لالة فيقي الالة.. راه وصلنا.. فقت بعدما كنت مربعة يديا ومكمشة ومسندة راسي للزاج ديال الكار.. فقت على الكريسون كيفيقني.. شفت لقيت الكار خاوي مافيه حتى شي واحد.. معرفتش كيفاش حتى نعست.. نضت نخرج وانا معارفاش فين وصلنا بالضبط.. كان ظلام الحال.. بقبت كنتمشى فالمحطة جاني البرد.. شي كيبيع الديطاي شي كيقطع الوراق.. شي كيبيع كلينيكس.. شي كيسعى .. شي كيجري يلحق على الكار..شي حمق.. شي ناعس فالارض.. بزاف دالمشاهد هما،. تمشيت وانا حاضنة صاكي.. خرجت من المحطة بانلي كيشي قريب.. تفكرت انه خاصني نتيري الفلوس.. مشيت تيريتهم.. ورجعت للمحطة.. جلست فواحد الكرسي وتخشيت فراسي.. كل واحد دايها فراسو .. انا غريبة على هاد المدينة وعمري خرجت من مدينتي.. معرفتش اش كيستناني واش غانتقتل هنا ولا غانولي بحالهم كنسعى..جلست شي ساعتين والليل كيزيد يبرد فيه الجو.. جبدت شال من صاكي درتو على ظهري وبقيت كنتأمل.. انا سمحت فدارنا وفإيهاب.. كان خاصني ندير هادشي شحال هادي.. ولكن خاطري كان كيقول لا.. على قبل عائلتي .. وعلى قبل شيماء.. واش دابا غايحبسني ايهاب حيت مغنرجعش ليه.. خليه يحبس.. مكيهمش.. دابا خسرت كلشي.. بردت حيت حطيت من على ظهري جبل.. اللي هو الخوف من الفظيحة.. دابا صافي تفضحت واللي وقع وقع.. لاول مرة فحياتي كنضرب الدنيا بركلة.. ومكتهمني حتى حاجة.. تنفست بهدوء .. وجلست..كان الظلام بزاف والناس مبقاوش.. كتبانلي مرا كتنوض من بلاصتها .. معرفتش علاش طولت النظر فيها.. شوية فقدات التوازن ديالها.. وبقات كتشد راسها باش مطيحش ولكن توازنها قل وبدات كتحاول تشد فأي حاجة قدامة وطاحت فالارض.. قلبي ضرني عليها ومقدرش نخليها هكاك .. نضت بسرعة لعندها وشديتها .. اكرام: لالة مالك.. واش نتي لاباس.. لالة.. مكانتش قادرة تهضر.. قلبي مهنانيش.. كيفاش مرا كبيرة هاكا يخليوها ولادها بوحدها هاكا.. انا كنت حدا مي باغا غير رضاها.. وهي كانت كتقمعني وتبعدني عليها.. جريت جبدت قرعة الما كانت عندي وبديت نرش عليها وكنحاول نشربها.. مكانتش كتقدر تحل عينيها.. وحتى الهضرة مكانتش كتقدر عليها .. حليت تلفوني وبديت نصوني للاسعاف.. مكانوش كيجاوبو occupe.. فكرت نصوتي ل 19 جاوبوني.. قلت ليهم باللي لقيت واحد المرة فالمحطة مغيبة وباللي كنتاصل بالاسعاف والو.. قالولي غايصيفطوها حالا.. بقيت كنستنى شوية حتى وقف عليا البوليسي ديال المحطة البوليسي: اش كاين الالة.. اكرام: هاد المرا سخفات هنا.. البوليسي: واش كتعرفيها اكرام: لا .. البوليسي: دابا توصل الاسعاف.. ونتي غاتجي معانا.. الله يا ربي واش اللي يقدم مساعدة فهاد الزمان.. غايوحل فمشاكل.. ما امتنعتش وبقيت مع المرا.. هزيت صاكي ودخلت معاها للامبيلونص ومعانا البوليسي.. وصلنا للسبيطار..دخلوها وبقيت كنستنى.. والصراحة مكنتش خايفة ابدا.. حرج عندنا الطبيب .. الطبيب: واش نتي كتجيلها.. اكرام: لا غا لقيتها طايحة فالمحطة.. البوليسي: مالها ادكتور.. الطبيب: والو غا طايح ليها السكر وطالع شوية الطونسيو.. باينة فيها ماكلاتش النهار كله.. درنا ليها محلول كليكوز وغاتفيق دابا شوية.. لقينا هادي فيدها.. ورقة فيها ابني ورقم التلفون.. الطونسيو: مزيان غادي نتاصلو بيه.. اكرام: ممكن نشوفها.. الطبيب: تفضلي .. دخلت عندها وشفت فيها.. كانت ناعسة شوية حلات عينيها.. المرا: شكون نتي ابنتي.. حسيت بالدموع غاينزلو مني مللي سمعت كلمة بنتي..فحياتي مسمعتها.. حتى امي اللي ولداتني مقالتهاش ليا.. زيرت راسي وهضرت اكرام: انا واحد البنت.. لقيتك طايحة فالمحطة .. وجبتك لهنا.. المرا: قربي مني .. اكرام: هانا اخالتي.. المرا: شنو سميتك اكرام: سميتي اكرام.. المرا: الله يرضي عليك ابنتي.. شديت يدها وبستها شوية تفتح الباب بالجهد ودخل منو واحد الراجل.. مخلوع الرجل: امي.. 😰 باينة ولدها هادا مخلوع عليها.. وكيبوس يدها.. فين كان مللي بقات هي فالمحطة بوحدها.. انا لوكنت بلاصته وعندي ام بحالها نعتكف حداها ومنخليهاش بوحدها.. شوية رد ليها البال باللي كاينة.. الرجل: قالو ليا باللي نتي اللي جبتيها للسبيطار.. اكرام: اه.. الرجل : ممكن نهضرو برا شوية.. اكرام: طبعا.. خرجنا وحط يدو فجيبو.. وجبد فلوس.. وعطاهملي .. الرجل : كنشكرك بزاف على هاد المعروف .. شفت فيه وتأسفت.. واش صحابلي درت هادشي على قبل الفلوس.. اكرام: شكرا.. ولكن ماشي اي واحد كيدير الخير على قبل الفلوس.. تهلا فالواليدة .. وسلم عليها خليته ومشيت.. غانرجع من تاني للمحطة.. معنديش فين نمشي والمدينة مكنعرف فيها حتى واحد..
