《ဖြေဆေး》- ဘာသာပြန် 『Completed』

အခန်း - ၉၈

Chapter ● 98 ●

ဘာအလားအလာကြီးကြီးကျယ်ကျယ်မှမရှိဘူး...။

ချန်ခေါ့က အနည်းငယ်အံ့သြမိသည်။ သူ့အဖေက ထိုစကားကိုပြောလိုက်၍တော့မဟုတ်ပေ။ သူ့အဖေက ထိုစကားမျိုးကိုပြောလာခြင်းသည် သူ့အတွက် နည်းနည်းလေးမှမအံ့သြရပေ။ ငယ်စဉ်ကတည်းက အကြိမ်ရေပေါင်းမြောက်များစွာ ကြားဖူးခဲ့သည်မဟုတ်ပါလား။ သူအံ့သြမိသည်မှာ ကျန်းယွီသော်အပေါ် သူ့အဖေ၏ ထိုကဲ့သို့သောဝေဖန်ချက်တစ်ခုကြောင့် သူစိတ်ဆိုးမိခြင်းဖြစ်သည်။

သူသည်တစ်အောင့်ခန့်တိတ်ဆိတ်သွားပြီးနောက် ရယ်လိုက်သည်။

သူ၏ ထိုတုံ့ပြန်မှုကြောင့် သူ့အဖေကလည်း အတော်အံ့သြသွားပုံရသည်။ သူ့အား အတော်ကြာအောင် စိုက်ကြည့်နေသည်။

"တော်တော်ရေငတ်ပြေစေတယ်"

ချန်ခေါ့က ဖရဲသီးဖျော်ရည်ကို သူ့အဖေဆီပြန်ကမ်းပေးလိုက်သည်။

သူ့အဖေက ဖျော်ရည်ကိုလက်ခံယူလိုက်ပြီး နှစ်ငုံသောက်လိုက်ပြီးနောက် မျက်မှောင်ကြုတ်ထားရင်း -

"ကြည့်ရတာ ဒီမှတ်ချက်ကို မင်းလည်းသဘောတူတဲ့ပုံပဲ"

"ဘာသဘောတူတာကိုပြောတာလဲ။ သူက ကြီးကြီးကျယ်ကျယ်အဖြစ်မရှိတာကိုပြောတာလား။ ကျွန်တော့်အပေါ် အဖေ့ရဲ့မှတ်ချက်လိုမျိုးလေ"

သူ့အဖေက စကားမဆိုပေ။

"အဲဒီမှတ်ချက်တွေကို အခုအချိန်မှာ ကျွန်တော်အလေးမထားတော့ဘူး။ သူ့အပေါ်မှတ်ချက်ပဲဖြစ်ဖြစ်၊ ကျွန်တော့်အပေါ်မှတ်ချက်ပဲဖြစ်ဖြစ်။ အရင်တုန်းကဆို အဲဒါတွေကို ကျွန်တော် တော်တော်လေးအလေးထားဖြစ်တယ်။ မကျေမနပ်ဖြစ်ရာကနေ ထုံကျင်သွားတဲ့အထိပဲ။ အရင်တုန်းတော့ ထုံသွားရင် ကျွန်တော်အရေးမစိုက်တော့တာ။ တကယ်တော့ အဲဒီလိုမဟုတ်နေဘူး။ အခုအချိန်မှာ ကျွန်တော်ရယ်နိုင်နေတာကမှ တကယ့်တကယ်ဘာမှမဟုတ်တဲ့ကိစ္စဖြစ်သွားတာ"

အဖေက မျက်မှောင်ကြုတ်ထားရင်း သူ့အားတစ်ချက်ကြည့်လိုက်သည်။

ချန်ခေါ့လည်း သူ့အဖေအားကြည့်လိုက်ကာ -

"ဆန်ကုန်မြေလေးဟုတ်မဟုတ်၊ အလားအလာရှိမရှိ၊ ဘယ်လောက်ကြီးတဲ့အလားအလာရှိနိုင်မလဲ စတာတွေကို အဖေပြောတာအပေါ် မမူတည်နေဘူး။ အဖေ့စံနှုန်းတွေ အဖေ့ထင်မြင်ချက်တွေအားလုံးက အဓိပ္ပါယ်မရှိဘူး"