"သာ့ပင်းတို့ကောင်တွေအုပ်စုရော လာနေပြီလား"
ချန်ချင့်က မေးလိုက်သည်။
တစ်ယောက်ယောက်က ပြန်ဖြေလာသည်။
"ရှေ့နားက လမ်းဆုံကိုရောက်နေကြပြီ"
အော့ထူးကို အလစ်သုတ်လုယူသွားသောလူအုပ်စုမှာ လေးငါးယောက်လောက်ရှိသည်။ ယခု ပုန်းကွယ်တိမ်းရှောင်နေလိုက်ပြီဖြစ်၍ လူအုပ်စုပိုတောင့်လာလိမ့်မည်။ ထို့ကြောင့် ကျန်းယွီသော်တို့ဘက်လည်း လူအင်အားဖြည့်ရသည်။ လမ်းသရဲဂန်းစတားအချင်းချင်း အလစ်သုတ်လုယူမှုပဋိပက္ခသည် ရပ်ကွက်တွင်းလမ်းပေါ်အငြင်းပွားမှုထဲတွင်ပါဝင်သည်။ များသောအားဖြင့် ရန်ဖြစ်ရိုက်နှက်သည်အထိမဖြစ်တတ်ဘဲ အဓိကအားဖြင့် လူအင်အားနှင့်အရှိန်အဝါကိုသာ ယှဉ်ကြသည်။
ကျန်းယွီသော်က အော့ထူးညွှန်ပြသည့်ဘက်သို့ လျှောက်သွားသည်။
"သွားရအောင်။ မြန်မြန်ကိစ္စဖြတ်လိုက်မယ်။ အတတ်နိုင်ဆုံး လက်မပါနဲ့"
လူအုပ်စုဆီမှ "ဟုတ်" ဟူသော အသံထွက်လာသည်။
"ဟုတ်ပြီ"
ချန်ချင့်က ဖုန်းကို မြှောက်ကိုင်ပြီး အော်လိုက်ကာ တခြားလူများထက် စည်းချက်တစ်ခုစာ နှေးသွားသည်။
ကျန်းယွီသော်က သူ့အား လှည့်ကြည့်လိုက်သည်။
"မင်းအတွက် ကင်မရာတစ်လုံးပါ စီစဉ်ပေးရမလား"
"မလိုပါဘူးကွာ။ ဖုန်းနဲ့ဆိုလည်း တော်တော်ကြည်နေပြီ။ ကင်မရာဆိုရင် ငါသုံးတောင် မသုံးတတ်ဘူး"
ကျန်းယွီသော်က သက်ပြင်းတစ်ချက်ချလိုက်သည်။
ဤအဆောက်အဦးအစုအဖွဲ့ရှိသောနေရာသည် ကျန်းယွီသော်ပိုင်နက်၏ အစွန်အဖျားဧရိယာဖြစ်သည်။ တိုက်များကို ဖြိုချပစ်ရန် စည်းတားထားလျက်ရှိပြီး နဂိုနေထိုင်သူများလည်း ရွှေ့ပြောင်းသွားကြပြီဖြစ်သည်။ ညအမှောင်က ကြီးစိုးလာပြီးနောက် အထပ်မြင့်တိုက်များ၏နှစ်လွှာမှစပြီး အပေါ်ထပ်များတွင် မီးလုံးမီးရောင်များမှာ ကျိုးတိုးကျဲတဲသာ လင်းထိန်နေသည်။
YOU ARE READING
《ဖြေဆေး》- ဘာသာပြန် 『Completed』
General Fictionဖြေဆေး - ကျယ်ယောက် (ဘာသာပြန်) မူရင်းစာရေးသူ - ဝူးကျယ် / Wu Zhe
အခန်း - ၃၂
Start from the beginning
