تُرَاب أمْشِير (مكتملة)

19- (فَــخّ)

_بصراحة معرفش

ليصيح فخر فجأة :

_معرفش ايه؟ ، هو ايه اللى معرفش؟! ماتخلّيك قد المسؤولية بقى وبطّل استهتار

ردد زياد بعدم اكتراث :

_والله انا مش بتاع مسؤوليات ياجماعة انا صحّتي على قدّي

سارع عز بطرح سؤاله بفضول :
_طب انت هتقول لها امتى؟

_معرفش ياعم انا بطلّع اللى جوايا معاكوا بس. محطتش فى دماغي ترتيبات ولا أى حاجة

ثم أضاف :
_ومحدش يتكلّم فى الحوار ده مع أى حد عشان متبقاش زعلة كبيرة بينى وبينكوا انا بقول اهو!

مال عز تجاهه ليدغدغه قائلًا ;كمن يداعب ابنة أخيه الصغيرة :

_ياتي بطة بتتكسفي !

أزاح زياد يده بعنف :

_بطّل غتاتة يالا ..

ثم زجره بسخط :
_وكفاية أكل بقى! انت نفسك مبتتسدش خالص؟

رفع عز يده باسطًا أصابعه الخمسة، تعبيرًا عن تفادى الحسد :

_الله أكبر فى عينك دي ..

أشاح زياد بيده بعدم اهتمام وأبعد نظره عنه ، فيما تحدث حازم وهو يستعد للنهوض :

_انا بقول اخلع عشان مىّ شكلها مجهّزة لي خناقة من النوع الفاخر، هلحق نفسي قبل ما تكرشني من البيت

علت ضحكات عز الشامتة وهو يقول باستهزاء :

_اسم على مسمّى يالا !

رفع حازم سبابته بتحذير اختلط بضحكه :

_اطلع منها انت يادكتور نُصّ كُمّ

شهق زياد بشكل مبالغ فيه ونظر لعز يحثه على افتعال عراك :

_متسكتش ده بيهينك وبيغلط فيك، لو راجل قوم عرّفه مقامه

صاح به فخر :
_اخرس يابوتجاز يابتاع ياسمين

ردد زياد بتأفف :

_هنبتديها قلة أدب من أولها بقى! ياريتني ما اتكلمت ......

*
*
*

صباح يوم جديد ..
.

_يلا يا امى اطلعي انا تعبت ! ، هو انتِ اللى هتتجوّزى ولا ايه؟

صاح مروان بتأفف ليستعجل والدته التى لم تخرج من غرفتها منذ ساعة ونصف تقريبًا، بحجة التجهّز لمقابلة "عروس ابنها"

خرجت من غرفتها بسبب إلحاحه المستمر منذ مدة لا بأس بها، حتى طفح الكيل واستجابت له ؛ليخرس ويتوقف عن هذا الإزعاج ..

صاحت بانفعال وهى تعلّق حقيبة اليد على ذراعها :

_ كفاية صداع بقى واقفل بؤك ده شوية