Monstrous Academy 1: Gangster's love. [PUBLISHED UNDER PSICOM]

Chapter Twenty one

21: Puzzled
-

Kasalukuyan akong nakatunganga sa classroom. Mabilis lumipas ang araw kaya naman balik pag-aaral na ulit kami.

“Tymee. Okay ka lang?” Tanong ko nang mapansing tahimik ito. Kagrupo ko siya ngayon sa activity kasama si Jasper, Matthew at Axel.

“Ah oo, may iniisip lang ako. Sorry.” paghingi niya ng tawad. Magsasalita pa sana ako ngunit bigla na lang siyang tumakbo palabas ng classroom, dahil doon ay nagkatinginan kaming apat nila Matthew.

“Anong nangyari dun?" Tanong niya sa amin. Nagkibit balikat lamang ako at saka ibinaling ang atensyon sa papel na hawak ko.

“Apat na lang tayo ngayon, wag niyong sabihin na sa akin niyo iaasa ‘tong paggawa ng essay?” Tanong ko sa tatlo pero parang nananandya sila dahil bigla bigla na lang silang nag-usap kahit wala naman silang topic. Uh seriously? Kaya ayaw kong makagrupo itong mga lalaki na ‘to eh.

“Akin na. Ako na gagawa,” bored na sabi ni Jasper nang bigla niyang agawin sa akin ang papel na nasulatan ko na. Ngumiti ako sa kanya pero inirapan niya lang ako.

“Matthew, tulungan mo si Jasper.” sabi ko pero inilabas lang niya ang kanyang dila na nagsasabing manigas ako.

“Susundan ko na lang yung kaklase nating rocker. Napansin ko kasi na last week pa siya ganun. Iniisip ko rin na baka may kaugnayan siya kay Devon dahil pareho sila ng apelyido.” binulong ni Matt ang huling sinabi niya at nagulat na lang ako nang mag slow clap si Axel at Jasper habang umiiling ang ulo.

“Genius! Sige, sundan mo na.” sabi ni Axel at napailing lang si Matthew dahil sa ginawa noong dalawa. May meeting yung mga prof kaya malaya kaming gawin kahit anong gusto namin, basta ba matatapos namin itong activity na iniwan sa amin.

“Minsan may utak din yung kumag na yun eh no.” sabi ni Jasper habang busy siya sa pagsusulat ng essay. Napaisip naman ako bigla, may kaugnayan nga kaya si Tymee kay Devon?

Habang tahimik kong kinakalkula ang mga nabubuong tanong sa isip ko ay bigla na lang may bumato sa akin ng kapirasong papel. Binuksan ko iyon at binasa.

“Meet me later after this class. Sa rooftop” - J.

Tinignan ko si Jiro at nginitian niya ako ng bahagya kaya ngumiti ako pabalik. Sa hindi naman malamang dahilan, bigla akong nakaramdam ng itim na presensya. Pamilyar sa akin yung aura na iyon, hindi ako pwedeng magkamali.

“Thunder saan ka pupunta?” Tanong ni Axel nang mapansin niyang tumayo si Thunder. I knew it.

“Papahangin. Hindi ko gusto yung nakikita ko rito sa loob.” sabi niya sabay sulyap sa akin. Napanganga na lang ako dahil sa inasta niyang iyon. Sinasapian na naman ba yung lalaking ‘yon?

Ilang oras pa ang lumipas. Tinatahak ko na ang daan papuntang rooftop. Saktong pag-akyat ko naman sa taas ay naroon na si Jiro. Nakasandal siya sa pader habang nakabulsa ang mga kamay.

“Anong gagawin natin dito?” Tanong ko at nginitian niya ko.

“Alam mo ba na tuloy na tuloy na yung kasal?” Sabi niya nang dumungaw siya sa labas. Tinabihan ko naman siya roon at hindi maiwasang makaramdam ng konsensya. Alam ko naman kasi na ako ang dahilan kung bakit iyon nangyari.