مهاب الذيب

الجزء الاول -- بارت ١٥ - ١٦ -١٧

البارت ١٥
................

مهاب

ختام: منو مهاب ويا نجاح مااعرفكم
مهاب: خاله اطمأني انه جاي من بغداد وكل خير اريد احجي ويه ام نورا
ختام: مااعرف وينها
مهاب: ام تقى بسهوله اعرف مكان ام نورا اولا اني مو همجي ولا اتعارك وماالي علاقة بعمي زين ويه منو احجي اريد زلمه
ختام: روح خاله لاتوكف هنا والناس تشوفك يكولون منو هذا
مهاب: ام تقى انه رايد ام نورا احجي وياها
ختام: تعال العصر واشوف اعمام اولادي
مهاب: انه منتظر هناك بالمحل الى ان يجي احد

بقيت مقابيل المحل منتظرين
الولد ابو المحل صافن علينا

ناصر: محتاجين شي

اشرتله تسلم

شوي واجه رجال لبيت ام تقى تقدمت عليه

مهاب: السلام عليكم
ظفر: وعليكم السلام
مهاب: انه مهاب ابن اخو نجاح زوج ام نورا الي هي اخت ام تقى شرحتلك اني منو حتى ماتستغرب واگول اني منو
ظفر: اهلا وسهلا شنو المطلوب وثانيا ام نورا مو زوجة نجاح قصدك طليقته
مهاب: انه اريد احجي ويه ام نورا
ظفر: تفضل احجي ويه زوجها
مهاب: عمي ماطلك ام نورا
ظفر: شنو ماطلك بابا روح عمك طلكها والمره تزوجت ومستقره بعد شتريدون منها
مهاب: شوف انه واكف بكل احترام ومايحتاج ولد العم اصيحهم لان اريد افهم السالفة.. احجي وياي بأدب واحترام اريد افهم السالفه لاتكول مزوجه ومااعرف شنو وهل خرابيط انه كلامي ويه ام نورا ..لاتتوقع يصعب عليه تواجدها بكل سهوله اكدر اوصل لام نورا بس انه مو مثل عمي ولا اتعارك ولا اتهجم انه اريد اسولف وياها بكل عقل وافتهم السالفه بنت عمنا يمكم وتكبر السالفه وتصير عشائر ودموم حتى بالقانون الاب اله حق يشوف بنته اذا فعلا مطلكها
ظفر: شتريد
مهاب: اريد افهم السالفه

صفن ودخلني لبيت ام تقى
شوي واجت ام نورا

افراح: السلام عليكم
مهاب: اهلا ام نورا
افراح: شوف بنتي ماانطيها وماتزوج لو تصير دموم اذبحها وادفنها وماازوجها
مهاب: بالاول اكعدي ام نورا وصل على محمد
افراح: اللهم صل على محمد وال محمد
مهاب: خلينا نسولف وحدنا
ظفر: اني زوجها والي حق اتواجد
مهاب: شلون يعني زوجها ام نورا على ذمة عمي
افراح: لاتسوون هذه السوالف سيد ومحكمه اطلكت من نجاح
مهاب: ام نورا اني مثل الاطرش بالزفه تعرفين ليش دزوني
افراح: ليش
مهاب: ممكن نحجي اني وانتي

طلعت هي وظفر وشوي واجت

افراح: شكو مهاب
مهاب: اولا انه مااريد بنتج وماافكر بيها وخاطب
افراح: يعني ماجاي تاخذها
مهاب: مستحيل اخذها صح اجيت اخذها لان سمعت حجي موزين
افراح: شنو
مهاب: الي فهمته ام تقى موزينه وبتنا وياها ساكنه وعلى اساس انتي شارده رغم والله انه ماتقبلت كلمة شارده وعادي تصير مشاكل بين المزوجين وازعلين يم اهلج وشفتي انه وابوي ماوصلنا للمحاكم وضد عمي الكل تعارك وياه ليش زعلتها وهي باعت اهلها لخاطرك
افراح: اكيد كام يطعن بشرفي ويخلص نفسه
مهاب: اريد اعرف الموضوع
افراح: يوميه يضربني ويموتني اله ازوج نورا لمهاب اله انطي بنتي ومهاب خطب بنتي واذا ارفض عمامي يطردوني وتريدين تخربين علاقتي بأهلي ويتبرون مني
مهاب: ههههههه على نورا نتبره شهل كلام
افراح: كام يأذيني اخر مره هددني ياخذها ويشمرني بالشارع اني خفت على بنتي اجيت يم اختي واختي وكفت وياي حماها ظفر ساعدني واقسم بالله وعيون بنتي الوحيده
مهاب: ام نورا لاتحلفين نعرف اخلاقج
افراح: والله محافظه على شرفكم الى ان اطلكت وزوجني ظفر سيد ومحكمه هسه اشوفك اوراق طلاكي من عمك وزواجي من ظفر
مهاب: وظفر مستقبل نورا
افراح: بعيونه مخليها بس نورا بعدها ماتعرف اني تزوجت اخاف على نفسيتها لان خطيه تركت سنه مدرسه بسبب مشاكلنا انه وابوها شافت مشاكلنا ونورا متغيره بس ساكته وماتحجي تعرف بنت عمك ماتعرف شنو لبس بنات تعرف بنت عمك ماتعرف شنو تلفزيون ماتعرف شنو شارع ويوميه يدمغها من يشوفها ترجع من المدرسه طفله شتتوقع شيصير بيها
مهاب: احنه مانعرف بهذا الشي
افراح: شفت هسه يشوه سمعت ام بنته وبنته شتترجى من هيج رجال
مهاب: والله مااعرف شحجي انه ناوي اهد واتعارك بس فكرت لا اتسرع اسأل عنكم واستفسر واسمع منج واقرر
افراح: تنازلت عن كل شي حتى نفقه وحقوقي ما اريدها خلي يعوفني بحالي اني وبنتي
مهاب: لا شلون ابوها من غصبن ماعليه يصرف عليها
افراح: مااريد
مهاب: احنه عمامها نريد ونورا بنت عمي ومن غصبن ما على عمي يدز مصرف لبنته
افراح: مااريد انت ما تعرف عمك
مهاب: اني اساعدج اخذ حقج وحق نورا
افراح: والله ياابني ما أريد شي اذا تريد تساعدني خلصني من عمك يجفيني شره
مهاب: ام نورا هذا رقمي اي شي تحتاجين اتصلي عليه اني راح اسولف لابوي سوالف عمي وثقي مانعرف بهذا الشي
افراح: ليش عمتك صبيحه مو عايشه وياكم ماتسولفلكم
مهاب: عن شنو
افراح: اجت هنا هي وعمك لعبوا لعب بلعد والصف والغلط والفشاير فضحونا بالمنطقه وهم سكنا ماكبرناها وكل الي اني بي سببه صبيحه
مهاب: والله جاي اخجل من هذا الكلام مااعرف شحجي شسولف
افراح: ليش محد يوصل النا ليش عايفيني وحدي ويه عمكم