عاملين أيه يارب تكونوا في أفضل حال💜
بداية من الأسبوع الجاي الرواية هترجع يوم واحد في الأسبوع لأن حقيقي ضغط الجامعة مع ضغط رمضان مع تفاعل تفرحوني شوية أه وشوية لا.
الفصل اللي قبل اللي فات كان ٥٧٠ فوت والفصل اللي فات مكملش ٥٠٠🫠🫠
ياريت تفاعل البارت ده يكون حلو معاكم بارت لطيف وهادي نهدي بيه أعصابنا أو أعصابكم 😂💜
وأرجوكم التفاعل مش لازم أقعد أصيح الفوت مش هيخسركم حاجة..
قراءة ممتعة ليكم💜
_____________
الفصل الحادي والخمسون
من #قلب_مغلق_للصيانة
بقلم #fatma_taha_sultan
__________
اذكروا الله
__________
مصَاب بكِ وكانَ الحياةَ قيدتَ قلبي.
#مقتبسة
أنا و أنتَ حَقيقيانِ ، حَقيقيانِ حِينَما نَكونُ مَعاً ، أما حِينَما نَكونُ مَع الآخرينَ فَيبحَثُ كلٌّ مِنا عَن الآخرِ .
#مقتبسة
"أستطيع إيجاده ويستطيع إيجادي، لكننا
بطريقةٍ ما ينتظر كل منا الآخر"
#مقتبسة
___________
كان عم "ابراهيم" يجلس على الأريكة منتظر إتيان نهال من الداخل بعدما قابلته أحد الفتيات التي أتت بهم نهال حتى يساعدوها في المنزل في تلك الفترة.
جاءت نهال ووضعت فنجان القهوة أمام "إبراهيم" وتمتمت:
-منور يا عمو.
تحدث ابراهيم في احترام:
-بنورك يا بنتي، أنا مش عايز أتعبك ولا حاجة أنا مش عايز قهوة أنا بس جاي أشوف الحاج وأمشي.
أردفت نهال في نبرة هادئة ومتوترة قليلة:
-تعب أيه بس يا عم ابراهيم دي حاجة بسيطة.
سألها ابراهيم في دهشة:
-هو الحاج نايم ولا أيه؟!.
تحدثت نهال في إحراج:
-والله أنا محرجة جدًا يا عمو ابراهيم بس أنتَ مش غريب يعني، بابا حالته النفسية ما ساعة ما الدكتور شرح له حالته وهو مش مظبوط خالص ومش عايز يشوف حد والله حتى قرايبنا اللي جم من بعيد مدخلوش ليه، المرحلة دي صعبة جدًا عليه مرة واحده بقى عاجز حتى الكلام بيخرج منه بالعافية وكفايا انه عرف أنه مش هيقدر يتحرك.
تحدث إبراهيم محاولًا أن يخفف عنها الحرج:
-ولا يهمك يا بنتي ربنا يشفيه يارب أن شاء الله فترة وتعدي، متشيليش همي أنا لحم كتافي من خير الحاج وكفايا عندي بس أعرف أنه كويس.
بكت نهال وغلبتها دموعها فأعطاها ابراهيم منديلًا ورقي فهتقت :
-هيبقى كويس أزاي ياعم ابراهيم، الدكتور قال أنه يمشي تاني هتبقى حاجة صعبة جدًا، قال أن النطق والكلام هيتحسن مع الوقت ومع العلاج وبيقول أن لازم اجيبله دكتور نفسي أو أخصائي نفسي في البيت هنا علشان برضو النطق عنده ممكن يتأثر بحالته النفسية لأنها وحشة جدًا غير أنه مش بيتكلم معايا في حاجة كل ما أحاول أتكلم في اللي حصل بيروح لافف وشه الناحية التانية.
