اسكربات بقلمي/menna Mohamed

اسكربت

_نوووووور يانووووووور
_ايه يابنتي خرمتي ودني انتي بتنادي عليا من عاشر دور منا قاعده جمبك اهو
_اللي واكل عقلك يتهني بيه
سرحانه في ايه ياموزه
_ في احمد يادنيا
_ ماله احمد
_احمد اتغير مع سيف اوي من ساعه ما بقيت حامل وسيف متأثر جدا بمعاملة احمد الوحشه ليه
_طب ليه بقي بيعاملو كده ده كان بيحبه اوي
_مش عارفه بس اكيد علشان بقيت حامل وكذا مره اكلمه واقوله النعمه هتزول من ايدك واللي قادر يديك قادر ياخد منك متفتريش علي الطفل الغلبان ده
وهو يقولي بطلي فلسفه وكفايه اوي اني مستحمله في بيتي وهو مش ابني
_نعم وهو مين بقي اللي لقاه وقال تربوه انتي ولا هو
اقولك علي حاجه يانور ومتزعليش
_قولي يادنيا
_جوزك ده ندل وملوش امان علفكره
قبل متحملي كان بيحب الولد جدا وبيعشقه وبيعامله كأنه ابنه ومدلعه ودلوقتي بعد ما ربنا رزقه بقي بيعامله وحش وبيكرهه
_عندك حق يادنيا وانا بجد تعبت اوي وبتعب اكتر لما سيف يجي يعيط ويقولي بابي بقي بيكرهني
بيوجع قلبي اوي
مش عارفه بجد ازاي احمد قلبه بقي قاسي كده ومبيأثرش فيه دموع سيف
_طب اهدي بس الزعل غلط علي الحمل
اهدي وسبيها علي ربنا
_ونعمه بالله
بقولك صحيح انا هبات معاكي النهارده ها مش قادره اروح
_ايه ياهبله انتي البيت بيتك تباتي فيه زي ماانتي عايزه تعالي ندخل نشوف العيال بقي
_طول عمرك جدعه يادنيا ربنا ميحرمنيش منك ولا من وجودك في حياتي
_ولا يحرمني منك ياقلب دنيا
انا ابقي نور ميسره عندي 28 سنه متحوزه بقالي 7 سنين ولما اتجوزت قعدت 3 سنين من غير حمل وفي يوم جوزي دخل عليا ومعاه بيبي صغير خطف قلبي بجد ببرائته وبجماله اخدته في حضني وبعدين سألت جوزي مين ده فحكالي انه لقاه في الشارع كان بيعيط جامد فأخده وجابه علي هنا
وعرض عليا ساعتها اننا نربيه وانا وافقت ده طبعا بعد مااخدناه وروحنا عملنا محضر واتكفلنا بيه وجه عاش معانا هنا وربيته وكبر قدامي وكان احمد جوزي بيعشقه وبيموت فيه وكان مدلعه علي الاخر واهو دلوقتي بقي عنده 4 سنين وكام شهر لحد مبقي حصل المعجزه وعرفت اني حامل مد وده حصل من حوالي 4 شهور كده كنت حامل في شهرين ودلوقتي انا حامل في السادس ومن ساعتها وهو اتغير خالص من ناحيه سيف وبقي بيزعقله وبيعامله وحش جدا ومهما اقوله واحاول معاه بيسمع من هنا وبيطلع من الناحيه التانيه اما بقي دنيا فدي صاحبتي واختي وكل حاجه في حياتي انا معنديش اخوات ووحيدة بابا وماما وهما ماتو في حادثه من حوالي كده 5 سنين فلما ماتو انا اغمي عليا وودوني المستشفي وكانت دنيا الممرضه اللي مسئوله عن حالتي ومن ساعتها واحنا صحاب وحقيقي وقفت جمبي كتيير انا مقدرش استغني عنها هي كل حاجه في حياتي ودنيا متجوزه من راجل محترم جدا بعزه وبحترمه وبحسه زي اخويا اسمه عماد وعندهم ريان و روڤان ريان عنده 8 سنين وروڤان عندها 5 سنين ودول بقي حته من قلبي زيهم  يوسف بالظبط وبجد هما دول عيلتي وكل اللي ليا في الدنيا واتعودت اروح اقعد عندهم يوم في الاسبوع واحيانا ببات عندهم وهما نفس الكلام بس هما مش بيحبو يجو كتير علشان عماد مبيحبش احمد جوزي فأنا بروحلهم منعا للمشاكل يعني
المهم دخلت لاوضه الاطفال انا ودنيا لقينا ريان بيكتب الواجب بتاعه وروفان بتلعب بعروستها ويوسف قاعد لوحده ومبيعملش حاجه استغربنا اوي يوسف مش طفل هادي نهائي بالعكس مشاغب جدا ومبيقعدش ثانيه واحده علي بعضها ساعتها بس عرفت واتأكدت انا معامله احمد ليه هتعقده بجد المهم شيلت الافكار دي من دماغي وروحت الاول عند ريان قولتله بحنان_رينو حبيبي مش عايز اي مساعده يابطلي
بصلي بحب وبأبتسامه جميله اوي بتفرح قلبي بجد وقالي_تسلميلي يااحلي خالتو في الدنيا
انتي عارفه ان بطلك شاطر ومش بيحتاج مساعده
ابتسمت جامد وحضنته اوي وقعدت ابوسه وهو يضحك هو خلاص اتعود علي كده كل ما بشوفه باكله بوس وقولتله_حبيب قلب خالتو ياناس الشاطر ده
قالي بضحك وحب_بحبك اووي ياخالتو
قولتله وانا ببوسه_وانا بموت فيك ياقلب خالتو
سمعنا صوت دنيا بتقول بضحك_كفايه حب بقي هغير كده
وبعدين تعالي هنا يااستاذ ريان انت ازاي ساكت لخالتك وهي هريتك بوس كده وانا لما اجي ابوسك كتير بتقولي زهقت ياماما كفايه بقي ها اشمعني هي وانا لا
ضحكت جامد وحضنته وسمعته بيقول بضحك_انتي بتغيري يامامتي ولا ايه
وبعدين انتي عارفه خالتو غير دي تعمل اللي هي عايزاه
راحت دنيا قالتله_ياسيدي ياسيدي كل ده ومش عايزني اغير
قولجمبه ا انا بضحك_موتي بغيظك بقي
رينو وروڤي دول حبايب قلب خالتو صح ياروڤي
راحت روڤي قالت_ايووون صح ياخالتو
فدنيا قالتلنا بغيظ_ ربنا يهنيكم ببعض ياختي
حسيت دنيا اتغاظت بجد فروحت جاريه عليها بس براحه طبعا لاني حامل وحضنتها وقولتلها_انتي الاساس برضو يادنيتي هو احنا نقدر نستغني عنك
وروحت مشاوره للعيال اللي هجمو عليها معايا وحضنوها وقالوا كلهم بنفس واحد_انتي الاساس يادودو
ضحكنا كلنا وانبسطنا اوي حقيق انا مبلاقيش نفسي غير مع دنيا وعيالها بجد ده بيبقي احسن وقت في حياتي
المهم بعدها روحت لسيف اللي لاحظت انه مش معانا خالص استغربت بجد للدرجادي بيحب لدرجة انه يبقي مطفي كده لما احمد يبعد عنه قلبي وجعني اوي عليه سيف كان ديما هو اللي بيملي الدنيا علينا بهجة وبيقعد يرخم علي ريان وميخلهوش يذاكر علشان يلعب معاه وياخد عروسه روڤان وبيخليها تجري وراه ولما يجيله مزاج بقي كان بيديهالها احيانا كنت بتخنق من مشاغبته دي وبتعب من قولت بس اللي مبتتسمعش بس دلوقتي بجد بتمني من ربنا يرجع زي الاول ويشاكس الاكل ويتعبني زي ماهو عايز بس ميبقاش ساكت كده ومطفي المهم روحت قعدت جمبه واخدته في حضني وبمجرد ما عملت كده انفجر في العياط وقالي بدموع_مامي هو سيف نوتي صح علشان كده بابي بقي مش بيحبه وبيزعقله كتير
طيب قوليله سيف مش هيبقي نوتي تاني وهيبقي شاطر وهادي وهيسمع الكلام ومش هيضايق حد بس يرجع يحبني تاني
طب انتي عارفه يامامي انا من ساعة مجيت وانا قاعد كده اهو ومضايقتش ريان ولا اخدت عروسة روڤان  حتي هما قالولي تعالي نلعب وانا قولتلهم لا  شوفتي بقي انا بقيت جود بوي اهو قولي لبابي بقي يرجع يحبني ويلعب معايا وميزعقليش تاني
بجد لاول مره ااحسن بوجع القلب ده لدرجة ان دموعي نزل من كلام سيف ياااه للدرجادي بيحب احمد بس احمد ميستاهلش حب ملاك زي سيف بجد رغم انه جوزي بس انا بقيت قرفانه منه اوي ومن عمايله وظلمه
المهم حضنت سيف اكتر وقولتله بدموع وحنان_قلب مامي انت احسن ولد في الدنيا سيف مش نوتي سيف جود بوي وانت عارف بقي ريان وروڤان زعلو انك مضايقتهمش زي كل مره انت عارف انهم بيبقو فرحانين لما بتلعب معاهم وبضايقهم اما بقي بالنسبه لبابي فياروحي بابي بيحبك هو بس مضايق الايام دي علشان عنده مشاكل وبقي عصبي وكلامه من عصبيته وقريب هيهدي ان شاء الله
لقيته بصلي بأمل كده وقالي بسعاده_بجد يامامي يعني بابي بيحب سيف
_طبعا ياقلب مامي بابي بيحب سيفه هو بس مضايق شويه واحنا لازم نستحمله اتفقنا
_ اتفقنا يامامي
_طب يلا بقي قوم ضايق ريان وخد عروسة روڤان
_هوا يامامتي
وفعلا راح رخم عليهم وضايقهم هما كانو فرحانين اوي وقعدو يلعبو ويجرو ورا بعض وبالليل جه عماد وقعدت ارخم عليه شويه وبعدها قعدنا اكلنا ودخلنا نمنا
وتاني يوم روحت علي بيتي وقعدت وسيف دخل اوضته يلعب وبعد شويه جه احمد وشد ايدي وخدني علي اوضة النوم وقالي بهدوء_بصي بقي يانور اخر كلامي
اننا هنودي سيف دار ايتام
ابني مش هيتربي مع ولد مش اخوه
_انت ناسي يااحمد اني روحت لدكتورة رضاعه طبيعيه وعطتني ادويه وحاجات ولبني نزل ورضعت  سيف اكتر من خمس رضاعات مشبعه يعني سيف ابني واخو ابني اللي جاي
راح قالي بكل برود_ابنك انتي مش ابني انا وكفايه اوي 4 سنين ربناه فيهم لاكن انا مش هربي ابن مش ابني ولو مش عجبك عادي هطلقك وخليلك الواد اللي متمسكه بيه ده ولما تولدي حاخد ابني ومش هتشوفيه تاني وده اخر كلام عندي
من كتر قهرتي من كلامه قعدت اعيط واصرخ سمعته هبد الباب ومشي وسمعت سيف عمال يعيط ودخل عليا وهو خايف وحضني وانا بصرخ وبعيط وهو بيصرخ وبيعيط معايا وفجأه لقيت دم بينزل مني روحت صرخت وقولت لسيف_سيف كلم خالتو دنيا بسرعه قولها مامي تعبانه وعايزاكي ضروري وهاتي عماد معاكي ومتخافش ياحبيبي انا هبقي كويسه
وفعلا سيف نفذ كلامي بالحرف ومفيش ربع ساعه ولقيت دنيا عندي ولما لقتني بنزف ومن كتر النزيف اغمي عليا اخدوني علي المستشفي وللاسف الطفل نزل ميت من بطني وخسرت ابني ولما فوقت قعدت اعيط واصرخ بس دنيا اخدتني في حضنها وقعدت تهديني وتقولي ان ده اختبار من ربنا ليا وطبعا سيف كان معاهم وبيعيط جامد فخليتها تطلعه علي السرير واخدته في حضني وقعدت اهديه لحد منام وبعد شويه لقيت احمد دخل عليا روحت نديت علي دنيا وقولتلها تاخد سيف وتسبنا لوحدنا اترددت في الاول بس نفذت كلامي وطلعت بره
روحت قولتله ارتاحت كده يااحمد انا قولتلك قبل كده الظلم وحش وقولتلك ربنا اللي عطاك الطفل اللي في بطني ده قادر ياخده منك تاني بلاش تظلم احنا ربنا رزقنا بالطفل ده بسبب اللي بنعمله مع سيف وانت ولا كلمه من دول جابت مفعول معاك واهو ابني مات بسبب طمعك وانانيتك بس اقولك انا مش هشيلك الذنب دي ارادة ربنا برضو بس من اللحظه دي انا مش عايزه اشوفك تاني وورقة طلاقي توصلي بكره
وفجأه انهارت وقعدت اصرخ واصوت واقول طلعوه بره وفعلا طلع بره وعدت ايام كتير حاول معايا فيهم بس انا كنت خلاص صممت علي اللي في دماغي اصل راجل زي ده ميتعاشرش تاني ابدا وميضمنش فخليت عماد يخليه يطلقني وفعلا طلقني ومعداش كام شهر ولقيته اتجوز ساعتها بجد اتأكدت من ان ربنا نجاني منه ونجي ابني اللي مات من ان يبقي ليه اب زي ده اما سيف بقي احيانا بيسأل عليه بش بقيت بقوله انه سافر بعيد ومش هيرجع قعد ايام زعلان بس قدرنا نخليه يتعود علي عدم وجوده خصوصا مع وجود عماد اللي حنين عليه جدا وكمان مع وجود ريان و روڤان لاني طول الكام شهر دول كنت قاعده معاهم لحد مقولت لعماد يدورلي علي شقه تبقي جمبه اوي وفعلا لقالي شقه في العمار الدور اللي فوقيهم علطول وبقيت عايشه معاهم يدوبك بطلع شقتي علي النوم واحيانا بنام عندهم واحيانا العكس كلنا بنبقي فوق وعدت سنتين علينا وسيف بقي عنده 6 سنين وكام شهر كده وحقيقي االحمدلله راضيين جدا جدا عن عيشتنا وحياتنا ووجود دنيا وجوزها وعيالها في حياتنا بجد هو اللي مفرحنا ومنور حياتنا
وطبعا انا نزلت اشتغلت موظفة استقبال في مستشفي خاص وفي يوم عماد فجأني بعريس جاي يتقدملي بصراحه رفضت انا شايفه اني كده اخدت نصيبي ومش حمل وجع قلب تاني انا كفايه عليا سيف وبس
لاكن عماد ودنيا مسبونيش وفضلو يقنعوني حتي سيف كان موافق وقالي شوفيه الاول يامامي مش يمكن يبقي عمو كويس وطيب بصراحه مع الحاحهم كلهم وافقت وجه يوسف عوض ربنا التالت ليا بعد سيف ودنيا وجوزها وعيالها
جه وقدنا كلنا مع بعض نتكلم وبعدها كلهم سبونا لوحدنا فأنا فضلت باصه في الارض قلقيته قالي_علفكره بقي انا قاعد جمبك مش في الارض
لو فيه حاجه واقعه مني قوليلي يعني
ضحكت وقولتله_لا مفيش
قالي _عندك اي اسأله
قولتله_عندي طلب واحد وبس
قالي_طيب قوليله
روحت اخده نفس وقولتله_انا تعبت في حياتي كتير فلو جاي تضيف وجع زياده علي قلبي ارجوك بلاش ولو مش هتقدر تعامل سيف كويس يبقي برضو كلام
ابتسم وقالي_وعد مني من اول يوم هتتجوزيني فيه مش هتشوفي في حياتك غير كل فرح وهنا وسعاده وسيف ابني قبل ميكون ابنك
وقعدنا نتكلم شويه وبعدها مشي قعدت افكر وبعدها قولت لنفسي انا جربت جواز الحب ومخدتش من وراه غير وجع القلب اجرب جواز الصلونات مش يمكن اخد من وراه السعاده
وفعلا وافقت واتجوزنا وبجد هو وفي بوعده عليا وحقيقي من يوم متجوزنا مشوفتش غير السعاده والفرح وبس حتي سيف بقي بيعشق يوسف بجنون ومبيزعلوش ابدا حتي بقي بيقولوه يابابي وبقي شايفه مثله الاعلي رغم كل ده احيانا سيف بيحن لأحمد وبيقولي انه وحشه ساعتها بخليه يدعيله ان ربنا يفرحه واحيانا بوريله صوره علي النت وطبعا كل ده تحت علم يوسف اللي مقدر جدا حب سيف له رغم كل اللي عمله لدرجة ان يوسف كلم احمد علشان يشوف سيف بس كعادة احمد اللي لسه متغيرش رفض بس طبعا كل ده سيف ميعرفوش مش عايزه اخلي صورة احمد وحشه في نظره فمبتكلمش ومع الوقت قولت لسيف ان احمد مسافرش واني قولتله كده بس علشان ميزعلش بس احمد اتجوز واني معرفش اتحوز فين ولا عايش فين مع الوقت سيف تقبل الحقيقه دي ووحود يوسف بقي اهم حاجه في حياته وحياتي طبعا اصل ازاي بعد كل ده محبوش ده عمل كل حاجه تفرحني في الدنيا بجد حبي لأحمد ده مكنش حب ده كان وهم لاكن حبي ليوسف هو الحب الحقيقي
وكمان بقي يوسف اشتري الشقه اللي فوق دنيا وعشنا فيها علشان هو عارف اني مقدرش ابعد عن دنيا وبقينا ديما مع بعض ويوسف صاحب عماد جدا وبقو ااخوا وده زود من قربنا لبعض ووجودنا مع بعض اكتر واكتر
وجبت انا ويوسف حنين وعشق وكان سيف هو راجلهم وكل حاجه ليهم وكان حنين عليهم لدرجه متتوصفش بجد لدرجة انهم مكنوش بيسمعو كلام حد غيره وده مفرح يوسف جدا جدا وحقيقي مفرحني انا كمان جدا جدا
وبجد اقتنعت ان مش ديما جواز الصلونات بيفشل احيانا كتير بينجح وبيبقي فيه حب وبرضو جواز الحب مش شرط انه ديما ينجح احيانا بينجح واحيانا بيفشل الرك مش علي طريقة الجواز لا الرك علي الاختيار انك تختاري راجل بجد يصونك ويحبك ويبقي كل همه يفرحك وبس هو ده الراجل اللي بجد

وبكده خلص الاسكربت مستنيه رأيكم فيه ويااارب يكون عجبكم