بقول اللي لازم يتقال ابن اختي هيعيش في حضني وانا اللي هربيه
_وهو ابوه لسه عايش يا مي
_وابوه هيتجوز ياماما وانا مش هسيب ابن اختي يعيش مع مرات اب
_يابنتي مهو ممكن تكون كويسه
_لا لا يعني لا مهو انا مش هتحرم من اختي ومن ابنها كمان
_لا حول ولا قوة الا بالله يابنتي تعبتي قلبي الراجل احق مننا
_لا انا احق انا خالته وانتي جدته وملناش غيره لاكن ابوه هيتجوز وهيبقي عنده عيال تانين
_مهما يكون عنده عيال ده ميخلوش ينسي ابنه ولو نساه ميبقاش اب ابدا
_طيب تعالي نطلعه بره وسبيها علي ربنا يمكن يوافق وتيجي من عنده
_طيب يااخرة صبري قدامي
واخدت ماما وطلعنا لجوز اختي الله يرحمها ماتت من سنه ووجعة قلوبنا عليها ودلوقتي جوز اختي عايز ياخد ابنها ويتجوز انا عارفه ان ده من حقه بس انا مش هستحمل اشوف حد مكانها مش حستحمل حد غيرها هو اللي يربي ابنها وبعدين انا احق بيه انا خالته المهم بعد مسكت الصراع اللي كان جوايا ده اتكلمت وقولتله_بص يا عمر انا مقدره والله انه ابنك ولك حق فيه بس انا كمان ليا حق فيه ده ابن اختي الوحيده انا اولي بيه انا اولي اني اربيه
_انتي بتتكلمي كده وكأنك هتبقي فاضيه لتربيته طول العمر مأنتي مسيرك هتتجوزي
_انا مش هتجوز وحتي لو اتجوزت هو هيبقي معايا
_انتي هبله يابنتي مين الراجل ده اللي يقبل يتجوز واحده بطفل وابوه عايش كمان
_والله معرفش بس لو موفقش يبقي مش عايزه اتجوز
_انتي هبله والله للدرجادي عايزه ادهم يبقي معاكي
_واكتر كمان قولت ايه بقي
_هقول ايه بس انا موافق ياستي خليه عايش عندك وانا هاجي اشوفه يومين في الاسبوع وعلفكره انتي حلتيلي مشكله كبيره
_مشكلة ايه
_مراتي ياستي رغم انها كانت موافقه في الاول علي انها تربي ادهم بس بعد الجواز للاسف غيرت كلامها ومكنتش عارف هعمل ايه
_الحمدلله اني اصريت انا كنت حاسه انه كان هيعيش مع مرات اب مش ام تانيه يلا بقي قوم روح لمراتك
_طب وادهم
_ادهم نام من بدري
_ماشي سلام
_سلام
وبعد ما مشي عمر دخلت اوضتي ونمت جمب ادهم وحضنته وفضلت افكر ليه الناس بقت قاسيه ووحشه اوي كده ده انا والله لو اللي هتجوزه عنده طفل هشيله في عنيا وهعامله زي عيالي بالظبط ده طفل ملهوش ذنب في حاجه ده ملاك برئ لاكن الناس بقت وحشه بجد وقاسيه بجد حمدت ربنا اني اتمسكت بيه كان زمانه ياقلبي عايش مع مرات اب مش ام تانيه مرات الاب بتبقي وحشه اوي لما تكون مرات اب بس لما تكون ام تانيه بتكون جميله وحنينه وفي وسط تفكيري ده نمت صحيت الصبح لقيت ادهم قاعد جمبي وعمال يلعب في رجله بملل وطفوله روحت ضحكت وقومت بوسته وشلته قعدت ازغزغه
_مييييييييي
_قلب مي ياناااس وروح مي يانااااس بعشقه ياخرابي بعشقه السكر ده
ضحك اوي لما سمعني بقول كده وانا بقي حقيقي بتشحن طاقه ايجابيع لما بسمع صوت ضحكته المهم قومت وهو علي ايدي وروحت حضرت الفطار وصحيت ماما وقعدنا نفطر  وفضلت العب مع ادهومي شويه واكله شويه لحد مخلصنا فطار وبعدها دخلت غيرتله البامبرز وقعدت العب معاه كتييير كتيييير اوي وفضلنا نضحك حقيقي بحس نفسي طفله وانا بلعب معاه المهم بقي وعدي سنه كمان وحبيبي انا بقي عنده سنتين واربع شهور وعشر ايام وفي يون كنت لسه راجعه من الشغل انا بشتغل مشرفة باص وكنت لسه داخله من باب الشقه ولقيت
_الحقيني يامي
_في ايه ياماما ادهم كويس
_ده ياحبيبي تعبان اووي وسخن وعنده كحه وانا مش عارفه اعمل ايه
_طيب ياماما لبسيه بسرعه وهاتيه
_ماشي
وبعد دقايق طلعت ماما بادهم فاخدته منها ونزلت جري علي المستشفي ووبعد ما الدكتور كشف عليه وقالي انه عنده نزله معويه بس جامده شويه وعطاه ابره وعطاني الدوا اخدته بقي وطلعنا بره وواحنا رايحين علشان نركب
_مامي بحل
_عايز تقعد علي البحر ياادهومه
_اه مامي
_رغم انك تعبان بس ماشي تعالي نقعد نص ساعه كده ونروح
واخدته وقعدنا علي البحر شويه وبعدها روحنا وعادي الايام عدت من غير اي جديد لحد ملقيت ماما بتبلغني بالعريس الجديد واللي اكيد هيطفش زي غيره المهم بقي المفروض ان عريس الغفله هيجي بليل وماما عملت حملة تنضيف رهيبه تقولو جيلنا الريس مش مجرد عريس بس طبعا مقدرش اتكلم والا هبقي انا اللي عايزه اطفش العرسان
واخيرا عدي النهار المكهرب ده بسبب ماما وتوترها تحسي انها اللي جيلها عريس مش انا لا بقي وانا بارده وعماله العب مع ادهم
المهم جه بقي العريس واهله وطلعت ليهم وسلمترعليهم اهله لذاذ جدا وبعد شويه سبونا لوحدنا
_اخبارك ايه
_تمام الحمدلله وانت
_الحمدلله عندك اساله
_عندي شروط ودي بالنسبالي اهم من الاسئله
_طيب قولي شروطك
_اول شرط وهو ان الشقه تكون قريبه جدا من هنا لاني مش هينفع اسيب امي لوحدها
تاني شرط انك متجيش في يوم وتقولي متروحيش لأمك
تالت شرط وهو انك لو اتجوزتني مش هتتجوزني لوحدي
_ليه هتجوزك انتي وصحابك
_هههههه ظريف اوي حضرتك مش قصدي كده انا قصدي هتتجوزني ومعايا ادهم ابن اختي الله يرحمها وابني اللي انا ربيته وهتعامله كويس وتكون له اب تاني قولت ايه
_موافق جدا جدا اولا انا بحب الاطفال جدا ثانيا بقي ابن اختك في عيوني وهيبقي ابني كمان تمام
_تمام يايحيي
وبعدها قعدنا نتكلم شويه ونسأل بعض الاسئله الطبيعيه واتعرفنا علي بعض وبعدين مشي هو وفضلت انا يومين بفكر وبعدين وافقت وجم تاني وحددو معاد الخطوبه وكانت خطوبه وكتب كتاب وطول الفتره بتاعت الخطوبه كنا بنخرج وبنتفسح وبنتكلم كتير واتقربنا جدا لبعض وحبيته وحتي ادهم حب يحيي جدا وبالتدريج بقي يقوله بابي وعدت ايام وجه معاد الفرح وكان احلي يوم في حياتي لان ربنا عوضني بحد براجل مفيش زيه كتير للاسف راجل فيه كل الصفان اللي تتمناها اي بنت وبجد مكذبش اللي قال ان الراجل الحنين رزق هو فعلا رزق كبير اوي كمان وعدي الوقت وخلص الفرح وتاني يون الفرح علطول كنت قاعده في الصالون وعماله اعيط لحد مسمعت صوته
_مالك في ايه ياحبيبتي
_انا عايزه ادهم يا يودي
_طيب بس بس بطلي عياط علشان خاطري وكده كده مامتك زمنها جايه كلميها وخليها تجيب ادهم معاها
_يعني انت مش هتزعل
_ازعل ايه بس ده هيجي ينور البيت كله
_انا بحبك اووي
_وانا بموت فيكي اوي
_بجد بتموت فيا
_هههه بجد بموت فيكي يلا بقي قومي كلمي مامتك
_حاضر حاضر يااحلي يودي في الدنيا
وقومت جريت وانا فرحانه وكلمت ماما وقولتلها تحيب ادهم علشان واحشني ولما جم فضلت احضن في ادهم وابوسه كتير ولما ماما جت تمشي كانت عايزه تاخده معاها بش انا بصيت ليودي بحزن فلقيته قالها تسيبه ومعرفش ازاي اقنعها المهم انها اقتنعت وسابته معايا وبجد كنت فرحانه اووووي وفضلت احمد ربنا عليه بجد انا محظوظه اوي علشان هو جوزي المهم عدي سنه وانا محملتش استغربت اووي وكلمته في الموضوع ده وروحنا كشفنا احنا الاتنين وللصدمه بقي انه مبيخلفش بعد مخرجنا من عند الدكتور قالي_لو عايزه تطلقي حقك علفكره انتي من حقك تبقي ام
_بس متكملش انا مينفعش اكون ام من طفل مش منك وبعدين انا مش هسيبك الا لما اموت غير كده لا
_ربنا يطولي في عمرك متقوليش كده تاني
_خلاص يبقي انت متجبش سيرة الطلاق تاني
_ايوه بس انتي كده هتتظلمي معايا
_مين قال كده بالعكس انا كده مش هتظلم ولا حاجه وبعدين احنا عندنا ادهم هو ابننا وعوض ربنا لينا ودلوقتي بس عرفت الحكمه من موت اختي ومن موافقة جوز اختي علي انه يعيش معانا واني اربيه
_بحبك اوووي يااجدع زوجه في الدنيا كلها بجد محظوظ انك مراتي
_وانا بعشقكككك اوي وعلفكره بقي انا اللي محظوظه انك جوزي يااحن راجل في الدنيا كلها
الحمدلله مخسرتوش لاني بجد مقدرش اعيش حياتي من غيره وحقيقي اهم حاجه الرضا انا راضيه جدا عن كل ده وراضيه اني مكنش ام وراضيه ان ادهم يبقي هو عوض ربنا لينا عن الطفل اللي كنا هنخلفه وبرضو يودي راضي انه ميكنش اب وراضي ان ادهم يبقي هو ابنه وابني وعلشان احنا كنا راضيين بجد ومن كل قلبنا وبعد سنين كتير ربنا رزقني بطفل وسميته سليم وساعتها بجد اكتملت سعادتنا حقيقي الحمد والرضا اهم حاجه في حياتتنا ودول اكتر حاجات احنا محتاجنها بجد ومش بس في الموضوع ده لا ده في كل حاجه في حياتنا مهما كانت صعوبتها لازم نحمد ربنا عليها ونبقي راضيين من جوانا وواثقين ان ربنا مفيش احن منه وان عوضه ديما بيكون احلي عوض

وكده الاسكربت 8 خلص بتمني يكون عجبكم ومزهقتوش وانتو بتقروه
دمتم سالمين ومتابعين