بركان أنشقاقي

* الفصل السابع عشر *

بسام:عملت ايه يا حج
عمار:عملت ايه في ايه ؟!
بسام:في اللي اتفقنا عليه
عمار:اللي هو ايه ؟
بسام:في ايه يا حج ، ما تقلقنيش .. موضوع جوازي من بنتك
عمار:اهااا
بسام:سألتها ولا لا يا حج ؟
عمار:بصراحه يا ابني سألتها
بسام:و كان ايه الرد يا حج ، قالت ايه ؟!
عمار ببردو:قالت انها مش رافضه
بسام بلهفه:يعني ايه ؟
ضحك عمار علي لهفه بسام و اتكلم ....
عمار:يعني موافقه
بسام بفرحه:ده بجججد !!!??
عمار بضحك:اها و الله بجد
بسام:طب امتي ، قالتلك امتي ؟ انا هاخد لها الشقه ال هي عيزاها هنا لحد ما اخف بس ، و ارجع حياتي و هاخدها ماكان ما تحب
عمار:و هي مش عايزه حاجه هنا دلوقتي
بسام بإستغراب:يعني ايه !!?
عمار:يعني هتعيشوا معايا هنا ، لحد ما تبقي كويس و تشوف هتروحوا فين .. و انا اللي عايز كده و ما عنديش اي اعتراض
بسام:لا يا حج عمار ، انا عايز اسعدها و افرحها
عمار:و هي عارفه انك هتعمل كده ، لما كل حاجه ترجع لطبيعتها .. بس هي دلوقتي هتبقي مبسوطه و انتوا قاعدين هنا اكتر .. عشان تبقوا في امان حتي
سكت بسام شويه ، و عمار اتكلم ....
عمار:ها يا ابني ، قولت ايه ؟
بسام بتفكير:اللي انتوا عايزينه يا حج انا هعمله
عمار:يبقي خلاص اتفقنا
ابتسم بسام ، و اتكلم بفرحه ....
بسام:اتفقنا
عمار:نقرأ الفاتحه بقي
بسام:يالا ...
( روايات بسوم )
___________________________________
عند نادين في البيت .....
قاعده و بتتكلم في الموبايل مع تيسير ....
نادين:و بعدين ، هتيجي امتي ؟
تيسير:هاجي الصبح ، بس انا عايز اعرف بردو بتفكري في ايه ؟
نادين:انا اتأكدت خلاص ان الجلسه اخر الشهر
تيسير:طب ما انا عارف
نادين:امممممم يعني مش فاضل كتير
تيسير:هتعملي ايه ؟
نادين:ما انت عارف
تيسير:لا انا عايز افهم بردو
نادين:بكره هتفهم كل حاجه
تيسير:ماشي ، انا هاجيلك الصبح
نادين:طيب ، ما تتأخرش بس
تيسير:مش هتأخر
نادين:تمام .. هستناك
تيسير:اوك ، سلام
نادين:سلام
( روايات بسوم )
___________________________________
تاني يوم الصبح .. عند مبني الصحافه .....
ايسل وصلت قدام مبني الصحافه ، و قبل ما تطلع ، لحقها فارس و وقفها و اتكلم .....
فارس:ايسل
وقفت ايسل بصتله ثواني ، و اتكلمت .....
ايسل:فارس ! نعم ؟
فارس:ايوه فارس ، عايز اتكلم معاكي
ايسل:تتكلم معايا في ايه ؟!
فارس:ممكن طيب نبعد عن الشغل شويه و نتكلم
ايسل بتفكير:ماشي يا فارس ، لما نشوف اخرتها
مشيوا هما الاتنين بعيد ، و وقفوا يتكلموا .....
ايسل:نعم يا فارس ، عايز مني ايه ؟
فارس:عايز اصالحك
ايسل:تصالحني !! هو حصل حاجه منك اصلا عشان تصالحني ؟!
فارس:ايوه حصل ، حصل كتير .. بس انا فوقت خلاص و الله
ايسل:فوقت بعد ايه ؟!
فارس:عارف انه فات كتير ، بس احنا ممكن نرجع اللي راح
ايسل:ازاي يا فارس ! هنرجع اللي راح بالسهوله دي ازاي !?
فارس:واحده واحده هيرجع ، و بعدين انا اتأسفتلك .. المفروض انك تسامحيني بقي
ايسل:انت بتقول ايه !! بتقول انك اتأسفت ؟
فارس:ايوه اتأسفتلك ، و قولتلك هنفتح صفحه جديده
ايسل:بعد ايه ؟ بعد كام جرح جرحتهولي ! بعد كام وجع و كسره !!? انت عملتلي كل حاجه تفرحني ، بس كسرتني اد ما فرحتني .. انت بتدمرني و انت مش حاسس ، و جاي دلوقتي بكل سهوله تقول انك اتأسفت .. مين قالك انك اتأسفت ؟!!
فارس:انا مش مجنون ، انا فاكر كويس .. انا اتأسفتلك و قولتلك حقك عليا ، و بعد كده وعدتك اننا هنفتح صفحه جديده .. و ان كل اللي فات ده كان غلطه و هنصلحها
ايسل:غلطه و نصلحها ! بالسهوله دي !!? عارف انت اتأسفتلي ليه ؟ عارف انت قولت الكلام ده ليه !!
بصلها فارس بإستغراب ، و رد عليها بتسائل ....
فارس:ليه !!
ايسل:عشان كنت سكرررررااااان ، قولت كده عشان سكرااان و مش في وعيك .. و لحد دلوقتي سكران ، و لما تفوق هترجع تاني زي ما كنت
فارس:لا انا ....
قاطعته ايسل بسرعه ....
ايسل:انت ولا حااااجه .. انا مش بحبك
بصلها فارس بصدمه ، و رد و كل كيانه بيتهد ....
فارس:ايه !!!
ايسل:ايوه مش بحبك ، انت كسرت كل حاجه بينا بتصرفاتك و قساوتك و غرورك و وجعك ليا بكلامك و افعالك .. كسرت كل حاجه لما كنت فاكرني ضعيفه و بسامح و بنسي ، لما فكرت اني هفضل طول عمري كده .. ماكنتش تعرف اني هيجيلي يوم و اقول كفايه ، حتي لو روحي فيك ، هتمني الموت احسن .. مابقيتش عيزاك يا فارس ، انا بجد ما بقيتش بحبك ، انا بقيت بكررررررهك
اتصدم فارس من الرد ، و وقف مكانه ولا قدر يتكلم ولا يتحرك .. و انهارت ايسل من العياط و سابته و مشيت .....
( روايات بسوم )
___________________________________
بعد ساعتين .. عند نادين .....
وصل تيسير عندها البيت ، و بدأت تفهمه نادين علي كل اللي في دماغها ، و اتفقوا علي اللي هيعملوه ، و جهزوا كل حاجه عايزينها .. و تيسير عرفها هتعمل ايه و هتقول ايه .. و عدا اليوم علي كده .. و عدا بعده يوم و التاني .. عدوا علي نادين في التخطيط ، و علي چمانه في عذابها مع ثروت و نضال .. و علي ايسل في العياط و الزعل .. و في تالت يوم ....
( روايات بسوم )
___________________________________
الساعه 7 بليل ، في بيت عمار ....
عمار قاعد و جنبه المأذون و جنبه بسام .. و بعد ما كتبوا كتاب ، و البيت كله ناس و الفرحه ماليه المكان كله .. نده عمار علي روميساء ....
خرجت روميساء بالفستان الابيض من اوضتها ، و هي في قمه الجمال و الخجل .. قام بسام بسرعه مسك اديها و باسها .. و مشي معاها لحد المأذون ، و مضوا هما الاتنين علي القسيمه .. و قام المأذون مشي ، و كان يوم جميل و هادي عليهم .. و بعد ما خلصت الحفله البسيطه اللي في بيت عمار ، مشيوا كل الناس و مشي عمار معاهم .. و قعدوا بسام و روميساء مع بعض ، و بسام اتكلم ....
بسام:انتي جميله اوي النهارده
بصت روميساء في الارض بكسوف و ما ردتش ، و بسام كمل كلام ....
بسام:كان ليا حق لما اختارتك .. اكيد ربنا بيحبني عشان كده رزقني بملاك زي ده
سكت ثواني و رفع وشها بأديه و بعدين مسكه باديه الاتنين ، و اتكلم و هو بيبص في عنيها ....
بسام:النهارده بجد احلي يوم في حياتي .. مش مصدق اني قاعد قدامك كده ، عارفه احنا ما اخدناش وقت كتير عشان نوصل للحظه دي .. بس كنت حاسس ان الوقت اللي فات من غير ما اكون قاعد قدامك القاعده دي ، كان سنين .. و سنين عذاب كمان
ابتسمت روميساء اوي و هي باصه في عين بسام ، و اتكلمت بهدوء و حب ....
روميساء:بحبك
اول ما سمع بسام الكلمه دي ، قام وقف و كان طاير من الفرحه .. و شال روميساء علي اديه الاتنين ، و طار بيها زي الحمام علي عشهم الصغير ....
( روايات بسوم )
___________________________________
الساعه 10 بليل .. في بيت مادلين .....
قاعد ثروت في المكتب ، و نده علي چمانه .. خرجت چمانه من المطبخ بسرعه ، و راحتله .....
چمانه:نعم يا دكتور ثروت
ثروت:شيلي فنجان القهوه ده ، و اعمليلي الحليب بتاعي عشان عايز اشربه و انام
چمانه:حاضر يا دكتور
ثروت:ما تتأخريش
چمانه:حاضر
( روايات بسوم )
دخلت چمانه اخدت فنجان القهوه ، و قبل ما تشيله .. مسك ثروت اديها ، و بصلها بخبث و اتكلم ....
ثروت:مش هسيبك
شدت چمانه اديها بعيد ، و اتكلمت بخوف ....
چمانه:يعني ايه
ثروت:يعني مش هتطلعي من هنا سليمه
چمانه:حضرتك تقصد ايه بالكلام ده !!
ثروت:روحي هاتي الحليب و تعالي ، و هقولك
خافت چمانه جداً من طريقه كلامه و نظراته ، و خرجت من المكتب بسرعه .. و بعد ما خلصت الحليب اللي طلبه ، رجعت علي المكتب ، خبطت و دخلت حطيته علي المكتب .. و قبل ما ثروت يحاول يتكلم معاها ، خرجت من المكتب بسرعه ، و دخلت اوضتها و قفلتها علي نفسها بالمفتاح .. و قعد ثروت في المكتب بيفكر كتير ، و بيتكلم مع نفسه و بيشرب الحليب .. و مادلين نايمه في اوضتها ....
بعد ساعات .. الساعه 5 الفجر .....
صحيت مادلين من النوم بقلق ، و بصت جنبها علي السرير و اتكلمت ....
مادلين:ايه ده .. فين ثروت !!
استغربت انه مش نايم جنبها .. قامت قعدت و مسكت موبايلها بصت فيه ، و اتكلمت ....
مادلين:يا خبر .. ايه ده ، الساعه 5 !! اومال ثروت فين كل ده !?
قامت مادلين من السرير ، لبست الروب بتاعها ، و نزلت تدور علي ثروت ....
راحت علي المكتب ، فتحت الباب و دخلت علي طول .. اول ما دخلت وقفت مصدومه ثواني ، و فجأه اتكلمت بصوت عالي .....
مادلين:ثرووووووووووت !!!!!
.........................
#بسمه_ممدوح