حكايه عمر

الفصل الثاني

..
وهاهي قشور أخري تحكم منظور الاشياء بينما وقفت تلك الفتاه بشرفه تلك العمارة البسيطه بأحدي الاحياء الشعبيه
لتزفر من الملل وتدخل الي الداخل ....
اتجهت اللي المطبخ قائله وهي تنحني تغلق كيس القمامه : كويس اني افتكرت أطلع الزباله قبل ما ماما ترجع تفتح ليا حوار
رفعت عيناه تجاه تلك الخطوات التي كانت تنزل من الدرج لتبتسم ما أن رأت جارتها أو جارتها السابقه لتقول بابتسامه : فيفي عامله ايه ؟
احتضنتها الفتاه قائله : وحشتني ياغرام ....
ايه يابت مش بتسألي عليا ليه
قالت الفتاه : انتي غيرتي رقم تليفونك ...كل ما اكلمك الاقيه مقفول
أومات تلك الشابه التي اكتسي وجهها بمستحضرات التجميل قائله وهي تخرج هاتفها من حقيبتها الانيقه :  اه صح ...انا غيرت الرقم
نظرت غرام الي هذا الهاتف الاحدث علي الاطلاق والذي آخرجته جارتها الشابه من حقيبتها التي تري مثيلاتها تقدر بألوف الجنيهات كما حال هذا الهاتف الذي تعرف ثمنه لتقول بعيون لامعه : ماشاء الله
قالت فيفي وهي تريها إياه : ايه رايك ....جبته من الكويت وأنا نازله الإجازة مع الحاج
عقدت غرام حاجبيها : الحاج
ضحكت فيفي بغنج : متشغليش بالك ماهو انا كمان حجيت ....يلا عقبالك
قالت غرام ببراءه : احج؟!
هزت فيفي راسها ضاحكه : لا تقعي في واحد زي الحاج
تنهدت وتابعت : بجد يابت ياغرام .... عرفت الدنيا
لبس وفسح وفلوس ....ده احنا مكناش عايشين
قالت غرام بلهفه : بس يعني انتي مبسوطه معاه
قالت فيفي وهي تهز راسها : طبعا مبسوطه وانا هعوز ايه اكتر من كده....ده انا بدعي لامي ليل نهار أنها جابت ليا عريس زي ده
قال غرام بتردد : اه بس سبتي التعليم
ضحكت فيفي ساخره : وهو الدبلوم ده تعليم بلا هم
....يابت الشهاده دي اهالينا بيضحكوا علينا بيها عشان محيلتهمش حاجه يتمنظروا بيها غيره
التفتت غرام بفزع علي صوت والدتها التي كانت تصعد الدرج بارهاق واستمعت لآخر ما نطقت به تلك الفتاه لتقول : لا يا حبيتي شهادتها دي مستقبلها
التفتت الفتاه بتعلثم قائله : طنط زينب
قالت المراه وهي تربت علي كتف الفتاه : عامله ايه يا فيفي وامك عامله ايه
قالت فيفي بوجه ممتقع : كويسين اوي ياطنط
قالت زينب بفتور : اتفضلي
هزت الفتاه راسها قائله : لا شكرا  ....انا يادوب اروح السواق واقف بقاله ساعه مستني تحت ....انا جيت اطمن علي بابا مش عارفه ماسك هنا ليه مع أن ماما كتير اتحايلت عليه يعيش معاها ....ده انا جبت ليها شقه تحفه في التجمع الخامس اللي بيجي في التليفزيون
عارفه الحته دي يا غرام
أومات غرام لتوكزها والدتها بنظراتها وهي تقول للفتاه :
مبروك عليكم .....بعد اذنك يافيفي انا راجعه تعبانه يلا ياغرام
همست الفتاه لغرام قبل أن تدخل : ابقي تعالي انا قاعده شهر هنا العنوان ميتوهش عمارة ....شقه رقم
ما ان غادرت فيفي حتي زمجرت زينب بابنتها : أنا مش قولتلك متفتحيش الباب لحد غريب
قالت غرام وهي تهز كتفها : طلعت اطلع الزباله ولقيتها وبعدين فيفي مش غريبه
عقدت زينب حاجبيها بخنق : واقفه تقولك ايه البت دي ؟
هزت كتفها : ابدا كانت بتتكلم عن جوزها
زفرت زينب وهي تخلع طرحتها : دي بنت مش كويسه وانا سمعت كلامها
قالت غرام بدفاع : وهي قالت ايه بتقولي مبسوطه في جوازها
قالت زينب بحنق : ربنا يسعدها
ويسعدك بس بجوازه تفرح قلبك مش تملي جيبك فلوس وبس
قالت غرام بتطلع : وماله ياماما لما يبقي الأتنين
قالت زينب بجديه : محدش بياخد كل حاجه شوفي راجل قبل ما تشوفي احلامك اللي هيحققها ليكي
زفرت غرام بداخلها بينما تري كلمات الفتاه محقه وواقعيه بينما ماتقوله والدتها الكادحه مجرد اشعار....
..........
...

دخل عمر الي مكتب ايهم الذي قال وهو يتناول من الطعام الذي افترشه أمامه : تعالي كل يا جحش
نظر عمر الي الطعام الممتد أمام ايهم وهز رأسه قائلا : لا
ما انت عارف مش بحب اكل برا
ضحك ايهم وقضم من الساندويتش قائلا : اعمل ايه ماهو انا وحداني واتعودت علي اكل برا
قال عمر بمشاكسه : قولتلك اتجوز ....اهو تترحم من أكل الشوارع والتنضيف
غمز له وتابع بوقاحه محببه : وتلاقي اللي تدلعك كل ليله  
ضحك ايهم قائلا : تاني اتجوز ....انسي
مسح يداه  وفمه بالمنديل قائلا : اهو كلها شويه وام حسن تخف وترجع
هز عمر رأسه قائلا : تخف اه ترجع لا.... بناتك جننوا الوليه
اوما ايهم ضاحكا : بتقول فيها ...ده انا نفسي اتجننت
تنهد وتابع : اهو جدتهم هتقهد معاهم يومين اخيرا
قال عمر : طيب حلو عشان تاكل اكلة بيتي من ايد حماتك
هز ايهم رأسه بينما لا ينتوي البقاء مع حماته وسماع نفس الأحاديث : لا انا مش هقعد ....هتفضل تشغل اسطوانه تاخد البنات ...
: طيب ما تسيب البنات لها يا ايهم
هز أيهم رأسه قائلا :  انسي اسيب بناتي
قال عمر بينما يعرف قرار صديقه الذي لن يتغير : طيب وانت هتهرب منها ازاي 
: عندي ماموريه
عقد عمر حاجبيه بينما لايعرف بوجود ماموريه لديهم : ماموريه ليه ؟
قال ايهم بمكر : ايه يا جحش ...ماموريه !
فهم عمر ليقول ايهم :  يومين وانت عارف طريقي
: فهمت
.....
بعد خروج عمر أخرج هاتفه من جيبه وقال باقتضاب :  اسبقيني ساعتين وجاي
وبالفعل مضت ساعتان وكان ايهم يوقف سيارته بجراج تلك العمارة الضخمه ويتجه الي المصعد
اخرج سلسله مفاتيحه الذهبيه ووضعها بالباب ودخل لتتجه تلك الفتاه ذات الوجه المبتسم إليه بينما تهادت خصلات شعرها الاسود الطويل بتموجات علي طول ظهرها العاري بينما حددت منحنيات جسدها غلاله حريريه بلون أسود لامع لتقول بغنج : حمد الله علي السلامه...!
....
......
التفتت ريم تجاه نديم الذي فاجأها من خلفها : مش بتردي علي تليفوناتي ليه
قالت بتهرب وهي تحاول أن تتجاوزها وتتجه الي الباب : عادي يا نديم مشغوله
عقد حاجبيها بحنق وهو يتبعها الي الحديقه : مشغوله في ايه
قالت ببرود : مشغوله وخلاص
اشتعلت نظراته بالحنق لتغيرها معه منذ يومان ليتسرب الشك الي قلبه بعوده عمر الي حياتها ...
وبالفعل تغيرت ملامحه حينما تعالي رنين هاتفها بأسم عمر لتحتد نظراته ويقول بتأنيب : انتي لسه بتكلميه
هتفت بحنق : انا اكلم اللي انا عاوزاه انا حره
نظر لها بعتاب : وانا
نظرت له ريم بغضب :  انت ايه ؟
قال نديم بعيون تلتهم ملامحها : انا بحبك
هتفت ريم بإصرار ؛ وانا بحب عمر ...!
التهبت نظراته بالحنق وهو يقول بهجوم : مكنش ده احساسك من يومين ...ايه اول ما شاور ليكي جريتي عليه وانا مسحتيني ..!
...........
...
قراءه ممتعه بقلم رونا فؤاد
ايه رايكم و توقعاتكم