ما لا نراه
/ 18 /
وفقت على صوت ماما جايبتلي سفرة عشاء لعندي .. ياوالله وبندلع عليهم دلعع ..
بعد ماكليت قمت سفرتي وماشية بنكلم بابا على زين .. وكيف بنخش للدار سمعت شي وقفني .. وقعدت نتصنّت 😨👂🏻
ماما:خلاص يلبسو الخواتم توا والعرس بعد التخرج
بابا:يقعد خاطبها اربعة سنوات؟
ماما:هي توا في نهاية الأولى يعني بالكثير ثلاثة سنوات وهو يكون جهّز حوشه قتلي امه ليل نهار فيه القرش الي حصله يحطّه فيه ونريحو راسنا من المشاكل دامه يبيها خلاص انت شفت شن صار والصراحة الراجل صابر عليها
بابا:صغيرة وطايشة من الأول قتلك لا يعطي كلمة ولاشي شن شافت من الدنيا بعدين شايفة ولدك وتصرفاته شن ضمنّي مايكونش زيه
ماما:تي مش سألت عليه وكلهم شكروهولك ومشيت حتى لشغله وبروحك قلتها الكل يشكر فيه وفي تربيته علاش بنرفضوه
بابا:مش عارف قصة إنّ مصاحب زين مخوفتني ولدك طايش ومتهور ومايعرفش يوزن الأمور نزوجهاله بعدين تجيني بصغارها ولا شنو ؟ رحمة وقلنا سنها مناسب حتى لو قاعدة ماتخرجتش وغير هكي هي تقرا لكن زينب خايف الشي هذا يلاهيها على قرايتها وانا ماصدقت بدت تصفي
ماما:اني نقول وقت يلبسها الخاتم تزيد ترزن وتعرف بقيمة الشي هذا وادير ولد الناس بين عيونها وغير هكي معاش خوها يديرلها مشاكل ومن ابسط شي يقلبوها على روسنا اني معاش حمل مشاكل نبي نتريح تعبت
بابا:وولدك امتى ناوي يدير عقل الي انداده بصغارهم
ماما:اسم الله عليه قاعد صغيز
بابا:انتِ تصغري وتكبري على هواك صاحبه باش ياخد بنتك كبير وقد المسؤولية وولدك لا
ماما:تو يعقل هو شوي متهور
بابا:مش شوية هلبا فهميه عقليه كل شي عنده ضرب من وين جايبها ماعمري مديت ايدي عليه
ماما:تو نقوله بس كلمه تربح يرجع للحوش عيب قاعد عند مالك شن بيقولو علينا
بابا:وهذا الي نحكي عليه
ماما:وين تبيه يمشي حرام عليك وانت لزيته في نص الليل
بابا:ماهو من الي يدير فيه هو عادي يدوي مع بنات الناس وهدايا واخته واقفلها
ماما:هو ولد حتى كان يكلم مايعيبه شي لكن خايف على اخته ومايبيش سيرتها تجي على لسان الي مايسووش
بابا:وحتى البنات عندهم خوت ويخافوا عليهم ماهو لو مراعي ربه في بنات الناس را مش شاك في اخته ويفتش وراها وانتِ عقليتك هذه غيريها زي مايعيب البنت يعيب الولد كلامك هذا هو الي مخليه راكب راسه وموصله للي هو فيه لما بيوقف قدام ربه مش ح يقوله لا اني ولد كل حد بيتعاقب على فعلته
ماما:....
معاش سمعت أكثر ونسحبت وانا نفكر في الي سمعته .. زعما ام مالك قالت لماما يبو يركبو الخاتم ولا ماما تبي هكي بش تضمن مانتراجعش في كلامي وخافت نديرها بجديات ونقوله معاش نبيك ؟
بس هي قتلي قالولها بنجوكم ومستحيلة يقولوها حاجة في التليفون موضوع زي هدا يبي زيارة 🤔
غير دقيقة خيرهم ماردوليش تليفوني لتوا ؟
وليت ثاني نكلمهم ع الزوز..
بابا:خشي كيف حالك توا
انا:احسن الحمدلله
بابا:كولي ياسرنا من الرعايش
انا:ان شاء الله بابا بنقولك
بابا:الله يسمعنا أخبار الخير
انا:لا خير خير ياريت تكلم زين ويرجع للحوش
ماما:ايه عيب قعدته عند حوش مالك
بابا:....
انا:كلنا نغلطو وهو اكيد عرف بغلطته ومايهونش عليا يقعد البرا والسبب انا
بابا:يصير خير
انا:لا اوعدني
بابا:قلنا يصير خير
انا:باهي وعد صغيرون
بابا:🤨🤨
انا:خلاص خلاص امتى ناويين تردولي تليفوني
ماما:اونا في القجر وردي بالك أي تصرف فكري فيه وفي نتايجه
انا:ان شاء الله إن شاء الله
ماما:هزي راسك وسايريني ايه
انا:🤭
أنت تقرأ
ما لم نراه ( روايات ليبية )
Romanceيوجد اشياء لا نراها الا بعد فوات الاوان و لكن الخطاء ليس مننا الخطاء ان هذه الاشياء لم تعترف الا بعد ان فقدت الامل ؟ كلام معقد ستفهمه في رواية تجمل اجمل صدف الحب ؟ للكاتبة : ميرا رواية من داخل المجتمع الليبي
