_ عايزة اروح اسكندرية لو سمحت
= طب ما تركبي يا انسة هو انا مانعك
_ انا بستأذن عادي
= شكلك اول مرة تركبي ميكروباص
_ لأ هي مش اول مرة بس دي اول مرة اسافر مواصلات
= عندنا في قانون الميكروباصات الناس وهي نازلة وهي طالعة بيدخلوا كلهم في بعض
_ مش فاهمة
= يعني من الاخر يا مازمازيل اركبي الميكروباص وكإنك داخلة في خناقة
_ طيب في ترتيب معين في الاماكن ولا اركب في اي حتة
= شايفة الست اللي ماسكة بط في حضنها دي
_ اه
= خليها تتزحزح شوية وخشي جمبها
_ تتزحزح
= انتي شكلك بنت ناس يا ابلة و الرقة متنفعش في اللحظات دي
_ معلش لو سمحتي هو ممكن تخشي جوة شوية عشان انا عايزة اقعد
= جرا ايه يسطا انت عارف اني حاجزة الكرسي دهو لعزوز
_ معلش يا مازمازيل خدي عزوز علي رجلك او خشي انتي في دروة كدة
= دروة ! عزوز دة كام سنة
_ كام سنة ايه يا حبيبتي عزوز دة البط اللي علي رجلي
= انتي حاجزة كرسي بحاله لبطاية وكمان عايزاني اقعده علي رجليا
_ يا انسة
= نعم
_ في مكان جمبي تقدري تيجي تقعدي
= بلاش يا ابلة
_ ليه بقي
= دة متحرش الميكروباصات العالمي هنا في المنطقة
_ والعمل
= اقعدي جمب الست فاطنة وخدي عزوز علي حجرك
_ حجري !
معلش يا جماعة مهو مفيش حل غير اني فعلا اقعد جمب الست فاطنة واخد عزوز علي حجري
= انتي كام سنة يا بنتي
_ ٢٣ يا طنط
= طنط آه صحيح نسيت انك من المجتمعات الراقية
_ لأ والله انا من عامة الشعب عادي
= مرتبطة
_ لأ
= ومش بتفكري في الارتباط
_ يعني لو جه ابن الحلال يبقي عادي يعني
= طب ايه رأيك في شلبي ابني
_ انا معرفهوش
= مش لازم اصل شلبي اسم الله عليه جزار قد الدنيا وراجل في نفسه وحمش اوي وهيعجبك
_ ربنا يخليهولك يا طنط
" بعد ساعتان "
_ قرب يا بيه قربي يا مدام
شط اسكندرية معانا ، هااا يا ست فاطنة كلمتي شلبي ولا لسة= هكلمه اهو يا بنتي مستعجلة علي ايه خدي عزوز بس وادبحيه مش انا علمتك
_ عيب عليكي يا ست فاطنة هيدبح وهيتنضف وهيبقي فل الفل
= ياللي كنتي بسكوتة انتي
_ ايوا ياسطا
= لميلي الأجرة اللي ورا عشان قربنا ننزل
_ يلة يا جماعة كل واحد يطلع الاجرة بدل ما اطلع انا المطوة وادبها في كرشكوا
= الا قوليلي يا انسة انتي مرتبطة
_ والله يا زميلي انا كنت داخلة الميكروباص سنجل بس خلاص اتحجزت لشلبي ابن الست فاطنة
= كنتي بسكوتة
_ بس اتهريت بقي نعمل ايه
" بعد رحلة الوصول "
_ يا ميكروباص زبالة مش عايزة اشوف اشكالكوا دي تاني خليتوني في ساعتين زمن بلطجية
= وشلبي
_ يكش يولع هو والمجزرة بتاعته دي كتكوا القرف كلكوا
#ميكروباص_البلطجة
#هاخدك_لشلبي_وخدي_عزوز_علي_حجرك#بسملة_احمد