ضلينه نصلي اني وماما وندعي
وبالموت صبرنه للعصر طبينه للغرفه لبابا
گعدته ماما حيدر حيدر
ماما فتحت عيونهه مثل المخبله وصرخت حييييدر
وهم ماكوو رد اتخبلنه انهارت اعصابنه ضلينه اندك ونلطم ماما گعدت بالگاع وتصرخ. راح رجلي يايمه
اني مااجه ابالي احد غير علي وگووه كدرت اتصل من گد مااعصابي تلفت وعيوني غوشت من البچي
امنيه..علي الحگ بابا مات مديحجي ويانه فدووه الحكلي
علي..جاي جاي هسسه
ماكوو اقل ربع سااعه علي اجه وابو وأمه ونقلوا بابا للمستشفى ومقبلوا نروح للمستشفى ضلت يمنه خاله ام علي وهم اخذوا بابا
بس ماما كلت رح يصير بيهه شي
وأني اتخبلت يمه بابا يعوفني يمه كل دنيتي يفارگني لاااااااا الهي اروحلك فدوه البارحه اشكرك انطيتني كلشي اخذ كلشي مني الا بابا.
ربي ارحمنا الهي فدوه اروحلك باوع لحالنه انت ارحم الراحمين ارحمنه بعدين مكدرت اتخيل الموقف شلون بابا يموت ضليت ادك ع راسي واگطع بروحي وشگيت هدومي كووه لزمتني خاله وماما وشبگتني
گتلهم ودوني هسه اله لااحرك روحي والله اكتل روحي اذا هسه متودوني اخذنه تكسي ورحنه اني وماما وخاله بالطريق خابرت ع علي واسمعه يصيح لتجيبون امنيه رجعوهه گلتله يمه شلون ارجعهه اتخبلت اكلك رادت تنتحر شتحجي انت موتت روحهه كول انتوا وين اطلع النه للباب
وصلنه واني اركض مثل المخبله احس روحي بغير عالم مااحس اكو بشر الدنيا ظلمه بعيني معقوله تروح من ايدي بابا معقووله لااا يالحنين يبو كلب الطيب ادري متعوفني ربي اخذ عمري هسه اذا بابا بي شي اركض واحجي ويه روحي مااحس الا لزمني واحد باوعتله علي لزمت بقميصه كل قوتي علي گلي بابا ميعوفني هو واعدني ميعوفني ابد علي احجيلي شبي علي دموعه ضلت تنزل وحضني كل قووووووته وگلي والله مابي شي وصحه وحاليآ خلوله مغذي شويه الضغط هابط حسيت برااااحه هم لأن علي طمئني وهم لان اول مره يحضني شنوو من حضن شنو من حنيه افيييش ياريحتك حبيبي رغم كل الحااله الاني بيهه بس حضن علي صحاني هو حس ع تصرفه ووخرني وگال يله تعالوا شوفوا عادي
ماما سوده عليه راكضه قبلنه وخاله وراهه طبينه صاحلهم علي طلع عمو زيد وگلي بنيتي امونه ادري بيج انت قويه موبهالضعف ليش ياحبيبتي والحمدلله بابا مبي شي وازمه وعدت
امنيه..عمو متعرف يعني شنو بابا بالنسبه اليه متدري هو اوكسجيني متدري هو حياتي وعايشه لعيونه متدري هو كلشي اليه بهالحياااة بعد عينه شسوه
الله عليك عمو شبي ليش جان ميصحه
ابو علي..والله ياعمو اريد اسئلج ابوج متعرض لصدمه صاير وياا شي مشكله
امنيه..لا مااعرف عمو بس ليش هو اجه تعبان حيل وگال العصر كعدوني ونگعده ميكعد
ابو علي..اي بنيتي الدكتور گال متعرض لصدمه قويه او مشكله مخليه عنده انهيار عصبي ونفسي وضغطه هابط لهذا مغمى علي لااراديآ والحمدلله عدت وشي بسيط
ديحجي عمو وجاان بابا گال امنيه مياده
رحتله لزمت ايده وابوس بيهه يبعد روح امنيه يبعد عافيتي بيه ولابيك
وماما لزمت ايده الثانيه شبيك يروحي ليش هيج سويت بروحك واخذت روحنه وياك
حيدر..الله ليحرمني منكم حبيباتي
اندار ع عمو ابو زيد وزوجته وعلي وگلهم اشكركم بدونكم ماادري شسوي
بابا باوع نظره غريبه حيييل لعلي ومعرفت ابد تفسيرهه
بعدين صااحله وگله ابني علي ابريلي الذمه وسامحني
علي..ليش عمو
بابا..لان عذبتكم وبهذلتكم بالمستشفى
علي..لاعمو خوماكوشي مبيناتنه هالشي احنه اهل ان شاءالله
بابا..ان شااءالله حبيبي
لحد الليل طلعنه بابا من المستشفى
واني ضليت دايخه بنظرة بابا وگلبي رجف من اتذكرهه اوف ربي شكوو رح اتخبل مديجمع عقلي هم وكعت بابا ع فجأه هم نظرته لعلي هم صيحته اله وگله ابريني الذمه ياربي اعرف اكوو شي بس شنووو مااعرف حلقة وصل مقطوعه
المهم حضرنه العشه وماما توكله لبابا واني شابگته ومخليه راسي بحضنه وكلساعه وماما گلتلي وخري مضايقتنه بالاكل
يگلهه عوفيهه خليهه اني اريدهه يمي مرتاح ويبوس بيه وبأيدي
شوويه اندگت الباب باوعت بالكاميرا صحت ياا ذوله بيت عمو زيد عزززززا واني بهالمنظر
جنت لابسه تراك وشعري ذيل حصان وبلا مكياج يعني فكرت شلوون يشوفني علي هيج خلي اروح ابدل ضحكوا
وبابا گلي شلون نعوفهم بالباب لحد ماالاميره تكمل تبديل
لااااا لا گومي ميدو افتحي الباب ورح اروح ابدل بسرعه وانزل عيب چني متسوله
اووي يمه ريحة حبيبي بالبيت اشكرك ياربي گوملي بابا بالسلامه واحفظلي حبيبي علاوي وتمم زواجنه وسعادتنه
لبست بدي ربع ردن مقلم بسيط وبنطرون هم بسيطات عيب حتى ليكولون خابصه روحهه
رغم شكلي ميساعد لأن تعبان من البجي وماكو مكياج ملحكت
المهم نزلت سلمت عليهم وقدمتلهم عصير وكيك وعلي عيونه ميشيلهه عني حتى دزيتله ع الڤايبر وخر عيونك عني اهلي انتبهوا
علي..خلي ينتبهون هو بعد يومين انت بحضني وخلي عوود يسوون شي
ابتسمت فدوه لعمرك حبيبي
علي موبايله كلساعه يدگ ينطي رفض رفض وارتبك علي اني گلبي لعب وقلقت
الا ان من دگ موبايله طلع لو اني اتخبلت شلون ياربي الحگه يشكون خرب شلوون اخذت عصير بحجة دااشرب ووگعته ع روحي وباوعولي ويله فدوه فدوه ركضت عود دااغسل كعدت اتصنت
سمعت علي يحجي ويه بنيه يگله اي شبيج بالليل احجي وياج عود كافي تتصلين العام شكت وضلت تباوع
اي اي ابيت امنيه دنأدي واجب شلون يعني الا اكوو شي
بطلي سوالفج وخبالاتج يله ارتاحي وبالليل احاجيج
بابا عيب شنو اكلج احبج مناا عالم بالليل نحجي يله حبي باي
اني بعد رجليه متشيلني ااخ گلبي انزرف شنوووووو علي يخووني علي عنده غيري اندار علي وشافني ضل مصدوم اني محجيت بس دموعي تجري
ياربي ثگلي حمل صدمتين بنفس اليوم راد يجي اني رأسآ صعدت لغرفتي ومضل شي صااحي بالغرفه وكطعت روحي ويمي تحفيه كسرتهه وشگيت ايدي
وبعد ماادري بروحي شصار مصاار مكعدت الا ع صوت امي وتعيط وتصرخ يمي يايمه ابنيتي وبابا اجه يركض وشالني فتحت عيوني شفت ايدي وخدي والگاع متروسه دم صار عندي نزيف قوي وشگد محاولوا يضمدوا للجرح يطلع من فوگاا الدم ودوني للمستشفى گالوا خياطات لأيدهه اذا متوقف الدم
حاولوا والله وگف الدم بس اني مااشوف بعيوني مغوشه ودوخه وراسي من گد ملطخته بالحايط احس صار انفجار بي
رجعنه لگيت علي فوك ال1000 رساله ومكالمه
باوعت لطخت الموبايل بالحايط ورجعت خليت راسي بين رجليه وابجي بچي بحرگة گلب ونار
معقوووووله علي مدااصدك هذا اليعبدني اجت ماما جابتلي اكل مقبلت اكل ضلت تبجي تردين تموتيني يمه ليش هيج سويتي امنيه لييييش احجيلي
شصاير وياج مااگدر احجي كتلهه اريد ارتاح طلعت ماما للباب اني صرخت ماما الحگيلي رااااسي واتقيئت امي صاحت يبووو يايمه بنتي ودوني للمستشفى تجيك ومفراس صارت عندي شقيقه
امي تبجي النوب تحليل دم ميطلع دم ولاقطررره اتخبل الدكتور سوالياا باوعلي گلي هاي شبيج انت بابا شنوو شصاير وياج هم شقيقه وهم التهاب حاد بالمعده بسببه متتقبلين الاكل
ماما الطريق كله تبجي وتدعي ياربي لتختبر صبري لا بحيدر ولاامنيه تعرفني اموت بدونهم اموت لو صار بيهم شي
واني مهتميت لاي شي بالي كله شلون علي يخون شلوون يگلهه حبي شلون يحاجيهه ويحاجيني
وشنووو يريدني زواج وهو يخونيي
رجعنه ماما جابتلي اكل مااكلت مااريد خليني ارتاح
اجتني نور العصر شافتني رأسآ شهگت يمااا شبيج ولج كانونه بايدي. لان عندي ابر وايدي الثانيه مشدوده من وره الشك
شبكتني واني انفجرت بجي ولج موتني نور موتني
هي اتخبلت وتمسح بدموعي ولج انت الموتينا لاتليفون ولانت ولادوام ولاتفتحون الباب من نجي عليج لييييش امنيه
اااااخ نور نار گلبي تسعر ولج علي يخون ولج علي يلعب عليه
نور..شنووووووووو شنوو تعالي فهميني شكوو شصاير
امنيه..نور يكلهه حبي نور يكلهه بالليل احاجيج
وج ينكر علاقته بيه يكلهه تأدية واجب الا عندي شي
نور..معناهه هاي تعرفج الحجه وياهه اني الك ياعار وخبلني روحي شوفيهه الخاين اني اعلمه
يله رايحه اني ويصير خير
امنيه..نور لتعوفيني لتخونيني
نور..تعالي بحضني ولج انت اخيتي وروحي شلون اعوف روحي فدوه اروحلج اكلي
امنيه..مااگدر اكل معدتي نار
نور..خاله خاله شنو طابخه انطيني نريد ناكل
مياده..اي خالاتي هاي كبة برغل وبرياني امنيه تحبهن وزلاطه وكلشي وسويتلهه شوربه هم زينه لمعدتهه
نور..يلا افتحي حلكج وتاكلين
امنيه..نور مااگدر
نور.اششش حقج يجيج لبابج تاكلين وتنجبين بلا دلال ومدام اختج موجوده شوفي شراح اسوي بس اوعديني تديرين بالج ع روحج وارتاحي لتداومين اني يوميه اجيج .....
وللمشوار تكمله كونوا في الانتظار
احبكم
#ســـرى حــامد
