وَخُلِقَ الإِنْسَانُ ضَعِيفًا

مواقيت الصلاة

كلنا عارفين مواعيد الصلاة و كلما عارفين ان من شروط الصلاة دخول وقتها و كلنا عارفين ان تأخير الصلاة انها تخرج من ميعاها من الكبائر و ان احب الاعمال الي الله الصلاة علي وقتها.

ايه هي مواقيت الصلاة؟ يعني احنا دلوقتي في نتيجة او تطبيق علي الموبايل او حاجة بنعرف وقت الصلاة امتي, بس كانوا بيعرفوا ازاي زمان؟ و الاول عرفناها منين اصلا؟

عن عبد الله بن عمرو رضي الله عنهما : أن رسول الله صلى الله عليه وسلم ، قال:"وقت الظهر إذا زالت الشمس وكان ظل الرجل كطوله، ما لم يحضر العصر، ووقت العصر ما لم تَصْفَرَّ الشمس، ووقت صلاة المغرب ما لم يَغِبْ الشفق، ووقت صلاة العشاء إلى نصف الليل الأوسط، ووقت صلاة الصبح من طلوع الفجر ما لم تطلع الشمس."

اولا صلاة الفجر وقنها من تفجر الضوء في السماء الي طلوع الشمس

(((بعدها يجي وقت صلاة الضحي بس دي نافلة مش فرض و اي نافلة اجرها كبير فا ليه ماندداومش عليها؟

عن أبي ذر عن النبي صلى الله عليه وسلم أنه قال: يصبح على كل سلامى من أحدكم صدقة، فكل تسبيحة صدقة، وكل تحميدة صدقة، وكل تهليلة صدقة، وكل تكبيرة صدقة، وأمر بالمعروف صدقة، ونهي عن المنكر صدقة، ويجزئ من ذلك ركعتان يركعهما من الضحى.

الحديث ده بيبن ان الصلاة دي لها فضل كبير, صلاة الضحي تجزئ عن ستين وثلاثمائة صدقة, اقلها ركعتين زي ركعتين صلاة الفجر)))

صلاة الظهر من زوال الشمس م كبد السماء الي ان يصبح ظل الرجل كطوله... يعني ايه الكلام ده؟

دلوقتي, العرب كانوا بيقولوا علي الشمس اما تكون في نصف السماء ان الشمس في كبد السماء, و معني زوال الشمس انها تتحرك من نصف السماء الي جهة المغرب كده من اول هنا نقدر نصلي الظهر, طيب و اخر الوقت؟

دلوقتي لو واحد واقف في صحراء تحت الشمس, الشمس في نصف السماء يعني فوق رأسه, كده ظله هيكون فين؟ ظله هيكون دائرة كده تحته صح؟ طيب لو نتخيل بقا ان الشمس بدأت تتجه للغرب و الراجل لسه واقف في مكانه, ظله هيكون ازاي؟ كل ما الشمس هتتحرك كل اما ظله هيبدأ يكون أطول لحد اما يكون طول الظل يساوي طول الرجل كده وقت الظهر انتهي و بدأ وقت العصر

امتي يبدأ العصر؟ ما احنا لسه قايلين, نهاية الظهر هو هو بداية العصر, يبقي صلاة العصر وقتها يبدأ اما بكون ظل الرجل كطوله و تنتهي ب اصفرار قرص الشمس و يبدأ وقت المغرب اللي هو من غياب قرص الشمس الي ذهاب الشفق الاحمر. يعني ايه؟

لو انت دلوقتي قاعد في اجازة صيفية كده علي البحر وقت العصر (بعد ما صليته اةل ما أذِن طبعا ولا ايه!) و قررت انك تستمتع ب انك تشوف وقت الغروب, فضلت قاعد شويه لقيت الشمس لونها اصفر, شويه و لقيت الشمس بدأت تنزل في البحر, شويه و لقيت الشمس اختفت في البحر و في لون جميل كده ظهر, اول ما تلاقي الشمس اختفت في البحر كده ده ميعاد صلاة المغرب بدأ... قمت صليت و رجعت تاني قلت أقعد استمتع بالهواء لحد العشاء, بعد شويه بدأت تلاحظ اللون الحلو بتاع الغروب ده بدأ يختفي و بعد شويه كمان اختفي, كده وقت صلاة المغرب انتهي و بدأ وقت صلاة العشاء.