الفصل الثالث والخمسون من رواية حياة أسرت قلبي
🌹🌹🌹🌹🌹🌹🌹
حياة:هدير انتى كده بتحكمى على نفسك بالتعاسه العمر كله
هدير :هو انا ياحياة لما اتجوز يبقى بحكم على نفسي بالتعاسه
حياة:هدير متلفيش وتدورى علية فى الكلام انتى فاهمه كويس انا اقصد ايه يابنتى حرام عليكى ليه مصرة تعملى كده فى نفسك وفى الإنسان اللى بيحبك حرام عليكى والله
هدير وهى تبكي بشده :بيحبنى اه بيحبنى ان شاء الله هو فى واحد يعمل فى اللى بيحبها اللى عمله فية ومتحاوليش تلتمسيله اى اعذار الله يخليكى انا خلاص الموضوع ده بالنسبه لي انتهى انا خدت قرارى وحتجوز اسلام خلاص
حياة :هو انتى كل الاعتذارات اللى اعتذرهالك مرضيتكيش ياهدير لا ياهدير والله العظيم أمجد بيحبك وبيموت فيكى اهانك وزعلك منه كتير وداس على كرامتك والراجل شرحلك السبب وبقاله شهور عمال يجرى وراكى فى كل مكان بيحاول يتكلم معاكى نفسه يراضيكى يتأسف لك يفتح معاكى صفحه جديده ليه مش عاوزة تديه ولا تدى لنفسك الفرصه دى خلاص احنا بقينا ملايكه مبنغلطش وهو اللى شيطان فيه كل العبر والمفروض نخليه عبرة لكل الناس ومنسامحش ابدا
طب بزمتك انتى عمرك ماعملتى حاجه غلط فى حياتك عمرك ماكدبتى واللا اتصرفتى بشكل غلط ايه طول الوقت ماشيه خط مستقيم فتتذكر هدير مافعلته فى حقها وكيف ان اسر سامحها ولم يخبر حياة بهذا الأمر
حياة:هدير ربنا سبحانه وتعالى بيسامح وبيقبل التوبه احنا نكون مين احنا عشان منسامحش هو مش انا حكتلك على اللى عمله فية محمود زمان بزمتك المفروض انى كنت اعمل ايه لما اشوفه بعد كده واحده غيري كانت قلعت اللى فى رجلها وضربته بيه لكن انا قلت الحمد لله وربنا عوضنى وربنا يعلم انى سامحته من قلبي بدليل انى عزمته هو ومراته فى فرحى ومش بس كده لما مراته ولدت وعزمونا عالسبوع رحنا كلنا نبارك ونهنى حتى اسر جه معانا وشاركناهم فرحتهم وعفا الله عما سلف واللى فات مات
يختى ده الرسول سامح الكفار اللى اذوه وعذبوه ليه احنا منسامحش ليه
سامح اليهودى اللى كان بيحطله القاذورات ادام بيته وراح زاره كمان لما عرف انه تعب مش الرسول قدوتنا اللى لازم نقتدى بيه واللا انتى عندك رأى تانى
هدير :مش قادره ياحياة مش قادرة افهمينى ارجوكى وقدرى موقفى انا مش قادرة انسى كل الاهانات اللى اهانهالى
حياة وهى تحتضنها :حتنسي والله حتنسي ياهدير حب أمجد ليكى حينسيكى ياحبيبتى وحيخليكى تقدرى تفتحى صفحه جديده معاه هدير انا لو مش متاكده انك بتحبيه والله ماكنت جيتلك وانا ربنا العالم بية انا اصلا مش قادرة امشي خطوتين على بعض بس قلت لازم الحقك قبل ماتضيعى حبك من ايدك وحتندمى والله حتندمى ياهدير لما تلاقى نفسك نايمه فى حضن راجل وعقلك ومشاعرك وتفكيرك كله مع راجل تانى حتندمى بس وقتها متلوميش غير نفسك لاننا كلنا نصحناكى حتى اشرف اخوكى لما قعد واتكلم معاه سامحه وطلب منك تديله وتدى لنفسك فرصه لكن انتى اللى مش عاوزة تسمعي غير صوتك وبس
هدير انتى كده بتجنى على تلاته بتجنى على أمجد وعلى نفسك وعلى اسلام اللى ملوش ذنب فى حاجه
