ما لم نراه ( روايات ليبية )

حلقة 17🔥 ما قبل النهاية 🔥

ما لا نراه

    / 17 /

خليت السفرة ورجعت لداري .. حتى مافيش رحمة في الموضوع في تفرقة بيني وبين زين ..
مانعرفش شن صار امس ماكنتش نسمع كان كل شي فيا مايبيش يسمع ..
قلت نستنى رحمة تجي وتفهمني ..
واستنيت لعند ماروحت واول ماخشت قالبة وجهها ..
انا:شن صار امس بابا لز زين صح؟
رحمة:اسمعي بردتيها وسببتيلي مشاكل
انا:خيرك شن درتلك؟
رحمة:حبيبك الليل كله يتصل ويخش عليا انتظار وانا نحكي مع علي 😒 وبسببكم تعاركت معاه واحتمال شاك فيا
انا:😨
رحمة:اي اي اضطريت نقفل تليفوني
انا:مارديتيش عليه؟
رحمة:نرد عليه شن نقول؟ بعدين نقولك متعاركة مع خطيبي تقوليلي رديتي 😤
انا:باه شن يبي
رحمة:ماتزوديهاش عليا بروحي مش طايقة روحي وساد لتوا الي صار
انا:باهي نبي نفهم زين قاله ولا شنو
رحمة:*تبدل في حوايجها وماتردش عليا*
انا:لو تبي نكلمه علي ونوضحله
رحمة:ولاش تكلميه ماتجيش جيهته
انا:😨
رحمة:اسمعي راسي مصدع رمش راقدة كويس ومش ناقصاتك ماتنقيش فوق راسي وخليني في همي

قعدت نفكر فيها صح عندها حق مهما كان علي ح يشك ولأمتى بتقعد متحملتني ومتحملة مشاكلي .. بس مالك زعما يكون عرف وفهمه زين هذا ليش متصل ويبي يوصل فيا؟ بس شن الفايدة دامه دخل الشك لعقله معناها بيقعد ديما يشك فيا وهذه البداية بس !
شغلي عقلك يازيزو علاش تظلميه حطي روحك في مكانه تجيك بنت وتوريك محادثات ليه مع وحدة شن بتكون ردّة فعلك ؟ معاش بتشوفي حتى لوجهه ! معذور هو مش بإيده واهو ماتخلاش عليك غير مش عارف يوصل فيك .. ورحمة وسيلته الوحيدة وهي تعبت مننا 😩 وين بنمشي ولمن بنلجأ ومن بنكلم 🤔
خطر في بالي نخنب تليفوني لأن لو ماما الي داساته مش صعب عليا نلقاه نعرف كُل المخابأ بس شن الفايدة مش هذا الّي نبي نصلحه بتقعد هكي الأمور خاشة بعضها لين يولي زين للحوش ..
وكيف بنخلي زين يرجع 🤔 ولا علاش نتعّب روحي هو الي جابها لروحه .. امتى بيتغير ويتعلم يسمع قبل مايضرب .. ويفهم قبل مايكشخ .. ويعطي لروحه وغيره فرصة ..
اي خليه يتربى ومش ح ندير شي وحتى ماما خليها تشوفني انا الغلط وانا سبب المشاكل وماننفعش .. خليها ظالمتني تو يجي يوم وتندم عليا ..

ومافاتتش ساعة ومهانش عليا خوي نخليه برا الحوش .. شغلي عقلك يازيزو وفكري .. فكري .. فكري .. لقيتها 💡

ليا يوم ونص مش واكلة شي .. ومش دايقة النعمة ..
ولو نزيد شوية ح يغمى عليا .. وهككي ولا هكي الدكتور بعد العملية قالي نشرب مية ومانوقفش عليها وانا من امس مش شاربة ونحس في جنبي ينخص .. وبهذا كله قاعدة ماما تشوف فيا انا الغلط .. حتى بعد ماعرفت رزان وراها القصة .. انا غالطة لأن دخلت رزان لحياتي وماسمعتش كلامها لما قتلي معاش نكلمها وعاندت .. وانا غالطة لأن صوّرت مع رزان بتليفونها .. وانا غالطة لأن ماغيرتش الرمز وخليتها اديرلي ايميل .. وانا غالطة لأن ماقلتش متعاركة معاها .. وأنا كلي غلط ..
تعودت وهذا اسلوبها معاي .. وعارفة الي تفكر فيه قبل ماتقوله ..
ولهكي مافيش غير نطيح عليهم ويرفعوني للمستشفى .. ومن بيرفعني 🤔 ماما بتكلم زين لأن بابا مهناش😈 لازم نطيح بطريقة دراماتيكية ونخليهم يخافوا ومايفكروش غير في المستشفى ..
شغلي عقلك يازيزو كيف بإلديريها .. كيف بتخليهم يقتنعو ..
لقيتها💡
توا بتتغدى رحمة وماما .. نوضي يازيزو ديري روحك بتخشي للحمام وطيحي فيه طيحة قوية وخليهم يتجارو 😈
وهذا الي درته طلعت لقيتهم قاعدين مقعمزوش ع السفرة ويهدرزو في الكوجينة .. وليت للدار بش نضمن يشوفوني واصلا نحس في روحي دايخة بجديات ..
سمعت صوت السفرة قلت نستنى شوي لين يقعمزو.. قمت روحي وطلعت بالخطوة ..
خطمت من قدامهم ..