ငါတို့ပြိုင်ဘက်လုပ်မယ်ဆိုတဲ့ သဘောတူညီချက်က ဘယ်မလဲ?(ဘာသာပြန်)

အခန်း-၁၁၉ ထူးဆန်းသော ငှက်ဥ။

ထိုစကားကိုကြားသောအခါ စုယန်သည် နားမလည်နိုင်ဘဲ ထိတ်လန့်သွားသည်။

ချင်းပေါ်၏ အကြည့်များက သူ့အပေါ် တစ်ခဏမျှ ကျဆင်းသွားသည်။ သူမက ပြုံးပြီးဆို၏။

"ကောင်းပါတယ်၊ သူတို့နှစ်ယောက်စလုံးက ငယ်ငယ်ရွယ်ရွယ်နဲ့ အလားအလာရှိတယ်။ ကျောက်စိမ်းအိမ်တော်ရဲ့ ကြီးကြပ်မှုနဲ့ လည်ပတ်မှုမှာ မင်းကို ကူညီဖို့ သူတို့အတွက် မခက်ခဲလောက်ပါဘူး"

ရှစ်ဇွင်း၏သဘောတူညီချက်ကိုရရှိခဲ့ပြီး တိလင်းသည် ချက်ချင်းပင် ကျေးဇူးတင်စကားပြောကြားကာ ထွက်ခွာသွားခဲ့သည်။

စုယန်သည် သူတို့နှစ်ဦးကြား ဆွေးနွေးညှိနှိုင်းမှုကြောင့် လုံးလုံးလျားလျား ရှုပ်ထွေးသွားခဲ့သည်။ တိလင်း ခပ်လှမ်းလှမ်းသို့ ရောက်သွားသည်ကို မြင်သောအခါ၊ သူက ချင်းပေါ်ဘက်သို့ လှည့်ကာ ဆို၏။

"မဟုတ်သေးပါဘူး။ ကျွန်တော်က ဒီကိုဆန္ဒတစ်ခု တောင်းဆိုဖို့ လာခဲ့တာပါ။ ဘယ်လိုဖြစ်ပြီး တာဝန်တစ်ခုရသွားတာလဲ?"

"မင်းရဲ့ မူလဇစ်မြစ်က ထူးခြားတယ်။ ဒါကြောင့် မင်းက ပိုပြီး စွမ်းဆောင်နိုင်တဲ့အတွက် ပိုကြိုးစားဖို့ လိုလိမ့်မယ်" ချင်းပေါ်က ရယ်လိုက်ပြီး ဆိုသည်။

"မင်း လိုချင်တာကို ဆုံးဖြတ်ပြီးပြီလား?"

စုယန်က ချောင်းဟန့်လိုက်ပြီး "အိုး... ကျွန်တော်ဆုံးဖြတ်ပြီးပြီ" ဟုဆိုသည်။

ချင်းပေါ်က ပြုံးလိုက်၏။

"မင်းရဲ့ဆန္ဒက မင်းရဲ့ ခန္ဓာကိုယ်ပေါ်က ကျိန်စာကို ဖြေရှင်းဖို့ မဟုတ်လား?"

စုယန် : "မှန်တယ်၊ ကျွန်တော် ဒီကျိန်စာကို ဖယ်ရှားပစ်ချင်တယ်"

ထိုသို့ပြောပြီးနောက် ချင်းပေါ်၏လေးနက်သောအမူအရာကို သတိပြုမိကာ သူချက်ချင်းပင် စိုးရိမ်ထိတ်လန့်သွားခဲ့သည်။

"ဘာဖြစ်လို့လဲ? အဲဒါက မဖြစ်နိုင်ဘူးလား?"

ချင်းပေါ်သည် သူမ၏ပခုံးပေါ်ရှိ အစိမ်းရောင်ငှက်ငယ်ကို ကျီစားရန် လက်ကိုမြှောက်ကာ ပြုံးလိုက်သည်။