بركان أنشقاقي

* الفصل الثالث *

في الشارع ..........
الشارع هادي ، و بسام بيجري ب أقصي سُرعته علشان يبعد عن المستشفي تماماً .. أكتر من ساعتين بيجري ، و يدخل من شارع  يخرج من اللي بعده .. لحد ما وصل ل شارع هادي جداً .. بدأ يهدي خطوته ، و يمشي ب تعب و هو سرحان .. و بعد وقت بعد ما الظلام و الهدوء بدأوا يزيدوا أكتر فاق من شروده لقي نفسه في حاره صغيره .. وقف مكانه و بيبص حواليه ب حركات بطيئه ، و فجأه و بدون أي مُقدمات وقع ، و فقد الوعي ....
في الوقت ده .. إذن الفجر و بدأوا ينزلوا الناس ل الصلاه .. و كان أول واحد يُخرج من بيته عمار " والد روميساء " .. أول ما خرج عمار من بيته و شاف بسام واقع علي الأرض وقف في صدمه ، و بعد لحظات جري عليه بسُرعه و بدأ يفوقه لكن ما فاقش .. أتأكد من نبض قلبه و نفسه و أتطمئن أنه عايش ، و بعدها بدأ يرفعه و يسنده لحد ما دخلوا البيت ، و ل حُسن الحظ أن شقه عمار " دور أرضي " .. خبط عمار علي الباب ب قوه ، و بسُرعه فتحت روميساء و هي بتتكلم ب قلق ....
روميساء:خير يا بابا .. يا نهااار أبيض .. أييه ده يا بابا ! في أييه ؟؟؟!
عمار:أسنديه بس معايا يا بنتي الله لا يسيئك ، و بعدين هفهمك
روميساء:حاضر يا بابا .. حاضر
سندت روميساء بسام مع عمار ، و نيموه علي أول كنبه جنب الباب .. و قعد عمار جنبه ، و روميساء واقفه و بتتكلم ب إستغراب ....
روميساء:أيه اللي حصل يا بابا ؟ و مين ده !
عمار:مش عارف و الله يا بنتي .. انا أول ما نزلت من البيت شوفته واقع قُصاد البيت ب منظره ده .. حاولت أفوقه ما فاقش و بصراحه شكيت أنه ميت .. بس بعد كده أتأكدت أنه عايش
روميساء بتفكير:طب و بعدين يا بابا هتعمل أيه ! و بعدين أزاي حضرتك تجيبه هنا ؟ أحنا نعرفه منين علشان تدخله بيتنا !!
عمار:باين عليه عيل غلبان و تعبان يا بنتي ، و ما أظُنش حد في حالته ده هيفكر يأذينا .. و انا جايبه هنا أفوقه بس عشان ضميري قُدام ربنا .. و بعدين عاشان تطمني هفتشه و أتأكد إذا كان معاه حاجه كده ولا كده ، ولا لا
روميساء:ياريت يا بابا
في اللحظه دي .. قام عمار وقف ، و فتش بسام كويس ، و بعد ما خلص بص ل روميساء و أتكلم ....
عمار:أهو يا ستي ما فيش معاه أي حاجه .. أتطمنتي كده ؟
ردت روميساء ب تفكير ....
رومسياء:أمممم يعني إلي حد ما
عمار:أحنا ناس طيبين يا بنتي ، و ربنا ما بيأذيش الطيبين ، و ربنا وقعه في طريقي عشان نلحقه .. يمكن يكون ربنا مآمن ليا و باعتلي أمانه ، و أظُن أن أخلاقنا ما تسمحلناش نسيب حد مرمي كده حتي لو كان يهودي يا بنتي
روميساء بإقتناع:صح يا بابا
عمار:طيب يا روميساء يا حبيبتي .. انا هروح ألحق صلاه الفجر ، و أنتي حاولي تفوقيه .. أنتي مش دكتور بردو ولا أيه ؟
ضحكت روميساء ، و ردت ....
روميساء:دي هي لسه سنه تانيه و صيدله كمان يا بابا
عمار بعطف:بس تقدري تعملي حاجه ل الغلبان ده
روميساء:حاضر يا بابا ما تقلقش .. روح أنت ألحق الصلاه ، و انا هتصرق .. بس ما تتأخرش عليا
عمار:ما تقلقيش يا حبيبتي مش هتأخر
روميساء:ماشي يا بابا
أبتسم عمار ، و فتح باب الشقه و خرج راح علي المسجد ....
( روايات بسوم )
___________________________________
في بيت في الرمل ، في أسكندريه ......
نايمه بنت في أوضتها .. و فجأه صحيت علي صوت موبايلها بيرن .. مسكت الموبايل بصت علي الأسم ، و ردت ب نوم ....
- فارس
فارس:أنتي نايمه ؟
ردت ب إستهزاء ....
- و هصحي ليه !! أستنيتك كتير ، و بفكر ما أستناش تاني
فارس بإستغراب:مالك يا أيسل في أيه !!
أيسل:هيكون مالي يعني .. ما انا كويسه أهو
فارس:لا أنتي شكل النوم مأثر عليكي
أيسل:أنت اللي دماغك تعباك يا فارس .. خليك في اللي أنت فيه ، و أعمل اللي أنت عايزه .. بس يوم ما تخسرني ما تبقاش تزعل
فارس:هو حصل أيه بس ل كُل ده !!
أيسل بضيق:تقدر تقولي بقالك قد أيه ما كلمتنيش ؟
فارس بتفكير:أمممم مش فاكر
ضحكت أيسل ب كسره .. و أتكلمت ....
أيسل:شوفت .. عشان انا أصلاً مش فارقه معاك .. بقالك يومين و نص تقريباً ما كلمتنيش لكن طبعاً انا ولا في دماغك
فارس بخنقه:يووووه بقي علي تُقل دمك .. هو انا كُل ما هكلمك هتنكدي علي أمي كده ؟
أيسل:لا أنكد عليك و لا تنكد عليا .. بقولك أيه ا فارس انا عايزه أنام
سكت فارس ل لحظات ، و أتكلم ب ضيق ....
فارس:ماشي يا أيسل .. تصبحي علي خير
أيسل:سلام
و قبل ما أيسل تقفل أتكلم فارس ب إندفاع ....
فارس:هكلمك الصبح
أيسل:طيب .. سلام
قفلت أيسل ، و ما قدرتش تسيطر علي دموعها .. و بعد عياط كتير نامت ....
( روايات بسوم )
___________________________________
في المستشفي ..........
قاعد الدكتور في مكتبه ، و بيرد علي موبايله ، و بيتكلم ....
الدكتور:ألو
- أيوه يا دكتور ثروت
ثروت:أيه يا أبني ؟ في حاجه ولا أيه ؟!
- اها يا دكتور .. الولاه اللي ماشي وراه دخل حاره و أغمي عليه ، و بعد كده في راجل كبير شاله و دخل بيه بيته تقريباً
ثروت:طب و بعدين ؟ حصل أيه ؟
- ولا حاجه حضرتك .. لحد دلوقتي ما حصلش حاجه جديده
ثروت:طب خاليك واقف في مكان متداري عشان تأخد بالك من كُل تحركاته ، و طول ما هو ماشي جنب الحيط يبقي تمام .. أنما لو حصل أي حاجه تقلق كلمني علي طول
- حاضر يا دكتور .. تحت أمرك
ثروت:تمام يا رامز .. يالا سلام
رامز:مع السلامه
( روايات بسوم )
___________________________________
في بيت عمار ........
بعد عشر دقايق من خروج عمار ل الصلاه .. كانت حاولت روميساء تفوق بسام ، و فعلاً نجحت .. أول ما فاق بسام بدأ يفتح عينيه ب هدوء و بيحط أيديه علي دماغه ب تعب .. أول ما شاف روميساء قُصاده راح في عالم تاني .. سرح في عينيها الخضراء اللي سحرته أول ما بصلها .. شعرها البني الطويل و هي بتلف ب هدوء و بتجيب له المياه .. بياضها الناصع ، و غمازتها اللي ظهروا ب كُل بساطه أول ما أبتسمت و هي بتتكلم ....
رميساء:حمد الله علي سلامتك .. أيه اللي عمل فيك كده
ما ردش بسام و هو شارد فيها ، و روميساء بتتكلم ....
روميساء:هاا ؟ طب معلش قوم معايا علشان تشرب .. مُمكن ؟
روميساء بتتكلم ، و بسام في عالم تاني ، و صوتها الناعم الرقيق بيسحره أكتر .. و بعد ثواني من شروده رد عليها ب صوت مُرهق جداً ....
بسام:الله يسلمك
روميساء بإبتسامه:مش هتشرب ؟
بسام:هشرب ماشي
حاولت تساعده روميساء و تقومه .. بس جسمها الصغير ما ساعدهاش علي كده ، و هو قام لوحده ، و بعد ما قعد أتكلم ب ضحكه خفيفه ....
بسام:أنتي بسكوته أوي
في اللحظه دي .. مدت روميساء أيديها ب المياه ل بسام ، و ردت ب جديه ....
روميساء:أتفضل المياه
أتكسف بسام جداً ، و أخد منها المياه و هو باصص في الأرض ، و أتكلم ب خجل ....
بسام:شُكراً
روميساء:العفو
( روايات بسوم )
شرب بسام و ساب الكأس علي ترابيزه صغيره جنبه ، و بص ل روميساء ب إستغراب و بعد تفكير ثواني أتكلم ....
بسام:أنتي مين ؟ و انا أيه اللي جابني هنا !
روميساء :مش لما أعرف الأول أنت مين ؟
بسام بتفكير:انا ؟
روميساء:أيوه
سكت بسام ، و بعد لحظات رد ....
بسام:مش عارف
روميساء:...!
.........................
#بسمه_ممدوح