🌸 الخرطوم _ ١٢ مساء 🌸
اثناء ما كان وائل بلعب تلفونو ضرب .. وقف اللعبة ومشا يرد عليهو .. لقاها هالة .. مسكو بسرعة وبلهفة رد عليها : الوو
هالة : مرحب
وائل : مرحبتين .. وينك انتي اتصلت عليك كم مرة ما رديتي
هالة : والله مشينا لي مرت اخوي انا وداليا قعدنا معاها مسافة كدا وجينا راجعين قبل شوية
وتلفوني كان في البيت
وائل : اهاا ،، خير مالا مرت اخوك
هالة : لا ما فيها شيء بس مشينا زيارة عادية
وائل : ايواا تمام ..
هال : انتو بتجو متين تاني
وائل : لسا م معروف بس الدكتور ايام الامتحانات قال لينا احتمال كتير تتلغي الرحلة الجاية وما نجي
هالة بصوت فيهو بحة زعل حاولت تخفيها : لي
وائل : قال ماف داعي مهم ليها تاني
سكتت
وائل : وين مشيتي
هالة : لالا معاك ما مشيت مكان
وائل : زعلانة عشان ما جايين تاني !!
ما ردت عليهو وفضلت ساكتة
وائل : اممم للدرجة دي مشتاقة لي
هالة : لالا ما كدا بس
وائل : ايواا يعني ما مشتاقة لي
هال : لا ياخ ما كدا
وائل : لالا خلاص زعلت
هالة : وائل يااخ (( وسكتت ))
وائل : اها سامعك
هالة : ماف شيء انا تعبانة اصلاً يلا تصبح على خير
وائل : وانتي بخير واحلام سعيدة♥️
*وقفلو الخط على كدا*
🔹🔸🔹🔸🔹🔸🔹🔸🔹🔸🔹
هالة اتقلبت في السرير على جهة اليمين .. غمضت عيونها وابتسمت واستسلمت لتعبها ونامت ..
اما وائل بقا بفكر وهو مبتسم .. كان فرحان لانو لخبطها وما عرفت تقول شنو .. قال بينو وبين نفسو (( حبيبتي انتي والله اشتقت ليك ))
شال تلفونو ختاهو في الشاحن وقفل البليستيشن قبل ما يمشي ينوم ..
🔹🔸🔹🔸🔹🔸🔹🔸🔹🔸🔹
🌸 صباح اليوم التاني_الجمعة_١٠ونص صباحاً🌸
لين يادوب صحت من النوم .. قامت رقدت شعرها ورفعتو كعكة بفوق .. مسافة عملت حاجاتها وصلت..بعد ما خلصت وهي نازلة في السلم بي بجامتها شافت الشغالة شايلة كباية عصير وماشة على صالون الرجال .. استغربت ومشت لقت امها في المطبخ بتعمل في تحلية ..
لين : صباح الخير
ام لين : صباح النور،،الليلة صحيتي متاخرة
لين : ااي،،امم يا امي معانا ضيوف ولا شنو !!
ام لين : دا زياد خطيبك جا لي ابوك بس ما عارفة ليه ما عندي فكرة الحاصل شنو ،، قال ليك شيء زياد قبل ما يجي !!
لين : ابداً والله ..
فجاة سرحت واتذكرت لما كان بتكلم معاها امس في موضوع يستعجلو موعد العرس .. نططت عيونها وجات جااارية بسرعة على جهة الصالون.. وقفت جمب الباب وبقت بتسمع ..
ابو لين : ما عندك اي مشكلة والموعد دا كويس جداً
زياد : تسلم يا عمي ياخ
ابو لين : ولو ياخ الله يسلمك
زياد : ياا بعد دا لازم أرجع البيت الصلاة زاتا قربت
ابو لين : لا ياخ فضل ليها ساعتين لسا اقعد أفطر معانا
زياد : والله الجايات اكتر بس زاتو ابوي راجيني في البيت وكدا
ابو لين : لا خلاص خير
(( لين جرت مشت غرفتها فوق قبل ما يجو طالعين وقفلتها ))..
اما زياد ودع اهل لين ورجع البيت .. اثناء ما راجع على البيت تلفونو ضرب .. عاين للرقم لقاها لين
ابتسم وما رد عليها .. شويات كدا ووصل البيت ..
🔹🔸🔹🔸🔹🔸🔹🔸🔹🔸🔹
🌸 عند وائل 🌸
صحصح يادوب ونزل صبح على اهلو
وائل : وين سهى
منيرة : نايمة لسا ما صحت
وائل : اهاا
منيرة : تعال أفطر
وائل : لا والله ما عايز كلمت حواء تعمل لي شاي طالع ضروري برجع بعدين كدا
منيرة : خير ان شاء الله ماشي وين
وائل : عندي بس مشوار ضروري كدا وبجي
في المسافة دي حواء جابت ليهو الشاي شربو وركب عربيتو واتحرك..
🔹🔸🔹🔸🔹🔸🔹🔸🔹🔸🔹
•نهاية الحلقة الرابعة والثلاثووون•
•قروية_الجزء الثاني•
•ثناء_معتز•
