معا نمضي للفردوس

كلمتين بهدوء🌸

#كلمتين_بهدوء 🤫
التزمت ولبست الحجاب الشرعى واتعرفت على أخوات ملتزمات كنت مفكرة أنهم هيقربونى من ربنا لكن للأسف
طلعوا ولا لهم علاقة بالالتزام كل اللى يعرفوه من الدين
النقاب وبس ومغرورين ومخبيين بلاوى

فأنا أعمل ايه افتقدت الصحبة الصالحة 💔
وخلعت نقابى وتبرجت ورجعت ألبس زى زمان

دى مختصر قصة بنات كتير 👆
فمحتاجين نعمل شوية وقفات كده معلش 🤔

#أولا هو احنا لما مانلاقيش صحبة صالحة دى حجة أننا نبعد عن ربنا هل دى حجة أنك تخلعى نقابك ولاتخلعى خمارك؟!

يعنى معلش يوم القيامة لما ربنا يسألك خلعت النقاب ليه ولاالخمار ليه ورجعت للغناء وللاختلاط ليه هتقولى ايه؟!

عرفت صحبة وكنت فاكراهم كويسين وطلعوا وحشين !!

#ثانيا ايه الحكمة يعنى إنك تطلعى تحكى دا على الملأ كده وعلى مواقع التواصل؟!
يعنى أنت تبرجت وحطيت ميكب وبعدماكنت قدوة صالحة للبنات أصبحت بحال لا تحمدى عليه أبدا

طالعة قدام الجميع تجاهرى بالمعصية ليه؟!
ياشيخة اعملى حساب واحدة ممكن تشوفك كده وتتفتن بيك وتعمل زيك وتكون فى ميزان سيئاتك

اعملى حساب إن ممكن واحدة ملحدة تشوف حالك دا وتتعرف عليك وتدخل تغير لك دماغك وبدل ماكنت على معصية تقعى فى شرك عياذا بالله وماتقولوش إننى بأبالغ لأن دا واقع وموجود

أنت عارفة ايه عقوبة الجهر بالمعصية كده ؟!
قال النبى صلى الله عليه وسلم ( كل أمتى معافى الا المجاهرين)
أنا عارفة إنك ماشية فى الشارع متبرجة لكن إنك تنشرى صورك بالحجاب الشرعى وجنبهم صورك بعد ماخلعتيه وتبرجت وكأنك بتبارزى ربنا بالمعاصى كأنك فخورة باللى أنت عملتيه

سألتى نفسك كام واحدة ممكن تضل بسببك؟
يا خوفى تكونى بتعملى كده عشان تجمعى لايكس وكومنتس
لأن دى كمان والله أصبحت فتنة
#للأسف اتبعتم خطوات الشيطان وغرتكم الحجج الواهية
مفيش صحبة صالحة يلا نبعد عن ربنا يلا نترك الالتزام
يلا نخلع حجابنا أصل الاخوات الملتزمات طلع التزامهم
نُص كُم !! كلهم طلعوا وحشين كلهم التزام ظاهرى وبس

غلط ومليون غلط

مفيش حاجة اسمها كلهم وحشين
أنا شخصيا فى اول التزامى كنت هأضيع بسبب ناس فكرتهم ملتزمين لكن بفضل الله وحده ربنا نجانى وثبتنى على الطريق
وعرفت أنه اختبار من ربنا ياترى هأطيعه فى وجود الصحبة وفى عدم وجودها ولا لا؟!

ياترى هأكتفى بربنا وحده ولا لا؟
ياللى مش لاقية صحبة صالحة وبتعافرى عشان تثبت وبتعافرى عشان توصلى لربنا ثوابك أعظم وأعظم لأنك لوحدك
لأنك بتجاهدى عشان تثبت على الطريق

أبشرى الله عزوجل توعد لك بتيسير الطريق
( والذين جاهدوا فينا لنهدينهم سبلنا)
دا ربنا اللى بيقول إنه هيهديك للطريق

لكن فين عزمك فين إرادتك
فالعون من الله يأتى للعبد على قدر همته وعزيمته

#هنوصل لربنا وهنكمل فى طريقنا اليه حتى ولو الدنيا كلها وقفت قدامنا
هنوصل ولو مفيش صحبة صالحة هنجاهد
عشان لما نقابل النبى صلى الله عليه وسلم نقوله اتبعنا هديك واتبعنا سنتك ماغرتناش الفتن
#جاهدى واقبضى على دينك علشان النبى صلى الله عليه وسلم يفخر بيك
#إياك والتخاذل اسندى نفسك بنفسك واستعينى بالله
قولى يارب ثبتنى ، ولو وجدت الصحبة الصالحة بها ونعمة
وإن لم توجد فمفيش حاجة هتوقفنا عن السير إلى الله .
#أخيرا لما تلاقوا بنت انتكست ومنزلة صورها قبل وبعد الالتزام لا تعلقى لها ولاتعملى لها لايك ولاشير
ولوعايزة تنصحيها فعلا ادخلى لها خاص .
اللهم إنا نسألك الثبات اللهم إنا نسألك الثبات
#السلفية_العابدة

منقول