أسكريبت
_عجبك كده جيبالنا الكسفه بسبب شغلك
=هو ايه شغلي الي يكسف
_قال ايه مهندسه مكانيكا ، عنده حق العريس يقول عليكي الأسطي بليه
=هو الخسران
_افهم مغروره بنفسك علي ايه دا انتي مكانيكيا يعني اخرك هتفتحي ورشه
=شكرا يا ماما بتتريقي عليا وعلي حلمي
_حلم ايه بس يابنتي ، شوفي احلام البنات الي نفسها تطلع دكتوره ، اعلام ، صيدله مش انتي مكانيكا
=بحبها ، انا مش شايفه نفسي غير وسط عربيات ومفكات وصواميل
_بلاش العند نفسي اطمن عليكي يابنت بطني قبل ما اروح اقابل رب كريم
=وتسبيني لمين يا حجه هو انا ليا غيرك
_كلي عقلي بكلامك الحلو ، اقعدي انتي كل عريس يطفش تضحكي عليا بكلمتين وتنسيني حسرتي عليكي
=لا حسره ولا حاجه ، جهزي الأكل عقبال ما انادي أدم ينزل ياكل معانا
"أدم ابن خالي ساكن في نفس عمارتنا عايش لوحده بعد ما خالو ومراته ماتو في حادثه ملوش غيرنا واحنا ملناش غيره بعد ما بابا ما مات"
▪︎اهلا اهلا يابنت عمتي
=اهلا بيك ماما بتنادي عليك وبتقولك الغدا جاهز
▪︎قوللها انا جي تعبان من الشغل وهنام
=لا يا اخويا انزل قولها بنفسك كفايه الموشح الي لسه وخداه
▪︎دا ليه دا
=العريس ابن التيت قال ايه بيقول عليا الأسطي بليه
▪︎اهااا يعني اترفضتي
=حاجه شكل كده
▪︎لا دا انا كده لازم اجي اكل بقا عشان اعرف التفاصيل
خد مفاتيحه وقفل الباب ونزلنا سوا لقينا ماما حطت الأكل قعدنا كالعاده حوالين السفره الصغيره
▪︎ها احكيلي اترفضتي ازاي المره دي
=ابدا أمه قالتلي كل شئ قسمه ونصيب ، قال ايه ابنها كان عايزني ابطل شغل واقعد في البيت اربيله العيال
▪︎عندك حق ولله
_كك كسر حقك انت وهيا ، انت بتعصيها علي الغلط يا أدم دا كده حالها يتوقف اكتر ماهو موقوف
▪︎انا بقول الصح طب بزمتك ينفع الي بيحصل دا يعني تضيع عمرها كله عشان تتعلم وتشتغل وفي الأخر تقعد في البيت تربي العيال
_هيا دي سنه الحياه يا ابني الست مكانها تربي العيال والراجل هوا الي يشتغل
زعلت زي كل مره من الكلام وقومت من علي الأكل وطلعت البلكونه انا مش شايفه مكاني وسط عيال وصويت وزعيق انا بحب الأطفال بس بحب حلمي نفسي ماما تشجعني زي أدم بس هيا كل الي هيا عايزاه اتجوز وخلاص وكأن حياتي كلها واقفه علي راجل اتجوزه
_شوف كل ما اتكلم في موضوع الجواز تتقمص
▪︎عندها حق يا عمتو انتي دايما بتصممي تفتحي الموضوع دا قودامها مع انك عارفه ردها
_طيب اعمل ايه عايزه اطمن عليها قبل ما اموت
▪︎ان شاء الله هتعيشي وهتوصليها لحد بيت جوزها
_بعندها دا شكلي هموت قبل ما اشوف اليوم دا
▪︎ليه بس كده
_الدكتور قال ان حالتي بتسوء اكتر وان لازم كيماوي
▪︎فعلا مهو مينفعش ادويه بس وانتي حالتك حارجه يا عمتو
_الكيماوي يعني شعري هيقع ... تقدر تقولي هقول لساره ايه ، شعري وقع ازاي
▪︎قولتلك من الأول صرحيها انتي الي رفضتي
_عشان مقدرش لو قولتلها كانت هترفض تكمل تعليمها عشان توفر الفلوس انت عارف ساره خدت قد ايه في مشروع التخرج
▪︎عارف يا عمتو بس هيا كانت لازم تعرف دي بنتك الوحيده
_مش هينفع يا أدم خلاص فات الوقت دلوقتي هنعمل ايه
▪︎هنشوف الدكتور الأسبوع الجاي هيقولك ايه وساعتها نحدد
_أدم توعدني لو مت تاخد بالك من المجنونه دي
▪︎بعد الشر عليكي ، صدقيني ساره في عنيا
_ولله لولا عارفه انك بتعتبرها اختك كنت جوزتهالك
▪︎انا اتجوز ساره هيا فين وانا فين انا لاقي اكل اما اكل ساره واشبع طموحاتها
_الفلوس مبتعملش رجاله ، الرجاله هيا الي بتعمل الفلوس وانت راجل يابني يعني الفلوس هتيجي هتيجي
▪︎ان شاء الله
