Nagtungo kami sa isang mamahaling restaurant dito sa Badian. Hindi ko akalain na pumayag ako. Ang last lunch date ko ay kasama ang ex-boyfriend ko na ngayon ay nasa piling na ng iba. Hindi ko alam. Wala na akong balita tungkol sa gagong iyon at wala na rin akong panahon para makibalita.
"What do you want?" masayang tanong ni Ethan habang inilahad sa akin ang menu.
Hindi ko mapigilan ang sarili na ngumiti. Ramdam na ramdam ko ang saya niya nang pumayag ako. Gano'n ba talaga kababaw ang kaligayahan niya? I wonder.
"Nakangiti ka,"bigla niyang sambit na nagpatigil sa akin."Sana nagdala ako ng camera para makunan kita ng picture na nakangiti."
Unti-unting bumilis ang tibok ng puso ko dahil sa sinabi niya. Nang makabawi, inirapan ko na lamang siya para maitago itong nararamdaman ko. Tinanggap ko na lang ang menu at naghanap na ng gusto. Napanguso ako nang makita na lahat ng mga pagkain dito ay mamahalin.
"So..."Tumikhim siya at umayos ng upo. "May plano ka bang magtrabaho muli?"
Nasa menu ang tingin ko habang tinatanong niya ako. Lahat na nasa menu ay masasarap at hindi ako makapili. Malakas maka-romantic ang lugar sa tanghalian. The ambiance and the sweet background music made the restaurant even more unique. Maganda ang view ng restaurant dahil malapit lang ito sa dagat at dahil may glass wall, sobrang linaw talaga.
"Maybe," tipid kong sagot kay Ethan sa kanyang tanong at bumuntonghininga. Binuklat ko ang ibang pahina at nang nakita ko ang gusto kong tikman na pagkain at nag-angat ako ng tingin kay Ethan at napanguso. "Maybe magtatrabaho ako pero hindi na ako magtatrabaho sa kompanya niyo."
Pinakita ko sa kanya ang gusto kong kainin. Tinuro ko ito.
"Gusto ko iyan. Hindi ko pa natikman," pag-amin ko habang ang daliri ko ay nakaturo sa isang larawan.
"Taco?" kunot-noo niyang tanong sabay tingin sa akin.
Tumango ako.
"Ayaw mo kumain ng rice?" Kinuha niya ang menu mula sa akin at saka inilapag ito sa table.
Ipinilig ko ang ulo ko. "Diet ako, eh."
Tumango siya at agad nag-angat ng kamay para makalapit ang waitress. Tingin ko ay madalas na siyang nandito dahil kilala na siya ng lumapit na waitress.
"I would like to order one taco dish and my favorite. Alam mo na iyon," aniya sa namumula na ngayon na waitress.
Palihim akong napairap. Sigurado ako na may gusto ito sa kanya.
"Right away, sir!" excited na pagkasabi ng waitress at agad kumilos.
Palihim muli akong umirap at saka itinuon na lang ang atensyon sa mga tao na nasa paligid. Ang iba ay masayang kumakain, magbabarkada, may pamilya at iba ay magkasintahan.
Tumikhim si Ethan kaya napatingin ako sa kanya. "So, why Taco? Hindi ka pa nakakain no'n?"
"Oo, hindi kasi ako masyadong kumakain, pero nagwawaldas ako ng pera sa mga travels ko and so on."
Nailagay niya ang kanyang kamay sa lamesa at kuryoso akong tiningnan."Nagtataka ako. How the hell did you travel? I mean, sakto lang naman ang sweldo mo for your own food and some stuff, pero nakita ko mga pictures mo sa insta at sobrang daming bansa na ang napuntahan mo."
"Stalker ka na ngayon?"
Kinuha niya ang phone niya sa bulsa niya at may hinanap. Pinakita niya ito sa akin pagkatapos. Namilog ang mata ko sa nakita.
"You blocked my account on instagram kaya gumawa ako ng bago," pag-amin niya. "Para sa iyo."
Naramdaman ko ang pagpula ng aking pisngi sa sinabi niya.
