TEMPTATION ISLAND: Midnight Mistress

Chapter 55

 Mabuti na lang ay may kumatok na ibang tao sa kwarto kung saan sila nagtatalo kanina ni Saulo. Kung hindi ay wala pang balak ang bastardo na pakawalan siya. Bumalik siya sa tumpok nina Gigi. Nagtanong agad ang mga ito kung saan siya nanggaling at kung bakit siya biglang nawala. Hindi niya masabi ang totoong dahilan.

 Kung kanina ay masaya ang dalaga, ngayon ay tila miserableng nakalugmok siya sa isang sulok sa dilim. Muling lumapit sa kanya si Dax pagkalipas ng ilang minuto pagkabalik niya, ngunit tumanggi na siyang makipag-usap rito at nagpaalam na pupunta sa rest room. Nakakahiya siya. Hindi niya alam kung bakit kailangan niyang tumanggi na kausapin ito dahil lang sa aware siyang nakamasid sa kanya si Saulo.

 Napansin niya na nasa malapit na ito. He was casually talking to Farah and Lucian. Tinanguan pa siya nito nang makita siyang papunta sa rest room. Ang tinamaan ng lintek! Wala siyang ibang nararamdaman dito ngayon kundi pagkairita. She was mad at him. Sa lahat ng mga narinig niya dito kanina, hindi niya makakalimutan kahit isang salita.

 So, what if she is a camgirl?

 Kung may problema pala ito sa kanya, hindi niya nakikita ang point na ituloy pa nila ang mga nangyayari sa kanila. Hindi siya makapaniwalang ginamit ni Saulo ang kanyang sikreto laban sa kanya. Ito lamang ang nakakaalam ng lihim niyang trabaho, wala ng iba pa. At mas lalong hindi siya makapaniwala na inakala nitong gusto niyang maging girlfriend nito.

 Napakalaking insulto sa kanya, lalo na't hindi naman ito boyfriend material! Iyon ngang wala pa silang relasyon, sumasakit na ang ulo niya. Ano pa kaya kung meron na?

 Nagpalamig lang siya ng ulo sa loob ng banyo. Inayos ang kanyang sarili. Namumutla ang kanyang mukha. Hindi siya umiyak pero parang namumula pa rin ang mata niya. Goddamn him. That would be the last time na makakatanggap siya ng ganoong pang-iinsulto mula sa binata. Makabalik lang siya sa apartment niya, magpapasa agad siya ng resignation letter.

 Tama na ang isang beses. Hindi niya kailangang ipagpatuloy ang kagagahan niya. Hangga't maaga pa, dapat na niyang tuldukan at pigilan ang damdamin na papasibol pa lang sa dibdib niya. Mabuting putulin na niya iyon para hindi na lumalim pa.

 She wanted to laugh at herself. Wala ba talagang katapusan ang karma niya pagdating sa lalaki? Hindi ba talaga siya magiging masaya? Alam niyang marami siyang nagawang maling desisyon non, may mga nasaktan siya sa proseso, pero alam niyang may karapatan din siyang sumaya.

 Nasapo niya ang sentido, sumasakit na ang ulo niya. Pagod na rin siyang mag-isip. Ang gusto na lang niya ay mahiga at makapagpahinga. Pero hindi siya tatabi kay Saulo mamaya. Hindi puwedeng sa cabin siya tumuloy. Baka masampal lang niya ito habang tulog.

 "Bakit ang tagal mo?"

She let out a loud curse. "Bakit ka ba nakaabang lagi sa pag-CR ko?"

"Just in case na kailangan mo ng tulong."

"Wow. Bilib naman ako sa pagiging matulungin mo. Tumaas bigla ang respeto ko sa 'yo. Pwede gawan mo pa ako ng isang pabor? Huwag ka nang magpakita."

 Nakairap na nilagpasan niya si Saulo.

 "You know you should still respect me. I'm still your employer. Hindi ko tinatanggap ang mga pabalang na sagot mo sa akin while I'm being a nice person."

Nice person? Huwag siyang mabiro-biro nito, kanina pa niyang pinipigil ang suka niya.

"Opo, Shir. Pasensya na ho. Lashing ho ako, eh. Di ko alam 'yung respeto."

 Hinigit siya nito sa braso. "Eina."

 Huminto siya sa paglalakad at hinarap ang binata. Kalmado ang anyo nito, mukhang hindi magbibitaw ng masasakit na salita. Napakagaling talaga magtago ng ekspresyon. Paano nito nagagawa iyon? Kanina lang ay nakita niya kung paano ito magalit at magbitaw ng mga salitang hindi niya akalain na sasabihin nito.