مهاب الذيب

البارت ٥٨

مهاب

عمتي: شنو تزوج عطر
امير: والله احرك الدنيا اذا صدك ناوي تاخذها
مهاب: انت بالذات اسكت
مهره: انه موافقه 😔
فيصل: شنو انتي موافقه قبل شوي احجي وياج
مهاب: شوف بويه باجر نروح لعمي نجاح نخطب عطر بس لا زفه ولا عرس ولا هوسه عقد سيد هذا الاسبوع والزواج بعد سفرنا انه ومهره
مهره: ياسفر
ابوي: ماشي بويه باجر نروح
عمتي: انه مااخطب ومااوصل وماتدخل بيتي عطر
جدتي: وشبيها عطر مره معدله
مهاب: جده سوالف معدله ومصخله مااريد تنطقيها ومحد يدخل بقراري
دعاء: مهاب لاتصدمنا بيك شلون تكسر مهره
مهاب: منو گلج اكسرها البيت كله مايهمني مثل ماتهمني مهره واخاف عليها من الهوى كل خطوه اخطيها برضاتها ومن طيب خاطر وبالاتفاق انه وياها
امير: لاتلعب بالنار
مهاب: احنه عايشين بنص النار لازم تنتهي هاي النار
ابوي: مو اول واحد اخوك يزوج ومابيها شي اذا اخذ مره ثانيه هذا انه تزوجت وامك كملت وياي وتحبني واخوك مهاب ذيب يدبرها

مهاب: مهره

اشرتلها نصعد وصعدنا سوه
بالدرج نزلت دمعتها

مهاب: تثقين بيه
مهره: كل الثقه اثق بيك لهذا انه وافقت ورضيت على كل خطوه تخطيها

دخلنا غرفتنا

مهاب: بداعتي لاتصعبيها عليها والله زواج ورق وانتي تعرفين كد كلمتي
مهره: ماتحمل الناس الي راح تتشمت اولهم عمتك
مهاب: المهم الي يضحك بالاخير مهره ساعديني وتحملي لخاطري
مهره: احبك

حضنتني نقهرت عليها

مهاب: ناوي نسافر لبنان
مهره: شعدنا
مهاب: نغير جو
مهره: بنص المشاكل ياسفر
مهاب: نسافر حتى نشوف موضوع ظهرج لازم نشوف حل علاج مااعوفج العمر كله تتأذين
مهره: تريد تموتني حتى تعرس
مهاب: ههههههههههههه شوف نيتج اتجاهي كلها سوء
مهره: انت هم نيتك سيئه من اشاقه تتهمني ميته على قصصك
مهاب: شذكرج بهذا الموضوع يعني قصدج هسه تريدين قصه
مهره: 😡
مهاب: بس تعضيني اعضج عضه ادخلج مستشفى
مهره: اخذني لاهلي
مهاب: يرحون ناسكم واخذج
مهره: مخنوكه اريد ازورهم مااشوف اسعد بداعتي مهاب
مهاب: بداعتي خليها باجر اخذج يمهم من الصبح لليل 
مهره: ماشي بس لاتخلي احد يعرف بزواجك
مهاب: مهره زواج ورق ليش محسستني زواج حقيقي
مهره: انت ماتعرف عمتك ااااه

عافتني اشوفها بدلت ونامت بفراشها

مهاب: شبيج
مهره: نعسانه اريد انام بلكه احلم بقيس محتامه عليه

ماتحملت كلامها طلعت بره ادخن
دمعت عيني قيس ابنا فراكه عذبنا

امير: مهاب

مسحت دمعتي

امير: ذيب يبجي على زواجه الثاني
مهاب: لا يازواج دمعتي ماتنزل على اشياء تافهه انه ومهره تعبنا من موتت قيس... ابني كاسرني ومهره جاي اضيع مني
امير: مهره صايره منعزله وانت حارمها من الطلعه
مهاب: بالعكس اتوسل بيها تروح وتبات يم اهلها واخواتها هي الي ترفض بس زواج مروان منعتها وتفاجأة بسهوله وافقت حتى حنت اخوها امس امي سولفتلي خلصتها تبجي ودموعها تجري