الفصل الرابع و الأربعون من رواية حياة أسرت قلبي
🌺🌺🌺🌺🌺🌺🌺🌺
فى فيلا مؤمن
وفاء:اخيرا يا حبيبي حفرح بيك وحشوفك عريس يامؤمن
مؤمن:كل شئ باوان ياماما
وفاء :الحمد لله يا حبيبي ان ربنا رزقنا ببنت الحلال اللى تريح قلبك واكون مطمنه عليك وهى معاك يا حبيبي عشان لما اقابل وجه كريم اكون مطمنه عليك يانور عينيه
مؤمن:الف بعد الشر عنك يا ست الكل ربنا يخليكى يارب ياحبيبتي منحرمش منك ويديكى الصحه وطولة العمر
وفاء :والله يابنى انا ما فى حاجه شغلانى غيرك ياحبيبي وخلاص اهوه الحمد لله ياسلام بقى يامؤمن لو ربنا يمد فى عمرى لحد مااشيل ولادك ياضنايا
مؤمن :ان شاء الله ياحبيبتي حتشيلي ولادى وتفرحى بيهم وتشوفيهم وهما بيجروا قدامك
ربنا كريم اوى ياماما بصراحه ياماما انا عمرى ماكنت اتخيل انى ححب بالشكل ده
وفاء :ياحبيبي يابنى انت بتحب نور اوى كده ربنا يهنيك ياابنى يارب
مؤمن :بحبها اوى ياماما عارفه ياماما مكدبش عليكى زمان كتت بقول انا يوم مااتجوز لازم اتجوز ملكة جمال عاوز الناس وانا ماشي معاها تحسدنى على جمالها عاوز الكل ينبهر بيها وبجمالها عشان كده لما خطبت اول مرة وشفت نظرات الاعجاب دى فى عيون الناس كنت مبسوط اوى وحاسس بالفخر
لكن بعد كده عرفت ان ده كان تفكير مراهق وسطحى وان مفيش احسن ولا اجمل من الاخلاق وان الشكل ممكن يتغير فى لحظه وحتى لو فضلت جميله بكرة حتعود عليها وعلى شكلها وحيبقى بالنسبه لى شئ عادى لكن اللى بيدوم الاخلاق والاصل الطيب والتربيه
وبرغم ان نور جمالها عادى جدا بس حاسس انها اجمل بنت فى الدنيا كلها وهى بادبها واخلاقها خلتنى بقيت بموت فيها ومستني اليوم اللى تبقى فيه مراتى بفارغ الصبر
وفاء :طبعا يامؤمن اه الشكل مهم بردو بس والله يابنى مفيش حاجه بتدوم غير الاخلاق
الاصيله هى اللى تشيلك فى المرض والفقر والحزن وتبقى معاك عالحلوة والمرة
وبعدين حنروح بعيد ليه مااديك شايف يامؤمن رنا بنت جيرانا اللى فى الفيلا اللى جمبنا ماهى ياحبيبة قلبي كانت زى الورده المفتحه ومكنش فى حد فى جمالها وكان كل يوم عريس متقدملها انا نفسي كان نفسي اخطبهالك
ولما كلمت مامتها قالتلي مش حينفع عشان هى كانت اكبر منك بسنتين والبنت عاوزة واحد اكبر منها
واديك شفت يابنى مش بعد مااتجوزت وخلفت ولدين بسم الله ماشاء الله ربنا يحميهم ويخليهم لها يارب مش بين يوم وليله جالها الورم واهى من ساعتها ياحبيبتى متبهدله فى العلاج الكيماوى وصحتها راحت عدم ومش غايظنى غير جوزها قليل الاصل اللى بدل مايقف جمبها وباحد بايدها لحد ماتخف لا ده حالا ماراح جرى واتجوز وسبها ياحبيبة قلبي
والله انا مابقول كده عشان حاجه انا عارفه ان المرض والصحه بايد ربنا انا بس اللى اقصده ان مفيش حد يتغر بحاجه فى ايده لان محدش يعلم بكرة فى ايه
ومينفعش ان الراجل من دول يقول يااما تبقى البنت قمر يامتجوزهاش طب والبنات العاديين نعدموهم يعنى واللا ايه
