حرام مستباح

الجزء الثاني 12

صرتلك سر بحلك ميتين ماضن بعد تلكاني .

#حرام مباح
#نسرين الاسدي

ملاحظه بنات:
اروجه كلش مريضه خطية ادعولها الي عدهم انستا اكيد شافوا ستوري ملاك وعرفوا الموضوع

والي ما عدهم انستا هذا حسابي ع التيك نشرت الستوري
nsreen_nsreen 1
______________

ياسمين:
مباشرتآ بس رجعنه فروحه من المدرسه رحنه لأم رعد حته تاخذنه لسيد كون يعرف بسوالف العمل ويبطله

خلينه فروحه وتيم يم زينب واخذنه ام رعد ويانه ورحنه

جان بيته بعيد بس كالت هو خوش عراف وهواي ناس يجوله من اماكن مختلفه حته من غير محافظات

دخلنه وجان يمه ناس ضلينه كاعدين بره على ما يخلصون
ومن كثرة الناس الشفتهم موجودين الحجي عنه يمكن صدك

ضلينه كاعدين فوك الساعه وبعده ما وصل دورنه لأن هواي جايين قبلنه

فجئه التفتنه على صوت واحد سلم على عمار

_السلام عليكم شلونك ابو زيد

_وعليكم السلام اهلآ ابو باقر

_شعندك هنا.. اول مرة بحياتي من عرفتك لليوم اشوفك جاي لهيج مكان

_اي والله اني خلصت عمري ما مهتم لهاي الشغلات وبعيد عنها.. بس هي هاي الدنيا دوام الحال من المحال

_اي والله صحيح حقك.. اني هسه شجايبني هنا غير ابني راد يروح مني

_يا ستار.. ليش مو كتلي قبل شهر زوجته شبي لعد

_والله يا ابو زيد النسوان ما ترحم مسويله عمل وصاير ما يطيق زوجته تخيل عروسه بعدها بشهر العسل زوجها بغرفه وهي بغرفه

_لا حول لله.. ليش هيج

_خطية والله هواي تعبت وياه بس هيه بت اصل ما تركته ولا راحت لهلها كالت اتحمل حته لو يصيح علي ويطردني لأن مو بيده

_الله يشافي يارب ويبعد عنكم الشر

_الله يحفظك اخي.. هسه هو داخل ويه السيد واني ضال منتظره.. بلكي الله يلتفت لحاله

شويه وطلع ولد بعده شاب خطية عمره مبين ما يجاوز العشرين بس شنو شكله تعبان وذابل حته مخلي اكبر من عمره
الله يشافي ويساعد زوجته اكيد هسه حالتها ما تنوصف

وصل دورنه ودخلنه عليه.. المكان غريب كله ريحة بخور وصور طلاسم وآيات
ويمه قرآن وكتب هواي دفاتر اقلام وشغلات غريبه ما عرفت شنو هنه

سلم عمار علي وكعدنه كدامه..

كال وهو مخلي عيونه بالكتاب: اساميكم واسامي امهاتكم

كناله الأسماء وراد عمار يشرحله القصة رفع ايده اله وغمض عيونه

شوية وكال: اكو نسوان يردن يخربن بيتكم.. البيت مرشوش بكل مكان وكل ركن.. ما بي ولا مكان نظيف من هذا العمل