أحببناها مريمية ( ٣ أجزاء )

كلمة قدر (٢٠)

كلمة قدر
أحببناها مريمية ٣

                  الحلقة العشرون

بقيت على حالتها حتى جف الدمع عن عينيها .. لقد استهلكت طاقتها بأكملها .. لا مشكلة لديها إن بدت بهذا الضعف أمامه .. على الأقل ستترك لنفسها ذكرى بداخله ..

تنهيدة طويلة خرجت عنها قبل أن تحاول الابتعاد عنه لكنه لم يسمح لها بذلك ..

سبأ :
- مـ مالك لـ لو سمحت .

مالك ببحة خفيفة :
- بحبك .

تصلب جسدها فجأة بين يديه وهو يشعر بتلك القشعريرة التي أصابت ظهرها أسفل يديه ليبتسم بهدوء متابعًا :
- والله العظيم بحبك .. بحبك وما تأكدتش من حبي ليكي وإني فعلا ما أقدرش على فراقك أو بُعدك عني غير لما .. لما حسيت إني ممكن أفقدك .. كنت خايف .. متكتف .. مخنوق بالعياط .. كنت تايه .. مجنون بدور على أي خيط .. عقلي وقف وقلبي بدأ يوجعني .. لا .. هو أصلا كان بيوجعني من قبلها بفترة .. فاكرة لما جيتي عشان تشوفي ملك لما رجعت من العمرة ؟.. يومها عيني جت في عينك ودخلتي عيطتي في حضن ملك .. أنا وقتها كمان عيطت .. حسيت بالضعف .. قلقان وخايف عليكي .. مكسور من نظرة عيونك اللي بتقولي انتي خايفة قد إيه .. كنت بتطمن عليكي من أريج وملك .. كنت بنام أحلم بيكي وبقربك .. رغم إني كنت شايف إن عمرنا ما هنقدر نكون سوا بسبب إحساسي طول الوقت إنك بتكرهيني ومش طيقاني ..

تنهد تنهيدة طويلة قبل أن يتابع :
- الرسايل اللي كنت بكتبها كانت فكرة رهف .. كنت بجمعهم كلهم عشان يلاقوا لي طريقة أعرف أقربك ليا بيها .. مش هنكر إن كان كل تركيزي على إني أنسيكي اللي حصل .. بس ده عشان عايز نعيش حياة طبيعية مع بعض .. أنا ما تجوزتكيش شهامة .. أنا اتجوزتك عشان انتي ليا .. انتي مني .. عشان بجد بحبك يا سبأ .. اللي سمعتيني بقوله لناجي وخدتيه بفهمك ده كان إجابة لسؤال سألهولي وقتها لما لقاني تايه .. سألني قال لي لازم ترتب أفكارك .. نحسبها بالقلب الأول انت بتحبها ولا لأ ؟.. قلتله أنا عاشقها مش بس بحبها .. قال لي طب تعالى نحسبها بالعقل ونبعد القلب خالص .. انت كراجل كده بعقل بس .. اتجوزتها ليه ؟.. قلتله عشان لازم أخرجها من اللي هي فيه .. وعشان لازم ترجع لطبيعتها لإنها تستاهل إنها تعيش حياة كويسة ومستقرة وطبيعية .. رجع سألني .. حتى لو هتنفصل عنها بعدها ؟.. قلتله حتى لو هنفصل عنها بعدها .. وده عشان بحبك .. بحبك وعايزك تعيشي الحياة اللي تستحقيها .

ابتعدت سبأ عنه لتتواجه عيناهما دقيقتين متواصلتين قبل أن تصرح سبأ :
- اللي بيحب ما بيستسلمش .

أمسك مالك بيدها وهو يتمتم :
- وأنا عمري ما استسلمت ولا هستسلم .. حتى لو هعيش باقي عمري معافرة .

سبأ :
- هتتعب معايا أوي .

مالك وهو يقرب يدها إليه :
- كل تعبي يهون قصاد إني اشوف اسمي في عيونك .