يوم الجمعه من الصباح قمتا لبستا عبايتي و اتخمخمتا بالطرحه لافاها في وشي😂 و الشرابات والجونتات بس العروس الحابسنها 😂 ويا سوق امدرمان جاك زول .. جري على محلات الزيوت ورا عااارفه دربها بي وين لكن ما بمشيها كلو كلو🐸 هسي عشان خاطر اسمر عايزة ابقى بت .. مشيت محلات الزيوت والعطارين اها ما عارفه اشتري شنو ولا ابدا من وين وقفتا في نص السوق اعاين وابحلق في الماشه والجايه وخفتا زمن الصلاه يجي ويقفلوا بالله البنات ديل بصحوا من النوم ويجروا للسوق كانوا العيد يحليلي انا ما بشوفوا الا لمن امي ترسلني للفسيخ 🐸اها بس لمحتا بت مااشه كده حلااااتها العيون ماشاء الله غزاله بس و اللون ده نضيييف يلمع بالله البت شارده من الجنه يقرب الزول يبلعها بي نعلاتها ❤️😍💋 .. بس جررريت وراها ماشه بالسيسي كل ماترفع راسها تعاين لي حاجه ارفع راسي معاها تخش محل تتفرج اخش وراها اها لافه وراها زي القطر كده لفلتني السوق كلو لمن رجليني فترو والبت ما اشترت شي .. مشيت وقفتها قلت ليها لو سمحتي اتلفتت قالت لي اتفضلي ! عاد انا بت و هي بت😭😭😭 قلتا ليها ممكن تمشي معاي محلات الزيوت ؟ بصراحه انا ما بعرف حاجه و شعري ده مقصف وناااشف و واقف اربعه وعشرين ساعه و قصير .. ضحكت كده وحكت حاجبها وعاد الحاجب ماشاء الله هلال بس😍 قالت لي طيب ارح معاي اوريك .. بالله في بنات ظريفات كده وما غتيتات ! والله السودان لسه بخير اتبسطتا بسطه منها ومشيت معاها وصلنا عطارة التيمان البت مشت محل قالت ليهو اديني زيت خروع ونارجين و زيتون وجريجر و الحبه السوداء و زيت سمسم و شمع اصفر وغايتو كان في زيت بقدونس كان اشترتو وكملت لي قروشي 😳 غايتو كتمتها في حناني سويتها براي في روحي 😭 قالت لي ادفعي دفعتا وانا خشمي عندي .. بعدها مشينا الحتبو محل الودك 😳 قالت ليهو اديني نص رطل ودك ابيض صاااافي اشتريناهو صااافي بعدها اشترت زنجبيل 😳 عاد البت دايره تبقيني ممياء .. بعد سلمتني الاكياس قالت لي اول حاجه تعمليها زيت السمسم والزنجبيل تغليهم مع بعض و بعدها تضيفي الشمع الاصفر تذوبيهو فيهو و بعدها تضيفي الودك حبه حبه ليهو لحكي ما الودك كلو زيوت .. في ماعون تاني تلخبتي الزيوت الكتيره دي كلها مع بعض و بعداك تضيفيها للخليط بتاع النار .. في كريم اسمو ياردلي تجيبي منو علبتين تشتريهو من الصيدليه احسن ده تضيفيهو بعد خليط النار ده يتقل وبعدها تخليهو يبرد وكده بكون بقى جااهز و تختيهو في علبه .. تتمسحي الصباح و تلفي راسك كعكعات و قبل المغرب تغسلي شعرك ما تنومي و هو مزيت لازم تواظبي على المسيح كده كل يوم عشان شعرك يلن و يطول و ح تدعي لي انا متأكده ميه الميه❤️ قلتا ليها تسلمي وماقصرتي انتي كان كل البنات زيك الدنيا لسه بخيرها .. قالت لي تسلمي قلت ليها طيب بالنسبه لي لوني قالت لي انتي لونك حلو كده ما تفتحيهو بس تعالي معاي اوريك تعملي شنو ! مشينا لمكان الكريمات اشترت لي بيبي اويل و بودرة اطفال و جليسلويد كريم قالت لي تلخبطيهم و ببقوا كريم بنعم و بنضر بالنسبه لي وشك ماء الورد ده تمسحيهو بيهو و كل فتره تعملي تقشير بي ليمون و سكر و لبن بدره في الاسبوع مرتين.. بالليل تمسحيهو بي كريم مرطب زي الالوفيرا برضو تشتريهو من الصيدليه و بس تكتفي بي كده عشان لونك يكون نضر و نااعم و هو اسمر حلوو .. بالنسبه لي رجولك التحت اشتري حجر و اكرشيهم لأنو منظرهم ما حلو كده بالصراحه و بالليل امسحيهم بي جلسرين و زيت زيتون والبسي شرابات و نومي تمام ! .. قلتا ليها كتر خيييرك كتييير والله ماقصرتي قالت لي العفو ياخ و ودعتها و مشيت ركبتا المواصلات عاد معنوياتي مرتفعه بسمع في غنية نانسي عجرم " بعد مارتبت ترتيباتي اني انت طلعت من حياتي 💃" لحدي ما وصلتا البيت لقيت زهره منتظراني قالت لي نفطر و نمشي فطورنا كان عباره عن جبنه و خيار وعيشه رجيم اكلنا و شربنا برتقال بدون سكر و صلينا وطلعنا للكوفير بعد العصر كده .. مشينا لاول مره اعمل حمام مغربي و اشيل وشي وحواجبي ❤️ عاد انا لمن ما اتعرفتا على نفسي و الجيهه سمحه يا خوانا 😭😭😭 سجلنا في المعهد بعد المغرب ليوم السبت والاتنين والاربع رجعتا البيت امي تعاين لي من فوق لي تحت قعدت تضحك 😂😂 قالت لي والله لكن طلع عندي بت قلت ليها اها ما تخجليني ياحجه ادتني دعوه كده سمممحه ودخلتا نمتا مبسوووطه ❤️ الصباح قمتا مجتهده عملتا الحاجات لي شعري ودخلتا غسلتو وعملتا زي ما البت قالت و بديت استعمل لمن حسيت براحه كده عجيييبه .. المغرب جا ولبستا بنطلوني و نزلتا للزومبا مع زهره اها لما ماشين في الشارع لقيت اسمر داخل الميدان😍 بس زهره قرصتني وقالت لي اوووعك كفايه فضيحة اليوم داك من وراي 😒👋 ارح وانتي ساكته اووعك تتلفتي لما قربنا لباب المعهد هو مقابل للظلط كده و المعهد فاتح في الظلط و الجهه التانيه فيها بيت اسود كده رهيييب 😍😍 انا كنت قايلاهو بيت وزير ولا حاجه .. بس عيني ما تشوف الا النور الزول الطالع منو الولد 😳 المسطول اللقيتو في الاستاد 😳
