معا نمضي للفردوس

يالا نتوب💖

عملت ذنب عظيم جدًا برغم إني توبت منه، وكل يوم أقول مش هرجع له، وبرجع تاني وأقع فيه، أنا عارفة أنا مبقيتش نقية ولا كويسة، وربنا غضبان عليَّ وعمري ما هكون نضيفة تاني، أنا كرهت نفسي، كرهتها ومش عارفة اشوف نفسي غير بنت وحشة مش كويسة وعمرها ما هتبقى كويسة، مش قادرة حتى ادعِ ربنا يغفر لي، هو كده خلاص عمري ما هرجع نقية زي الأول وفطرتي سليمة؟ وكده خلاص ربنا مش هيغفر لي ويتوب عليَّ تاني وهفضل كده!

يا هداكِ اللّٰه وأصلحك، لازم تفهمي نقطة مهمة جدًا، إننا بشر مش ملائكة مش هنفضل طول الوقت نعمل في أعمال صالحة وبس!

لأ هنعمل ذنوب وهنغلط وهنكتئب وهنزعل من نفسنا، بس مش صح نفضل نحقر من نفسنا ونقلل منها وننهرها لحد ما ندبحها بالشكل ده!

التوبة تجُب ما قبلها يعني بتمحيه، ومن تاب، تاب اللّٰه عليه، بس كده ؟ وهي دي قليلة! مش بتحسي بالندم بعد كل ذنب بتعمليه؟ وبتبقي نفسك الزمن يرجع تاني لورا وتقولي لنفسك مكنتش هعمل كده وبتستغفري وتتوبي للّٰه! مش بتقولي في نفسك مش هعمل كده تاني!

ما هي دي التوبة والعزم على عدم تكرار الذنب..

طب وقعتِ تاني وأذنبت بعدها بربع ساعة! وأنا لسه كنت بستغفر وبقول توبت للّٰه ومش هعمل كده تاني! اعمل إيه؟

أفضل أوبخ في نفسي واعلق لها المشنقة؟!
لأ أتوب تاني واستغفر

حتي لو وقعت في الذنب كل شوية؟

حتى ولو وقعتِ فيه ١٠٠ مرة في اليوم، توبي واستغفري تاني

طب ربنا هيغفر لي أزاي وأنا وحشة ومش كويسة كده؟

طب ده يأس من نفسك ولا يأس وقنوط من رحمة ربنا عز وجل؟

قال صلى اللّٰه عليه وسلم : قال إبليس يا رب وعزتك لا أبرح أغوي عبادك ما دامت أرواحهم في أجسادهم، فقال اللّٰه تعالى : وعزتي وجلالي لا أزال أغفر لهم ما استغفروني.  رواه أحمد.

بس إنتِ مش متخيلة الذنوب اللي أنا بعملها  دي حاجات مقرفة أنا خلاص قرفت من نفسي وربنا مش هيغفر لي!

"قُلْ يَا عِبَادِيَ الَّذِينَ أَسْرَفُوا عَلَى أَنْفُسِهِمْ لا تَقْنَطُوا مِنْ رَحْمَةِ اللَّهِ إِنَّ اللَّهَ يَغْفِرُ الذُّنُوبَ جَمِيعًا إِنَّهُ هُوَ الْغَفُورُ الرَّحِيمُ"
متخيلة كم الرحمة والمغفرة؟ بيغفر الذنوب جميعا جُلها كبيرة وصغيرها لممها وعظيمها!

طب أنا تعبت من نفسي ومش عارفة اعمل إيه عشان ارتاح أنا بقيت اكرهني من كتر ما بعمل ذنوب!

لازم تكوني مُدركة إننا بشر وهنفضل نغلط ونعمل ذنوب إلى قيام الساعة وده مش مبرر لأي حد بيغلط ومذنب، لأ، هي إشارة فيما معناها إن كلنا بنغلط ولازم نتعامل مع نفسنا بلين ورفق زي الطفل الصغير لحد ما نوصل لبر الامان، وكل ما نقع لازم نساعد نفسنا عشان نعرف نقوم تاني لأن ما أحب الأشياء بالنسبة للشيطان إنه يشوف المؤمن في يأس وقانط من رحمة ربنا عز وجل وحزين وقلبه مريض وكله ندوب ومستسلم لفكرة إنه سيء وربنا مش هيغفر له.

الحل إيه؟

كل ما نذنب نتوب، كل ما نقع نستعين باللّٰه ونستغفر ونقوم تاني نمشي في طريق الحق، لأنه مش مهم نوصل في الدنيا، المهم نموت واحنا ماشين على طريق الحق واللّٰه المستعان، غفر اللّٰه لي وللمسلمين والمسلمات. 💜🌸

*شروط التوبه للي عاوز يتوب ازاي يتوب ❤✋*

كُلنا بنعصي الله .. كُلنا عملنا ذنوبك وحسينا بقرف الشهوات وذُلنا ليها .. طب انا قرفت زهقت من المعاصي .. نفسي اتوب .. نِفسي ارجع لربنا .. وهل هيقبلني ؟ ! طب اعمل ايه اٍنصحني .. اٍزاي اتوب وانضف من قرف الذنوب اللي انا غرقان في بحرها ..
انا اقولك اٍزاي تتوب .. *شروط التوبه 3* ..

*أولاً  الندم* :-   " قلبك ندمان وحزين علي الذنوب اللي انت عملتها .. يعني كُل لما تفتكر ذنبك تحس بخوف وتقول استغفر الله يارتني يارب ما عملت كدا " والنَدم هِنا سيدنا علي بن أبي طالب بيقول فيه كلمه مُريحه جداً جداً بيقول : اٍذا تذكر العبد الذنب .. أيوه لو انا افتكرت الذنب وبعدين ؟! فاٍضطرب القلب .. يعني قلبي اتنفض واتفزع ونِدم واتوجع علي اللي عمله .. هيحصل ايه يا سيدي علي بعدها ؟! يقولك " فاٍعلم أنه قد غُفر " مبروك ذنبك اٍتغفر 😍.

*تاني شرط توقف الذنب* :-
مُش تقول انا تبت عن شرب السجاير وانت في قُدامك سجارة  مولعها !! مينفعش .. لابد ترمي السجاره تحت رجلك .

*ثالث شرط* " العزم علي عدم العوده " :-
يعني مقولش انا تبت يارب عن السرقه وتروح البيت وانت نايم تقول بكره هسرق عمي اٍسماعيل البقال .. لا لابد تقول يارب مُستحيل هسرق مره تانيه ابداً .
لو عملت الشروط التلاته دي ذنبك اٍتغفر .. بس طبعاً مينفعش تتوب عن الذنب وانت بتعمل من نفس صنفه .. بمعني !؟ تيجي تقول يارب انا تُبت عن اني ابص علي بنات واعاكسهم تُبت يارب مُش هبص علي بنات ابداً .. وتيجي تشوف فوزيه جارتك ماشيه قدامك فـ تشاور عليها باٍيدك وتقول .. اٍلا البت دي يارب مقدرش لازم ابصلها .. اٍذاً توبتك ناقصه .. ومكملتش شروطها ..

يبقي التوبه .. اولاً الندم دلوقت .. وتقول يارب انا خلاص وقفت الذنب ومُش هرجعله تاني .. وقول معايا دلوقت بقلب صافي مُخلص لله والله باٍذن الله ربنا هيغفر جميع ذنوبك لو كانت مليارات البلاوي والمعاصي
" قول وقولي معايا "
*" اللهم اٍني تُبت وندمت علي ما فعلت وعزمت عزماً اكيداً علي انني لا اعود الي المعاصي ابدا وبرئت من كُل دين يُخالف دين الاسلام وأشهد أن لا اٍله الا الله وان مُحمداً رسول الله "* ..
انت كدا دلوقت ان شاء الله بدأت صفحه جديده مع الله تبارك وتعالي ♥