الفصل السابع و الثلاثون من رواية حياة أسرت قلبي
🌺🌺🌺🌺🌺🌺🌺🌺🌺🌺🌺
لقد ان الاوان ياقلبي لتنال ماتمنيت واشتقت وحلمت فكم طالت الامانى وليالي الاشتياق كم بكت العين من حرقة لوعة الفراق
اه واه ياقدر يامن كتبت علينا البعد هكذا
اكان لك حكمة فى ذلك ام كنت تعبث بقلوبنا
نعم فالحق كل الحق بان القدر ياتى بما شاء رب العباد لحكمة لايعلمها سوى خالق الاكوان
لا لا نريد معاتبة القدر يكفى اننا سنلتقى وسنذيب لهيب الاشتياق
سترتوي ياقلبي من ظما الاشتياق الذى طال لسنوات
فاصبر ياقلب فليس اماك سوى ايام وتجتمع بمن فرقه عنك القدر اعوام واعوام
فى شقة ابو علا
ابوعلا:ياحبيبتى احنا مش حينفع نروح معاكى روحى انتى مع خطيبك انبسطى وافرحى انا عارف انى مقفلها عليكى ومبرضاش اخليكى تخرجى معاه كتير بس ده من خوفى عليكى والله ياحبيبتى
حياة:ايه اللى انت بتقوله ده بس ياحبيبي اولا بقى انت اوامرك سيف على رقبتى ووالله العظيم اسر عمره مااضايق ابدا بالعكس ده بيحبك اوى ومقدر خوفك وقلقك علية
لكن المرة دى الوضع مختلف الدكتور هو بنفسه اللى عزمنى واكد علية انى اروح الحفله وانكم تكونوا معايا
ومتنساش يااخويا انه عملك العمليه من غير ماياخد مننا ولا مليم يعنى واجب علينا اننا نروحله ونشاركه فرحته بخروج جوز اخته من السجن ده عامل حفله كبيرة اوى
علا:ياحياة انتى بتقولى بنفسك حفله كبيرة يعنى عاوزة ناس معينين هما اللى يحضروها مش احنا ياحبيبتى
احنا مش شبههم ولا بنعرف نتكلم ولا ناكل زيهم
ولا حتى عندنا لبس يليق بالحفلات اللى زى دى
لكن انتى ياحبيبتى متعلمه ودكتورة وتعرفى تتكلمى زيهم
حياة:ايه الكلام اللى بتقوليه ده يا علا
طب اقسم بالله العظيم لو مارحتم معايا مانا رايحه والحفله دى متلزمنيش انى اروحها من غير اهلى اللى رافعين راسي للسما واللى من غيرهم كان اخرى دلوقتى اشتغل خدامه ولا امسح سلالم
بصي ياعلا انا عاوزاكى تعرفى حاجه مهمه ان المكان اللى ميشيلكمش على دماغه ميلزمنيش انى اقعد فيه ثانيه واحده
والناس اللى متقدركمش يبقى عمرهم ماحيكون ليهم وجود فى حياتى
انا منكم وبيكم بقيت حياة الدكتورة ثم تقبل راس سعيد ويديه
الايد دى هى اللى بتتعب وبتشقى عشان واحده زيي تكمل تعليمها وتبقى بنى ادمه
ثم ترتمى فى احضان علا وهى تبكى :انا عمرى ماحكون سعيده وانا فى مكان انتم مش فيه ياعلا
انتى فاهمه وخلاص متزعلوش احنا كلنا مش رايحين الحفله
سعيد:لا ياحبيبتى ولا تزعلى نفسك انا متهونش علية دموعك ياقلب اخوكى من جوة
علا اعملى حسابك بكرة بعد ماعلا تخلص كليتها حنروح معاها كلنا سوا محطه الرمل فيها لبس كويس ليكى وللبنات تجيبى فستان حلو بطرحته بشنطته بجذمته
