انت الضو يلي بتنور العتمة بحياتي متل هي الاغنية بالضبط اسمع الكلمات منيح او قراهن لأنو بتذكرني فيك كتير. عنجد واحد أوقات بيكون عايش بسواد او عتمة و مش حاسس و يمكن حتى يكون مبسوط مفكر كلشي تمام الا وقت يجي ضو يوضح كلشي و يعطي شعور بالأمان. انا قبلك كنت ضايعة و اهتماماتي غلط و كلشي بعملو غلط بس انت جيت ساعدتني امشي على الطريق الصح و حسستني بالأمان انو ما عاد في شي يخوف لأنك موجود و عم تضوي طريقي. نصايحك كتير بيهموني لأنو بعرف كلشي بتحكي بيفيدني الي قبل ما يكون عم يفيدنا نحن سوا متل انو يخفف مشاكل و هيك، بعرف بتهمك مصلحتي و بتخاف عليي و بدك ياني أتغير للأحسن و هو هيك عم يصير الصراحة و الحمد لله على كلشي. من فترة لما كنت عم احكي لماما عنك قلتلا انو انا لأول مرة بحس بأمان مع شخص مش من عيلتي و بفضل كون مع شخص بحس هيك شعور معو ولا انو كون مع شخص "مثالي" بنظرن لأنو اكيد بيطمحو كون مع شخص عندو مواصفات خيالية و انا ما بهمني هل شي بيهمني حس بالأمان لأنو هيدا شعور صعب لاقي مع اي حدا. دايمًا بدعي و من اول فترة حكينا فيا لهلق انو الله يبسطك على قد ما بسطتني و تكسب حسنات على قد ما ساعدتني و غيرتني. يا ريت انا كمان كون قدرت غير شي فيك للأحسن بس بحس انت صعب تتغير او تعمل شي انا بقولو لأنك مقتنع بكلشي عم تعملو و اصلاً انا حالتي شي و انت حالتك شي يعني انا كنت شخص ضايع و انت يمكن من الاول ماعندك مشكلة حتى اجي انا و حاول ساعدك فيها. اوقات بتذكر لما بطلنا نحكي و ازعل كيف ضيعت وقت بلاك و انو ما كان لازم كبر الموضوع و نبعد عن بعض و بزعل انو فكرت بطريقة سلبية كتيررر اثرت فيي و فيك و خربت كلشي و بعتذر انو اسأت الظن و قلت انت "ظلمتني" انا ما شفت غير الخير منك بس واحد بيخبص حكي بس يكون زعلان و معصب. بعتذر كتير على كل مرة كبرت موضوع صغير و وجعتلك راسك و تصرفت متل ولاد و فكرت حالي انا الصح. ياريت واحد في يرجع بالزمن و يصلح اغلاطو حتى ما تبقى موجودة بالذاكرة بس الحمدلله بحس نحن كان لازم نمرق بكل هيدا حتى نتفاهم و حتى انو بحسك ما بتتذكر هيك اشيا و بتدقق فيها. انت احسن و احلى شب بالدني و مافي منك بكل الكون و انا كتير شتقتلك و كتير بحبك و انت كتير بتعنيلي و اهم شخص عندي.
