#عديل_الروح
همس القوارير
(بيج قصص همس القوارير)
البارت الاول
عديل الروح او تؤام الروح اطلقها على شريك حياتي ورفيق دربي وسلوة فؤادي الذي يراني بعينه كل شي في حياته واراه الدنيا وما فيها ربما يكون صديق او يكون اخ او يكون حبيب فالمعنى قربه من روحي
اني معتز شاب بمقتبل العمر اعيش ويه عائلتي متكونه من اثنين بنات تؤام وتلاثه اولاد خواتي زهراء وحوراء واخواني مهدي ومروان واني معتز وامي وابويه بيتنا ملك ألنا وكبير حيل وابويه صاحب سوبر ماركت كبيره تسلسلي اصغر الاولاد والبنات يجن وراي الحمدلله عيشتنا خير من الله مرات واكثر الاوقات اني الي اطلع ويه ابويه للشغل اخوي الكبير مهدي متزوج عن حب وهوايه صارت مشاكل بالعائله لحد ما اخذ حبيبته وبيته لوحده عنده بنيه مهجه هذه لوحدها عشق عندي اصدقاء اثنين مقربين ألي حيل قريبين على روحي سيف وعلاء هذول اخواني الي ما جابتهم امي ناكل سوه ونشرب ونام ونطلع لو ادوس ابطنهم ما يزعلون حالهم من حال اخواني نشكي البعض ونشارك بعض حتى بالمصرف سيف وعلاء نفس فرعنا وبيوتنا متقاربه اني وسيف نفس العمر وعلاء اكبر منا بسنه ونفس المدرسه لان تارك سنه
امي
معتز يمه دگعد دومك شالع گلبي من دون اخوانك
معتز
والله گعدت شبيج يا يمه الدوام بثمانيه وتگعديني بالسته
امي
يمه غير تتنشط شويه تروح للمدرسه فاهي
معتز
يمه فدوه نص ساعه گعديني بالسبعه فدوه
امي
يلا بالسبعه اگعدك
طبعا نومت الصبح احلى شي عندي شگد عزيزه هنوب الفراش دافي والغرفه ضلمه ميعجبك تگعد ابد راحت امي
اخذتلها فره ربع ساعه ورجعت گعدتني
امي
ديلا يا بعد امك متت من الروحه والجيه
معتز
روحي حجيه گعدت وجاي وراج
لا ماكو فايده اگعد احسن لان ادري بيها ما تعوفني اووف يا نبع الحنان
كعدت غسلت وبدلت دورت على عطري لگيته واگع جوه الميز رشيت منه گوه لان مخلصه الشيشه طبعا تخلص اذا مروان افندي يسبح بيها اخذت كتبي ونزلت لگيت امي وابويه گاعدين يتريگون بست راس امي وراس ابويه وتريگت وياهم ولگيت همين البنات جاي عليهم السايق بالسبعه لان بيتنا بعيد عن مدرستهم خطيه يفر بيهن عالبنات وهن وياه يرجعن دايخات من السياره لان اول الناس يمر عليهن بالنسبه ألي انه اخر سنه الي بالسادس علمي كملت ريوگي واخذت مصرفي من ابويه وطلعت عالولد سيف وعلاء طلعنا اني وعلاء وسيف لحگنا يلبس بحذائه ويركض ورانا دومه متاخر رحنا للمدرسه ومن نتعدى يوميه نشوفه لابو اللبلبي ابو رقيه يم مدرسة الابتدائيه خطيه يسترزق
معتز
صباح الخير ابو رقيه
ابو رقيه
هلا بالشباب صباح النور متجون تتفضلون
معتز
تسلم الف عافيه مستعجلين والله
سيف
شبيكم خلونا ناكل والله حار ويخبل وعليه فلفل وليمون يشهي بشرفكم اوكفوا
علاء
امشي ابو بطن لبلبي من الصبح انت خبل لو عايزنا اغبياء بعد
سيف
ليش تحسسوني اني ابن الخدامه والله حرام عليكم تعبتوا نفسيتي
معتز
لا حبيبي امشي لا بدفره اخليك گاعد بصفك
هذا ابو رقيه خطيه اب لاربع بنات مسؤل عن عائله واحنا بين فتره وفتره نتسوگ وندزه اله للبيت لان ما يلحگ عالعيشه المسكين دخلنا المدرسه وبوجهنا استاذ معاذ احنا نسميه والعياذ هههه من كثر ما مأذينا هذا حتى اسئلته يجيبها من كوكب ثاني كلش ما يرحم بحالنا وخطيه سيف رسب من وراه وبقى بالخامس وشگد حاولنا وياه بس يساعده بدرجه وحده ومقبل كلش عاند ويانا وسيف عاد سنه كامله علمود درجه حسبي الله عليه
سيف
اوووف لا هلا ولا مرحبا بيمن صبحنا اليوم
معتز
اليوم التشاؤم عندي فووول لان شفت هالتطوه
علاء
معودين عوفوه ما عدكم سالفه غيره لا تخلونه براسكم
معتز
شنو شكاله خو ما شكاله حتى اخليه براسي
سيف
هههههه معود لو شكاله جان كسرتها ودستها برجليه وارتاحيت منها
وگفنا باب الصف مالت سيف وصاح عليه المدير مدير مدرستنا صديق خالي كلش يعزه
المدير
معتز خالك ماكو صارله يومين خيره بيه شي
معتز
لا استاذ البارحه تعشى يمنا بس يمكن مشغول او شي لان موبايله واگع منه ومكسور
المدير
هاا اي مو ادگ عليه وماكو من تشوفه گله يمرلي اريده
معتز
ماشي استاذ
رجعت للولد سولفت وياهم شوي وبعدين دخلنا صفوفنا
لحكايتي بقيه 💕
