ما لا نراه
/ 10 /
رزان:عبدو تتفكريه
تسنيم:ايه خيره هو ينتسى علقتنا فيه وفتكت
رزان:عالق ياتسنيم بنهج في جرته مكالمات من ارقام ليل نهار وعرفني خشيت هندسة ويقولي بتلقيني كل يوم غادي وكل مانديرله بلوك يطلعلي من مكان
تسنيم:باهي كلميها هي تكلمه
رزان:المشكلة مش اهني
تسنيم:اه امالا
رزان:ماهو زيزو الفترة الي فاتت نخطبت
تسنيم:كككيف😨
رزان:اني كلمتها باهي قتلي جايينهم ناس بيخطبو ومعاش تواصلنا
تسنيم:بالك قصدها على اختها
رزان:لا قالت بيخطبوني
تسنيم:غريبة بوهم مايعطيش لو مش مكملة قرايتها
رزان:هو لا دارت بيان ولا شي
تسنيم:امالا علاش ترعشي فيا وتقولي نخطبت
رزان:نقصد جوها ناس
تسنيم:عادي كلنا يجونا اكيدة مش ح توافق يعني وخلاص
رزان:بس هي الفترة الأخيرة متغيرة هلبا
تسنيم:زعما يكون صاير معاها شي ؟ غبارة تكون مدايرة عملة واماليها بيعطوها بش يفتكو
رزان:لازم نمشولها
تسنيم:عادي ديري يوم وقوليلي
رزان:اوكي ...
قبل عشرة ايام من كلام رزان وتسنيم...
في عز سعادتنا نقولوا في كلام أبعد من إنه يكون واقع .. وأقرب ليه من إنه وهم ..
سعادة وهميّة أو وهم المشاعر .. مش مشاعرنا هي الوهمية لاء .. الكلام الّي يطلع منًا في لحظتها..
مانقدرش نعيش من غيرك ! حياتي متوقفة على حاجتين وجودك والتنفس ! وغيره وغيره
وبعد مانصحو من غيبوبتنا ، نلقوا روحنا عايشين من غيرهم .. مكملين حياتنا ونتنفسوا وناكلوا ونشربوا ..
مكانش الأمر زي ماوصفناه .. صح ممكن أول ماخلونا قعدنا ضايعين من غيرهم .. تايهين فيهم .. عالقين معاهم وفي تفاصيلهم وكل مانقولوا نسيناهم يصير موقف وكأن يقولولنا هما عمرهم مامشو منكم باش تنسوهم .. وكل مانتناسو التفاصيل تقلب صفحات الماضي .. وكل مانقولوا خلاص اليوم وقفنا على رجلينا والي صار وجعنا وقوانا نلقوا روحنا نبذلو في جهد أكثر باش نبانوا طبيعيين .. نستنزفوا كل قوانا والنور الّي بداخلنا يقل بالشوية لين ننطفوا .. نبدوا مطفيين ونبدوا نشوفوا للحياة من منظور ثاني .. يبدا كأنّ كانت في غشاوة على عيوننا ونزالت .. ولاّ كأنّ لبسنا نظّرات وبدينا نشوفوا احسن ..
الّي كنّا نصدقوه يبدا عندنا مجرَد كلام ويفوت.. والي كنا نعتقدوه مشي .. والشّيء الّي كنّا مؤمنين بيه راح ..
وتتغير حياتنا ومع الأيام نبدوا مش عارفين نفسنا ولاّ شن نبّو .. نبدو نستكشفو في نفسنا من جديد وكأن كيف نولدنا .. لكن الفرق نولدنا من رحم معاناة وصلتنا للي احنا فيه ..
كنت كيف كتبت الكلام هذا وخلّيت المذكّرة مفتوحة عليه .. وقعمزت نراجع في افكاري ونرتّب فيهم ..
بحكم شدّيت في قرايتي وبديت أوّل بأول .. صح وقفت قيدي لكن درت زي ماقالتلي رحمة نحضر ونقرا بروحي .. ومافيش حد يندري على الموضوع غيرها ..
ياميرا ماقدرتش نخوض في تفاصيله وهذه أوّل مرّة نحكيه لحد غير رحمة.. أوّل مرة نكتبه ونخليك تسرديه بطريقتك .. هالتجربة كبرتني عشرة سنوات القدام .. طلعت منها وحدة ثانية .. هكّي حسّيت روحي كاابرة ومتغيرة مش زيزو نفسها ..
لا عاد يغريني حد ولا نتلفت لحد أصلا .. ولا الي قالي معجب يفرق عندي ولا يحرك فيا شعرة ..
النت بحد ذاته لو فاتحة فنتصفح وحتى المسجات من البنات مانردش عليهم إلابعد ويين..
انوض ونمشي للجامعة بس مش نفس ماكنت انوض ونمشي قبل .. هكي في شي من داخلي تغير ..
راهو مش واجعني ان خلاني .. ولا واجعني الي صار ..
مش ضاعفة ونبيه .. مش محتاجاته .. مش ناقصني شي ..
بس واجعني ان خذلت روحي .. نضحك عليا بسهولة .. واجعني مشيت بغباء وصدقت ..واجعني ان خدي شي مش حقه .. بديهم من مشاعر وكلام لشدّة ايد هو مش من حقه .. واجعني مادرتش تصرف وضربته كف في اللحظة الي فكر يشد يدي ..
واجعني مابعدتش وقتله معاش تجيني ولا نشوفك ..
وتوا عارفة مش ح نتقبل حد يقرب ناحيتي ..
أنت تقرأ
ما لم نراه ( روايات ليبية )
Romanceيوجد اشياء لا نراها الا بعد فوات الاوان و لكن الخطاء ليس مننا الخطاء ان هذه الاشياء لم تعترف الا بعد ان فقدت الامل ؟ كلام معقد ستفهمه في رواية تجمل اجمل صدف الحب ؟ للكاتبة : ميرا رواية من داخل المجتمع الليبي
