لحظات مؤلمه للكاتب محمد مالك

البارت (٢٥)

رواية لحظات مؤلمة 

البارت الخامس والعشرون

للكاتب المصري محمد مالك

جميع الحقوق محفوظة
وفي اليوم التالي تذهب والدة شيرين واختاها الاثنتان بوسي وميرفت لزيارة شيرين في منزلها
الام .. صدقيني يا بنتي انا مكنتش عاوزه اجيلك تاني ابدا
شيرين .. ليه بس يا ماما ؟!!
الام .. بقيت بتشابر من البيت الملعون دا بعد اللي حصل ل نورا اختك !! مالك يا بنتي وشك دبلان ليه ؟!! باين عليها جوازة شوم ما شفتكيش يوم سعيدة من ساعة ما اتجوزتي !!
شيرين .. بجد تعبانه اوي يا ماما !! حاسة اني عايشة في دوامه كبيره ومش عارفة اخرج منها !!
الام .. ابوكي السبب .. هو اللي جابوا !!
شيرين .. قليلي يا ماما هو بابا يعرف اكرامي منين ؟!!
الام .. متهيألي يا بنتي اتعرف عليه لما كان بيرحله العيادة عشان يغيرله علي الفتق اللي كان عنده
شيرين .. بس متهيألي مش هو اللي عمله العملية ؟!!
الام .. لا مش هو .. اللي عملهاله دكتور تاني اسمه احسان درويش بس بعد ما عمله العملية سافر السعودية علطول وهو اللي قاله يتابع مع جوزك علي اساس انه شاطر ومن تلامذته
شيرين .. اها ..
الام .. امال فين المحروس جوزك ؟!!
شيرين .. بايت من امبارح عند امه تحت
الام .. ليه هو انتم زعلتوا مع بعض تاني ؟!!
شيرين .. يعني
الام .. وهي فين امه ؟!! ان ما حد فينا شافلها سحنه لدلوقتي !!
شيرين .. هو بيقول تعبانه ومش بتتحرك ابدا
الام .. والله يا بنتي انا مش مرتاحة للجدع دا لا هو ولا اهله
ثم يُسمع صوت الفرخه المعلقة بالمطبخ وقد تصدر صوتها بطريقة غريبة
مرفت .. ايه دا !! هو انتوا لسة مدبحتوش الفرخه اللي معلقينها من رجلها في المطبخ ؟!!
شيرين .. والله الفرخه دي حكايتها حكاية ومش عرفة ايه سرها بالظبط !!
الام .. هي الفرخة بس اللي مش عارفين سرها !! دا البيت كله مليان غموض يا بنتي !!
بوسي .. هي مالها بتعمل ليه كدا !! زي ما تكون بتتألم !!
شيرين .. مش عارفة بجد ولو حررتها اكرامي بيخرب الدنيا وفي الاخر بتموت لوحدها !!
بوسي .. حاجة غريبة بجد !!
مرفت .. مش هتقوليلها يا ماما ؟!!
شيرين .. تقلي علي ايه ؟!!
الام .. اسكتي يا مرفت كفاية اللي هي فيه !!
شيرين .. في ايه يا جماعة قلقتوني!!
مرفت .. ما هي لازم تعرف برضوا .. بصراحة احنا لقينا برشام اكتئاب مستخبي جوا الدبدوب بتاع نورا
شيرين .. ايه ؟!! بجد الكلام دا يا ماما ؟!!
الام ..ايوا يا شيرين .. اخواتك طلعوه من قلب الدبدوب بتاع المرحومة اختك
شيرين .. واتأكدتوا انه برشام اكتئاب فعلا ؟!!
مرفت .. اها .. رحنا بيه الصيدلية والدكتور هناك قالنا انه فعلا برشام لعلاج الاكتئاب والقلق
شيرين .. يعني كدا نورا كان عندها اكتئاب فعلا وبتاخد علاج ليه !!
بوسي .. بس انا مش قادره اصدق لحد دلوقتي انها كانت فعلا بتاخد ادوية زي دي!! نورا طول عمرها مرحه ودماغها كبيرة اوي وعمرها ما فكرت ولا شالت هم !! يبقي هيجيلها الاكتئاب منين ؟!! وبعدين انا كنت اقرب واحده ليها ودايما بنحكي لبعض كل حاجة اول بأول .. يبقي ازاي هتخبي عني انها تعبانه من حاجة او مضايقة وبتاخد كمان ادوية !! لا والادهي من دا كله انها تعرف كمان اللي اسمه هيثم دا!!
الام .. والنبي يا بنتي ما تجيبي سيرته قدامي .. حكم انا مش طايقاه لا من سما ولا ارض !!
شيرين .. ومين سمعك يا ماما
الام .. بقلك ايه يا شيرين نفسي اشرب فنحان قهوه من ايديكي
شيرين .. عنيا يا ماما
بوسي .. خليكي انتي يا شيرين انا هقوم اعمل القهوة ل ماما وبالمره اعمل لنفسي مج نسكافيه .. حد فيكم يشرب حاجة معايا ؟
مرفت .. انا اشرب نسكافيه معاكي
شيرين .. تصدقي يا ماما اول امبارح وانا راجعة من النيابة حصلت حاجة غريبة اوي !!
الام .. ايه هي يا بنتي ؟!!
شيرين ..قابلت ام مروه
الام .. مروه مين ؟!!
شيرين .. المرحومة مروه زوجة اكرامي اللي قبلي
الام .. قابلتيها فين ؟!!
شيرين .. قدام البيت ومش هتصدقي كانت بتعمل ايه !!
الام .. كانت بتعمل ايه ؟!!
وفجأة يُسمع صراخ بوسي داخل المطبخ ويهرع الجميع نحو المطبخ حتي يروا شئ صادم جدا ؟؟؟!!!!
تابعوني والبارت التالي .. تحياتي .. ملك الروايات الكاتب المصري محمد مالك.