بركان أنشقاقي

* الفصل الخامس *

في مكان تاني ..........
مكان عتمه و ظلام ، و كل ركن فيه يخوف .. و أيسل ماشيه فيه ب هدوء بس القلق مسيطر عليها ، و فجأه و هي ماشيه شافت قفص فيه بنت و معاها أسد بيأكل و بيهنش فيها .. خافت أيسل و جريت بعيد ، و بعد ما تعبت من الجري وقفت تأخُد نفسها .. و فجأه وقفت في صدمه أول ما شافت شاب متعلق في شجره من رقبته ب حبل ، و شاب تاني بيربُط الحبل علي رقبته أكتر و أكتر و بيخنقه و بيشنقه ب قسوه و هو متعلق في الشجره .. بس أيسل ما كانتش شايفه ملامحهُم .. و أول ما وشهم ظهر و شافتهُم أتصدمت ، و صرخت لما شافت الشاب اللي بيربط الحبل علي رقبه الشاب التاني ....
أيسل بصدمه:فااااااااااارررس .. ؟!!!!!
صحيت أيسل من النوم ب فزع .. بدأت تهدي أنفاسها العاليه ، و بعد ما هديت نامت و غمضت عينيها ....
( روايات بسوم )
___________________________________
في بيت مادلين .........
حضرت چمانه الفطار و القهوه ، و راحت علي أوضه المكتب علشان تبلغ مادلين .. و قبل ما تخبط علي الباب سمعتها و هي بتتكلم في الموبايل ....
مادلين:آه .. طيب يا ثروت .. قولتلك ما تقلقش .. حاضر .. هترجع أمتي بس .. بكره بجد ؟ طيب الحمد لله .. تيجي ب السلامه أن شاء الله .. أوك .. باااي
واقفه چمانه علي الباب في حيره ، و مش قادره تسيطر علي وجع دماغها ، و المكان كُله بيدور بيها !! و بتتكلم مع نفسها ب توهان و عدم إستيعاب ....
چمانه:ثروت ، ثروت .. الأسم ده مش غريب عليا ، ثروت !!
بتحاول چمانه تفوق من توهانها و مش عارفه .. و أول ما خبطت علي باب المكتب وقعت و فقدت الوعي ....
( روايات بسوم )
___________________________________
في مبني الصحافه ب القاهره ..........
بتتصل " لورا " سكرتيره رئيس التحرير ب صحفيه قاعده في مكتبها .. و السكرتيره بترد ، و لورا بتتكلم بسُرعه ....
لورا:سيرين .. الأستاذ عاصي عايزك في مكتبه حالاً
سيرين:أوك يا لورا .. ثواني و هكون عنده
قفلت سيرين التيليفون و قامت بسُرعه ، و راحت ل رئيس التحرير مكتبه .. خبطت علي الباب و دخلت و هي بتتكلم ....
سيرين:نعم يا فندم .. لورا قالتلي أن حضرتك عايزني
قام رئيس التحرير وقف ، و مشي بعيد عن مكتبه ، و أتكلم ب إنفعال ....
عاصي:فين لوسيندا يا سيرين ؟
بصتله سيرين ب إستغراب ، و أتكلمت ....
سيرين:لوسيندا ! لوسيندا مسافره أسوان يا فندم ، و حضرتك اللي باعتها
عاصي:هو ده المفروض ، و المفروض أنها تكلمنا ، و أي معلومات توصل لها تبغلني بيها .. هي فين بقي ؟!!
سيرين:فين أزاي !
عاصي بإنفعال:فين ؟ ما كلمتنيش لييه ! هي و اللي معاها ما لهووومش آثرر ليه !!
سيرين:يا فندم أزاي ما لهومش آثر .. دول بقالهُم كام يوم بس مش كتير يعني
عاصي:مش كتير أزاي ! أكتر من أسبوع .. يبقي أزاي مش كتير !!
سيرين:ما يمكن لسه ما جمعوش المعلومات الكافيه عشان يكلموا حضرتك و يبلغوك بيها
عاصي:لوسيندا معروفه في شغلها يا سيرين ، و من أول أو تاني يوم ب الكتير بتكلمني و بيكون معاها معلومات هايله في كل مره .. لكن المره دي في حاجه غريبه ، و انا مش مطمن يا سيرين
سيرين:أهدى بس يا فندم و ما تعصبش نفسك .. أكيد في حاجه مأخراهُم علي حضرتك ، و انا هكلمها و بإذن الله أقدر أوصل ل أي حاجه ، و أول ما ترُد عليا هبلغ حضرتك فوراً
سكتت سيرين ، و عاصي أتكلم بعد تفكير ثواني ....
عاصي:سيرين .. أخرك معايا بكره تكوني عرفتي لي فيه أيه
سيرين:طبعاً يا فندم .. تحت أمرك
عاصي:تمام .. أتفضلي روحي علي مكتبك دلوقتي و شوفي شغلك
سيرين:حاضر يا أستاذ عاصي .. بعد أذن حضرتك
عاصي:أتفضلي
خرجت سيرين من مكتب عاصي ب ضيق و ملامحها كُلها تعجُب .. حاولت لورا تكلمها بس سيرين ماردتش عليها ، و مشيت علي طول راحت علي مكتبها ....
( روايات بسوم )
___________________________________
في بيت مادلين .........
فاقت چمانه في أوضتها ، و مادلين واقفه جنب السرير و بتبص عليها .. و أول ما فاقت أتكلمت مادلين ب قسوه ....
مادلين:أيه اللي حصلك ؟
چمانه بتعب:مش عارفه
مادلين:انا ما بحبش الدلع
چمانه:و الله ولا انا .. بس انا بجد تعبانه
مادلين:و انا ما بعملش مع أي حد كده .. انا فوقتك ب نفسي
چمانه:ربنا يخليكي يا مادلين هانم
مادلين:انا هسيبك ترتاحي النهارده و تنامي .. بس مش هقبل ب دلع بعد كده
چمانه:حاضر يا هانم
أبتسمت مادلين ل أول مره لكن الأبتسامه كانت بارده جداً .. و طفت النور و خرجت من الأوضه و قفلت الباب.. و چمانه نامت من التعب ....
( روايات بسوم )
___________________________________
بعد ساعات ............
عند أيسل في البيت ....
صحيت من النوم علي صوت رنت موبايلها .. قامت قعدت و ردت ....
أيسل:ألو
فارس:صباح الخير
أيسل:صباح النور
فارس:عامله أيه يا حبيبتي .. وحشتيني
أيسل بضيق:الحمد لله يا فارس
فارس:مالك يا قلبي ؟
أيسل:مالي أزاي .. ما انا كويسه أهو
فارس:لا بتكلميني وحش
أيسل:و المفروض أكلمك أزاي ؟!
فارس:في أيه يا أيسل .. هو كل يوم كده !
أيسل بإستهزاء:لا مش كل يوم .. قصدك وقت ما بتفتكر تكلمني بس
فارس:ما انا بكلمك كل يوم
في اللحظه دي .. أتكلمت أيسل ب إنفعال ....
أيسل:لا مش بتكلمني كل يوم .. أنت بتكلمني وقت ما بيجيلك مزاجك بس ، و عايزني أكلمك حلو و أكون علي مزاجك ، و أنت تعاملني وحش عادي و تزعلني عادي .. و لما يجيلك مزاجك و تكلمني حلو عايزني أبقي تحت أمر حضرتك .. أنت ملبوس يا أبني ؟!
رد فارس ب نفاذ صبر ....
فارس:أنتي بقيتي حاجه تقرف
أيسل:أكيد مش أكتر منك
فارس:و الله .. طب يالا سلام بقي
و قبل ما فارس يقفل أيسل أتكلمت ....
أيسل:فارس
سكت فارس ل ثواني ، و بعدين رد بتُقل ....
فارس:أيه ؟
أيسل:فين لوسيندا يا فارس ؟
فارس:لوسيندا !! و انا هعرف منين ؟
أيسل بضيق:فين لوسيندا و بيبرس يا فارس ، و مش هسأل تاني
فارس:أنتي هبله .. بقولك ما أعرفش .. هعرف منين أصلاً !
أيسل:هبله !! تمام سلام
قفلت أيسل الخط بسُرعه قبل ما تسمع رد فارس ، و أنفجرت في العياط .. و بعد دقايق قامت غسلت وشها و فطرت .. و مسكت موبايلها و أتصل ب سيرين ، و أول ما ردت أيسل أتكلمت ....
أيسل:أزيك يا سيرين
سيرين:الحمد لله يا قلبي .. وحشتيني جداً
أيسل:أنتي أكتر .. خلاص هانت بكره أخر يوم في أجازتي و هنزل الشغل تاني
سيرين:أخيراً .. ده الشغل وحش من غيرك أووي
ضحكت أيسل ضحكه خفيفه ، و أتكلمت ....
أيسل:ربنا يخليكي ليا يا روحي .. و الله علي قد ما الأجازه راحه علي قد ما الشغل أحلي بكتير
سيرين:طبعاً يا بنتي ، و بعدين القاعده في القاهره أحلي أصلاً
أيسل:لا و أنتي الصادقه .. اًسكندريه أحلي بكتير .. بس الحلو في القاهره القاعده معاكي أنتي و لوسيندا
سيرين بضحك:طب ما لوسيندا من أسكندريه زيك
أيسل:اها بس كلنا بنشتغل عندك يا أختي ، و طول الأسبوع مع بعض ، و مش بنرجع أسكندريه إلا يوم كل أسبوع .. يعني القاهره دي بقيت هي اللي بتجمعنا
سيرين:اها و الله .. خلصي بقي و ما تتأخريش عليا عشان وحشتيني .. أنتي أول مره تأخدي أجازه كده
أيسل:يا أختي دول كلهُم ٤ أيام ، و بعد بكره رجعالك و هقعد علي قلبك
ضحكت سيرين ، و أتكلمت ....
سيرين:تيجي ب السلامه يارب .. صحيح شوفتي اللي حصل
أيسل بإنتباه:حصل أيه ؟
سيرين:رئيس التحرير كان عايزني من شويه في مكتبه و ...
حكت سيرين ل أيسل كُل اللي حصل ، و بعد ما خلصت أتكلمت أيسل ب قلق ....
أيسل:أمممم ربنا يستر
سيرين بتفكير:يستر علي أيه ؟
أيسل:لما أجي بعد بكره هقولك ، و هنشوف هنعمل أيه
سيرين:خلاص ماشي .. و انا هكلمها النهارده بردو
أيسل:أوك تمام
سيرين:...
( روايات بسوم )
___________________________________
في بيت عمار ..........
صحي بسام من النوم .. و كان عمار في المطبخ بيحضر الفطار ، و بعد دقايق خرج و حط الفطار علي الترابيزه ، و قعد جنب بسام و أتكلم ....
عمار:صباح الخير يا أبني
بسام:صباح النور
عمار:أيه بقي .. عامل أيه النهارده ؟
بسام:الحمد لله تمام
عمار:طيب الحمد لله .. قوم بقي أغسل وشك كده و فوق ، و تعالي بسُرعه علشان نفطر
بسام:ماشي حاضر .. بس كنت عايز منك خدمه كده يا عم عمار
عمار بإنتباه:أؤمر يا أبني
بسام:الأمر لله يا حج .. انا بس عايزك تشوفلي أي شغلانه كده .. لو هتقدر يعني
عمار:بس كده .. عنيا ليك يا أبني حاضر .. نفطر بس و هشوف لك موضوع الشغل ده
بسام:ربنا يخليك يا حج
عمار:و يخليك يا أبني .. يالا بقي بسرعه علشان مستنيك
أبتسم بسام ، و مشي دخل الحمام .. و بعد ما خلص رجع مكانه ، و قعد هو و عمار يفطروا ، و بعد ما خلصوا فطار .. عمار أتكلم ....
عمار:هلم الفطار و نغسل أيدينا ، و هشوف لك الموضوع بتاع الشغل
بسام:ماشي .. صحيح هي فين روميساء ؟
ضحك عمار ، و أتكلم ....
عمار:الأكل من أيدي مش عاجبك ولا أيه
رد بسام ب خجل ....
بسام:لا و الله ده الأكل زي الفل .. تسلم أيدك يا حج .. انا بسأل عادي فضول يعني
عمار بضحك:في الكليه .. نزلت الصبح
بسام بفهم:آه .. ماشي يا حج
( روايات بسوم )
ضحك عمار و شال الأكل .. و بعد ما خلصوا دخل عمار غير عبايته ، و خرج من الأوضه و هو بيكلم بسام ....
عمار:بص يا بني .. في قهوه قريبه مننا في نفس الحاره هنا .. المعلم بتاعها لسه ممشي الصبي من يومين ، و لسه ما جابش صبي تاني .. توافق تشتغل عنده ؟
بسام بتفكير:أمممم ماشي ما فيش مشكله .. أهي أي شغلانه و خلاص
عمار:طب تمام .. تعالي بقي نروح له دلوقتي
بسام:خلاص ماشي .. يالا بينا
قام بسام وقف ، و مسك الجاكيت بتاعه علشان يلبسه .. و فجأه و هو بيعدله !....
.........................
#بسمه_ممدوح