لؤي بخوف واضح من صوتو : هدى عليك الله مالك في شنو !!
فضلت ساكتة بس ودموعها نازلة ..
لؤي : طيب ممكن تحكي لي ما تقلقيني لو سمحتي
هدى بإستغراب : انت لي هنا !!
لؤي : ما مهم بوريك بعدين هسي وريني بتبكي كدا وقاعدة هنا براك وفي الارض لي في زول سمعك كلام فارغ او زعلك !!
غمضت عيونها وغطت وشها بيدينها في محاولة منها انها تخفف من كمية الصداع الحاسة بيهو..
لؤي : اسمعيني خلينا نطلع من هنا احسن ليكي ..
هزت راسها بالإيجاب وقامت معاهو ..
مشو وطلعو بباب النجيلة التاني بدون ما ينتبه زول وركبو العربية ..
عاين لهدى مسافة قبل ما يدور العربية ويتحرك على شارع النيل ..
~•~•~•~•~•~•~•~•~•~•~•~•~•~•~•~•~•~
🌸 في جانب تاني 🌸
اثناء ما كانت قاعدة مع الناس والجوطة والحفلة .. شافت انو دي فرصتها مع انشغال الناس داا انها تمشي تشوف هدى بقت كيف .. لفت عليها البيت كلو بس ما لقتها .. اتصلت عليها وأول ما ردت : هدى انتي وين
هدى : طلعت مع لؤي
اروى باستغراب : لؤي منو
هدى : عايني بحكي ليكي بعدين طيب
اروى : طيب .. انتي كويسة مش
هدى : ااي ما تخافي ما تشغلي بالك كتير ..
اروى : طيب خلي بالك من نفسك
هدى : تمام .. باي
اروى : باي💛
~•~•~•~•~•~•~•~•~•~•~•~•~•~•~•~•~•~
🌸 شارع النيل 🌸
كانو قاعدين في مكان هادي كدا على الطرف ..
لؤي : تشربي قهوة !
هدى : لا ما بحبها ..
لؤي : طيب شاي !!
هدى : طيب ..
مشا وطلب كبايتين شاي قبل ما يرجع ويقعد مع هدى ..
سكت مسافة قبل ما يقول : اها احكي سامعك ..
هدى أخدت نفس طويل كدا قبل ما تقول ليهو : بحب واحد من دفعتنا اسمو وائل ..
هنا لؤي حس بطعنة غريب في قلبو وحاول يخفي ضيقو بإنتباهو معاها وهو بقول : طيب والحصل !!
هدى : انو حب واحدة وارتبط بيها قريب والقصة وما فيها انو خلاص بقا لغيري او هو عمرو ما كان لي اصلاً ..
لؤي : بتحبيهو من متين !!
هدى : كم سنة يعني وقت طويل ..
لؤي : اهاا وهو ما عارف ؟؟
هدى : لا
لؤي : طيب شوفي اي زول فينا في الدنيا دي مصيرو يحب يحب لكن ما اي زول بنحبو حيبادلنا نفس الشعور بس على العموم كل شيء بحصل لي خير فخلي إيمانك بربنا كبير ودايما خليك واثقة انو حيجي يوم وتنسي كل دا واكيد في النهاية دا لحكمة من ربنا نحن ما عارفنها .. بس في الاخر اكيد هي لخير ..
ابتسمت وهي بتتذكر مرضها الممكن يخليها تعيش ايام بس ما اكتر وجاوبتو بابتسامة وهي بتقول : فعلا .. كل شيء لخير💜
غير الموضوع في محاولة منو انو يطلعها من جو زعلها دا وهو بقول : اها ي ستي بكرا عندك حاجة
هدى : لا ... لي !!
لؤي : حابي أعزمك برا
هدى : وين
لؤي : مكان ما بتحبي وتختاري
هدى : امم خلينا نمشي ديلايس بحبو شديد
لؤي : من عيوني يا ستي تمام غالي والطلب رخيص💙
وفضل يتونس معاها في مواضيع مختلفة عشان ينسيها الحاصل دا ..
بعد شوية جابت المرأة الشاي .. شربوهو سوى ما بين هم بتونسو وما بين هم بضحكو ..
بعد شوية وصل هدى البيت قبل ما هو كمان يرجع البيت وكان مبسوط لانو قدر يضحكها شوية بس في نفس الوقت ما قادر ينكر شعورو بالضيق انها بتحب وائل ..
