《ဖြေဆေး》- ဘာသာပြန် 『Completed』

အခန်း - ၂၅

Chapter ● 25 ●

သိပ်မကြာသေးခင်အချိန်တုန်းက ကျန်းယွီသော်ပြောဖူးခဲ့သော ဘယ်သူတစ်ဦးတစ်ယောက်ကိုမှ သူငယ်ချင်းအဖြစ် အလွယ်တကူ သဘောထားသတ်မှတ်လေ့မရှိသည့်အကြောင်းနှင့်၊ သူ့အတွက် သူငယ်ချင်းဆိုသည်မှာ လွန်စွာလေးနက်အရေးပါကြောင်း စကားကို ချန်ခေါ့က ကောင်းကောင်းမှတ်မိနေသေးသည်။

ချန်ခေါ့သည် ကျန်းယွီသော်က သူ့အား သူငယ်ချင်းကဲ့သို့ သဘောထားခြင်းမရှိဟု တောက်လျှောက်ထင်မှတ်နေခဲ့ပြီး၊ သို့တိုင်အောင် သူက ကျန်းယွီသော်အား သူငယ်ချင်းအဖြစ် သတ်မှတ်၍ရနေခဲ့သည်။ ချန်ခေါ့အတွက် သူငယ်ချင်းမိတ်ဆွေဖြစ်ရန် စံသတ်မှတ်ချက်မှာ သိပ်မမြင့်မားဘဲ၊ နှစ်ခါသုံးခါလောက် ထမင်းအတူတူထွက်စားပြီးသည်နှင့် 'ဒါက ငါ့သူငယ်ချင်း' ဟု တခြားသူအား မိတ်ဆက်ပေးနိုင်သည်အထိကို သူ့တောင်းဆိုချက်က နိမ့်ပါးသည်။ ကျန်းယွီသော်၏ 'သူငယ်ချင်း' သတ်မှတ်ချက်၏ အတိုင်းအတာနှင့်အတိမ်အနက်ကို ချန်ခေါ့ တကယ်ပင် အသေးစိတ် ထဲထဲဝင်ဝင် မစဉ်းစားဖူးပေ။

ယခု ကျန်းယွီသော်၏ သူတို့နှစ်ယောက်ကသူငယ်ချင်းဖြစ်ပြီဟု ဗြုန်းစားကြေညာချက်ကြောင့် ချန်ခေါ့မှာ ရင်ထဲက ညင်သာသိမ်မွေ့သော ထိရှလှုပ်ခတ်မှုတစ်ခု ဖြတ်ပြေးသွားသည့်အပြင် အနည်းငယ်တော့ ဇဝေဇဝါဖြစ်ပြီး စိတ်ထဲတွင် နောက်ကျိရှုပ်ထွေးသွားမိသည်။

ဘယ်လောက်မှမကြာလိုက်သော အချိန်ကာလအတွင်းတွင် ကျန်းယွီသော်၏ သူငယ်ချင်းဖြစ်ရန် အဆင့်သတ်မှတ်ချက်မှာ ကျန်းယွီသော်ကိုယ်တိုင်ကဲ့သို့ အတက်အကျမြန်ပြီး မတည်ငြိမ်နေတော့ပေ။

ချန်ခေါ့က ကျန်းယွီသော်အား ကြည့်နေသည်။

"မင်းပဲ အရင်တုန်းက ... ... သူငယ်ချင်းဆိုတာ မင်းအတွက် အရမ်းလေးနက် ... ..."

"ဒီနေ့ ခင်ဗျား ပြန်လှည့်လာတဲ့ လုပ်ရပ်ကြောင့်ပါ"

ချန်ခေါ့က ကြောင်အမ်းအမ်းဖြစ်သွားသည်။

"ဟုတ်လား။ ငါ ပြန်လှည့်လာဖြစ်တာကတော့ အဓိကက တစ်ယောက်ယောက်က တစ်ခုခုထိခိုက်သွားမှာစိုးလို့ပါ။ ချန်ချင့်ကိုလည်း သူခဏလောက်တော့ ထိန်းနိုင်မယ်လို့ ငါအစက ထင်နေခဲ့တာလေ။ မထင်မှတ်ပဲ သူက တစ်စက္ကန့်နဲ့တင် လဲသွားတာပဲ"