ما لم نراه ( روايات ليبية )

حلقة 6🔥

ما لا نراه

     / 6 /

ومابيتش نروح لحوشنا قلت شكلها بتشد معاه .. فبديت كل مايبو المحل ولا جداي تبي تكنس قدام الحوش نطلع على امل  ..
لعند يوم كنت فيه مكسدة وندور على شي نطير بيه الكساد ..
شغلي عقلك يازيزو .. شغلي عقلك ..
لقيتها💡
والشي هذا كان ان نروح لحوشنا ع اساس نبي حاجات نجيبهم ونقول لرحمة ترفعني معاها للجامعة وكان رفضت نهددها بالصورة الي عندي ..
وهذا الي درته فتلكت روحي وتوكلت طبعا معاش نقدر نطلع بشبشب ولا اي كلام توا سليم ضروري يشوفني متأنتكة 🙆🏻‍♀️

ماشية نتمختر ونمضّغ في المستكة لقيت سيارة زين قدام الباب وااككك تو بيديرلي فيها سين وجيم 😤 جيت بنولي بس نفتح باب الحوش وطلع منه بابا ..

بابا:باهي الي تفكرتي طريق حوشكم
انا:عاد معطلة شن تبيني ندير في الحوش
بابا:بالك تعاوني امك ولا تشوفينا حيين ولا ميتيين
انا:يابابا حوش جداي خطيوة تبوني كلموني
بابا:خشي خشي وانتِ لسانك ملوي على رقبتك
انا:😑😑

خشيت نحيت الوشاح ونغنّي .. وجوي جميل ..وصلت لدارنا لقيت رحمة راقدة هفف بنستناها لين تنوض 😤 مشيت لدار امي ندور فيها ..لقيتها متكية تتفرج ع التلفزيون ..

ماما:واخيرا تفكرتي حوشكم
انا:نفس الإسطوانة ديما
ماما:تي تحشمي تقوليش عليا الا جايبة عزري
انا:تخلي فيا نندم ان جيت
ماما:تي انوضلك راه
انا:نوضي هي نوعدك مانهربش
ماما:اشي الفرخة امشي جيبيلي الشحن من زين تليفوني بيطفى
انا:يووه ريتي ماتقدريش تنوضيلي
ماما:تي امشي *وحذفت عليا مخدّة*

ماشية وندندن ..

🎶
وعيونها ياطيري وتقول فنجان ..فنجان من القهيوة ممتليّة ..
وعيونها ياطيري وتقول فنجان ..فنجان من القهيوة ممتليّة ..
يا عيونك سود وحلوة .. ياعيونك سود حلوة .. ياعيونك .. ياعيونك ..ياا عيوونك
🎶

وخشيت لدار زين وانا قاعدة ندندن دورت على الشحن مالقيتاش جاية بنطلع بس لفت نظري بوكس محطوط جيهة السرير من غادي تكعبشت ووصلتله وشفت شن فيه لقيت ساعة في باكو وبرفان قاعد جديد الباين جاياته هدية وواضحة من بنت وانا يتمرجل عليا .. سمعت صوته رديت البوكس وطلعت نجري مالقيتاش قلت شكله في المربوعة .. بعدين سمعت باب الحمام تسكر عرفته خش ليه .. رجعت ندندن بش نبان طبيعية 😂😂 مع ان الأغنية نكرهها في البداية بس علقت فيا واصلا انا تعاملي مع كل شي في الحياة هكي في البداية نكره بعدين نحب .. فتحت باب المربوعة وقاعدة وعلى نفس المنوال ..

🎶
وسنونها ياطيري وتقول مرجان.. مرجان على اللؤلؤ مختليّة ..
وسنونها ياطيري وتقول مرجان .. مرجان على اللؤلؤ مختليّة ..
يا عيونك سود وحلوة .. ياعيونك سود حلوة .. ياعيونك .. ياعيونك ..ياا عيوونك
🎶