صباح الخير يا حياتي، كيفك؟ كنت عم اتخيل مخططاتنا او يمكن مخططاتي بس لما كان عبالي نروح على البحر سوا، نكون ماسكين ايدين بعض و نسبح سوا و ظل لازقة فيك و نعبط بعض و نتدفى ببعض. بتعرف انا بكره روح على البحر؟ في كتير اشيا بحبا من بعيد بس بخاف قرب. معك بحب جرب كلشي و بتخيل كتير اشيا نقدر نعملها سوا. كمان تخيلت نروح نخيم بشي مطرح و نكون لوحدنا و نظل نحكي و نتأمل بالنجوم و بعدين ننام حد بعض و اكيد منكون عابطين بعض... اوقات بزعل بس حس انو بطل فينا نعمل اي شي من هول و حياتنا تغيرت و كتير اشيا تغيرت بس برجع بتذكر انو انا طلبت من الله سلامتك و راحتك على حساب احلامي معك. كل يوم عم حاول اقتنع اكتر و اكتر انو عادي اذا ما صار كلشي بدي ياه و في اشيا كتير اهم. انا بطبعي بحلم كتير و بتخيل كتير و هيدا شي غلط لأنو تعودت لما ما يصير شي يلي ببالي بزعل، فكرمال هيك عم حاول اتغير بهل شي. المشكلة افكاري متل الولاد عنجد ما عم اعرف اكبر و خلي افكاري يتغيرو او ينضجو معي. مافي الواحد يتخلى عم احلامو بس في يستعملن بطريقة يروح فيها على عالم تاني و ينبسط بدل ما يزعل و يصير سلبي. على فكرة اوقات برجع بقرا كلشي كتبتو بلاحظ عندي اخطاء املائية كتير بكون ما نتبهت لأنو بكتب بسرعة و بنشر الجزء بلا ما ارجع اقرا. انا عم استغرب ليش بعد في تواصل من تجاهك او تقرا يلي بكتبو؟ لأنو انا طلبت ما تتركني ابداً؟ او لأنو نحن صرنا كتير قراب من بعض و حابب وجودي؟ و سؤال تاني براسي، انت كرمال هيك ما كفيت بعلاقتك مع اخر بنت؟ انا ما بحب تتذكر تفاصيل مع بنت غيري بس هيك اوقات بيدور براسي افكار حتى لو ما عرفت الجواب بحب فكر كتير. ما بعرف ليش بحس يلي بيني و بينك كتير قوي و صعب حدا يخرب بيناتنا و بحس لو بعد سنين رح نظل هيك و خاصةً من ناحيتي رح تظل مميز بقلبي و مهم كتير، يمكن يكونو تغيرو احلامي معك و صرت فكر بوعي اكتر و واقعية اكتر بس هل شي ما بغير معزتك عندي. الصراحة عم حاول ادعس على قلبي متل م انت حاولت قبل، ما عاد بدي اوقع بنفس الاغلط و اتأمل و اندفع تجاه حدا هيك حتى ما اتأثر و انأذى. ما تفكر قصدي ما عاد بدي ياك او ما عاد حسلك شي بس انا لاحظت انو مشاعري تجاهك كتيرررر و بحس عم يأذوني اكتر من انو يبسطوني. حتى فسر اكتر يعني متل مرض و هوس بدل ما يكون شي حلو و طبيعي. لو بظروف تانية ما عندي مانع ظل مريضة و مهوسة فيك لأنو ضامنة وجودك و علاقتنا بس هلق كلشي تغير و صار اصعب ما بقدر ظل هيك. انت احلى شي صار بحياتي و اكتر شخص حبيتو و اكتر شخص وثقت في و ارتحت معو، اول شخص بيخطر على بالي خلال يومي انت. كل ما شوف شي عن الحب بتخطر على بالي انت. انت نسيتني كلشي بشع صار معي و صرت ركز على علاقتنا نحن و كيف كنت مرتاحة و مبسوطة معك. انا كتير كتير بحبك و كتير كتير مشتاقتلك و عم فكر فيك و ادعيلك و اتمنالك كل الخير مافي لحظة بتمرق بلا ما فكر فيك. انت غيرتني كتير و غيرت حياتي و انا بشكرك على كلشي ان شاء الله الله يعطيك حسنات على كل كلمة حكيتها و خليتني اتأثر فيها. الفضل الك بكتير اشيا انا ما بنسى ولا بنكر ولا بتكبر انا رح ظل صريحة دايمًا انو الك فضل عليي و بسطتني كتير و غيرتني. حطيتلك اغنية لأليسا كتير حلوة كمان بتذكرني فيك و بعد في كتير غير رح حاول اتذكر حطلك ياهن هون حتى تقدر تسمعن و تفهمني انا و مشاعري اكتر و اكتررر.
I love and miss you so much babe 🥺❤️
